Afsonaviy futbolchi, biroq murabbiylikda bu darajaga yaqinlasholmagan argentinalik Diego Armando Maradonaning «Al-Fujayra» (BAA) klubi boshqaruvini qo'lga olgani Osiyo sportida yaxshigina aks-sado berdi. Qit'a futbolida top-murabbiylar safi tobora kengayib borayotgani quvonarli hol. E'tiborlisi, Osiyoga yuzlanayotgan mutaxassislar qatorida futbolchilik payti tengsiz yulduz maqomini olganlar ham ko'p. Ajabmas, bu jarayon qit'amizda futbolchilar o'sishi va sohaning umumiy rivojlanishiga yaxshigina turtki bersa. Ha, tan olaylik, Maradona murabbbiylikda katta yutuqlarga erishganicha yo'q. Bundan tashqari, buyuk Diegoning og'ir xarakterini nazarda tutsak, undan qandaydir mo''jizaviy ish kutish yaramaydi. Lekin masalaning tub mohiyati boshqa. Diqqatga sazovor fakt: Fors ko'rfazidagi ilg'or chempionatlardan biri sanalgan BAA ligasi ishtirokchilari deyarli 100 foiz xorijlik mutaxassislar qo'lida. Ya'ni ayni payt birgina «Xatta» klubi mahalliy murabbiyga tayanib ish ko'rmoqda. Demakki, BAA pro-ligasi rahbariyati chempionatda raqobatni yanada kuchaytirish maqsadida jamoalar oldiga qandaydir to'siq qo'ymayapti. Oddiy aytganda, arablar xorijlik futbolchilar hamda murabbiylar masalasida yuzaga kelayotgan chinakam qo'nimsizlikka beparvo qaramoqdalar. Muhimi, translyatsiyalar uchun to'lanayotgan mablag' ma'lum darajada oqlansa, bas. Shundan kelib chiqib, quyida BAA futboli misolida xorijlik murabbiylar portretiga nazar solamiz. Umumiy ahvol BAA pro-ligasida 14ta klub ishtirok etadi, xolos. Shunga qaramay, birinchilikdagi murabbiylar geografiyasi ancha keng va xilma-xil. Qarang, mahalliy chempionatning yuqori divizionida portugaliyalik 3 nafar murabbiy ishlamoqda, Gollandiya, Ruminiya va Argentinadan esa 2 nafardan mutaxassis bor. Umuman, pro-liga bu masalada deylik, Qatar Yulduzlar ligasidan keskin farqlanadi. Chunonchi, qatarliklar arab murabbiylariga katta e'tibor qaratishadi. Harqalay, Yulduzlar ligasida Tunis, Iordaniya, Misr kabi arab dunyosi mamlakatlari vakillarini ko'rish mumkin. BAA ligasida esa faqat Suriyadan murabbiy bor, xolos. Aytgancha, pro-liganing yaqindagina yakunlangan 2016|2017 yillar mavsum davomida 11ta iste'fo kuzatildi. Yanada to'liqroq ma'lumot bersak, atigi 5ta klub - «Al Ahli», «Al-Dafra», «Al-Vasl», «Al-Vahda» va «Al-Jazira» rahbariyati amaldagi bosh murabbiyga mavsumning boshidan oxiriga qadar ishlash imkoniyati berdi. BAA pro-ligasi klubini mavsum-2016|2017 oralig'ida qabul qilib, finishga qadar ishlashga muvaffaq bo'lgan murabbiylar Klub Bosh murabbiy (mamlakati) Kelgan vaqti Mavsum yakunidagi natijasi «Al-Shabab» Fred Rutten (Gollandiya) 2016 yil 11 may 8-o'rin «Al-Vasl» Rodolfo Arruabarrena (Argentina) 2016 yil 6 iyun 2-o'rin «Emireyts» Teo Byuker (Germaniya) 2016 yil 22 iyun 11-o'rin «Dibba» Paulo Serxio (Portugaliya) 2016 yil 29 iyun 12-o'rin «Kalba» Fabio Viviani 2016 yil 28 avgust 13-o'rin «Bani Yas» Joze Manuel Gomesh (Portugaliya) 2016 yil 23 oktyabr 14-o'rin «Al-Nasr» Dan Petresku (Ruminiya) 2016 yil 31 oktyabr 6-o'rin «Sharja» Joze Peseyru (Portugaliya) 2017 yil 2 yanvar 9-o'rin Murabbiylarni nima kutyapti? DAVOMI InterFutbol.uz ning Telegram dagi sahifasiga ulaning – eng so'nggi yangiliklar, qiziqarli bloglar va tahliliy materiallar endi bir to'plamda.
— deya xabar beradi uff.uz nashri.