Oliy ligada yuzaga kelgan kichik tanaffus yuzaga kelganligi sababli jamoalarimizda ma'lum kun davomida chempionat charchoqlarini chiqarish imkoni yuzaga kelgandi. Bunday tanaffusdan xorijlik futbolchilar ham samarali foydalanishdi. Xususan, jamoamiz sharafini himoya qilayotgan serbiyalik legionerlarimiz Darko Stanoevich va Nemanya Yovanovichlar yaqinlari bilan ko'rishish maqsadida uylariga jo'nab ketishgandi. Bir necha kun davomida oila a'zolari davrasida dam olgan legionerlarimiz kecha kunning ikkinchi yarmida Toshkentga etib kelishdi. Bugundan esa futbolchilarimiz mashg'ulotlarda qatnashishni boshlashadi. Bundan tashqari dastlabki kungi mashg'ulotlarda qatnashmagan Oybek Qilichev ham safga qaytadi. Jarohat sababli bir necha o'yinlarda maydonga tusha olmagan himoyachi G'iyos Komilov esa yakka tartibda shug'ullanmoqda. Yana bir jarohatlangan futbolchi Ro'zimboy Ahmedov esa hozircha jamoa ixtiyoriga qaytganicha yo'q. Jamoamizning qolgan a'zolari mashg'ulotlarda to'laqonli tarzda ishtirok etishmoqda.
— deya xabar beradi uff.uz nashri.