Avval Buxoro shahrida 1979 yili “Paxtakor” jamoasi safida aviahalokatga uchragan Ravil Agishev va Vladimir Sobirovlarning xotirasiga bag'ishlab respublika turniri boshlanganligi haqida xabar bergandik. 9 may Xotira va Qadrlash kuni arafasida ko'hna shaharda tashkil etilgan musobaqa yakuniga etdi. Ikki yosh toifasida o'tkazilgan turnirda ikkita jamoa bilan ishtirok etgan tarbiyalanuvchilarimiz Namanganga g'olib va sovrindor sifatida qaytishdi. 2001 yilda tug'ilgan o'smirlarimiz finalda Buxoro terma jamoasi vakillarini 2:0 hisobid mag'lubiyatga uchratib, turnir g'olibligini qo'lga kiritishdi. Ushbu yosh toifasidagi futbolchilarimiz guruh bosqida peshqadam bo'lishgach yarim finalda samarqandlik tengqurlaridan ustun kelishgandi - 2:0. Musobaqa yakuniga ko'ra to'purarlik mahoratini namoyish etgan Boburshoh Sobirov eng yaxshi hujumchi nominatsiyasi g'olibi sifatida e'tirof etildi. 2004 yilda tug'ilgan futbolchilarimiz uchinchi o'rin bilan cheklanishdi. Bu yosh toifasidagi tarbiyalanuvchilarimiz ham guruh bosqichini ikkita g'alaba bilan yakunlashgandi. Yarim finalda o'smirlarimiz buxoroliklar bilan bahs olib borishdi. Mezbon jamoa bilan o'tgan uchrashuvda vakillarimiz 1:2 hisobida imkoniyatni boy berishdi. Turnir nizomiga ko'ra yarim finalda mag'lub bo'lgan jamoalar ham sovrindor sifatida e'tirof etilishdi.
— deya xabar beradi uff.uz nashri.