1news.uz — Joriy yilning 26-29 may kunlari Termiz shahrida XIII bora O'zbekiston Respublikasi Prezidenti sovrini uchun Al Hakim at Termiziy xotirasiga bag'ishlangan xalqaro turniri bo'lib o'tadi. Har bir mamlakat, har bir millatning o'ziga xos milliy sport o'yinlari bor. Bugun ommaviy hisoblangan ko'plab sport turlarining qadimiy ildizlari ham turli xalq urf-odatlari, an'analariga borib taqaladi. Xalqimizning milliy qadriyatlaridan bo'lgan – Kurash ham uch yarim ming yillik tarixga ega va bugun jahon uzra jadal rivojlanayotgan zamonaviy xalqaro sport turidir. Istiqlol yillarida Muhtaram birinchi Prezidentimiz rahnamoligida mamlakatimizda ko'plab sport turlari qatori Kurash ham keng ommalashib, izchil rivojlanmoqda. Bir paytlar to'y, bayram va sayillarning tor doirasidan chiqolmagan kurashimiz istiqlol sharofati bilan dunyo sportiga aylandi. Er kurrasining barcha qit'alariga keng yoyilib, ommalashmoqda. 2006 yildan Osiyo Olimpiya Kengashi tomonidan Osiyo sporti deya e'tirof etilib, Osiyo o'yinlarining Yopiq inshoatlar va yakkakurashlar, Sohil hamda Yozgi Osiyo o'yinlari tarkibidan rasman o'rin oldi. Bugun Kurashimiz kirib borgan dunyoning 130ga yaqin davlatlarida “ta'zim”, “to'xta”, “yonbosh”, “chala”, “dakki”, “halol” kabi o'zbekcha atama va so'zlarning jaranglayotgani har birimizga cheksiz g'urur va iftixor bag'ishlaydi. Joriy yil 26–29 may kunlari Kurash bo'yicha O'zbekiston Respublikasi Prezidenti sovrini uchun Al Hakim at-Termiziy xotirasiga bag'ishlangan an'anaviy xalqaro turnir o'z g'oliblarini aniqlaydi. Mazkur nufuzli turnir 1993 yildan beri muntazzam har ikki yilda bir o'tkazilib kelinadi. O'tgan davr mobaynida dunyoning 100 ga yaqin davlatidan 700 nafardan ziyod polvonlari Termiz gilamlarida kuch sinashdi. An'anaviy tarzda o'tkaazilayotgan navbatdagi turnir 73 kg, 90kg va mutloq vazn toifalarida bo'lib o'tadi. Turnirning mukofot jamg'armasi 56 ming AQSh dollari bo'lib mutloq vaznda g'olib bo'lgan polvon O'zbekiston Respublikasi Prezidenti sovrini 25 000 AQSh dollari sohibiga aylanadi. Xabarning tafsilotlari bilan 1news.uz saytida ushbu havola orqali tanishishingiz mumkin.
— deya xabar beradi uff.uz nashri.