- Kuni kecha Superliga uchrashuvlarini o'tkazishga ruxsat berildi. Bu xabarni qanday kutib oldinglar?
- Superliga bahslarining boshlanishini eshitib, juda xursand bo'lib ketdik. Nimaga deganda futbolni juda sog'inib qolgandik. Ashaddiy futbol ishqibozlari bizdanda xursand bo'lishganligi aniq. Futbol tom manoda jahonda birinchi raqamli sport turi sanaladi.
- Nima deb o'ylaysiz futbolchilarga qayta tiklanib olish uchun qancha vaqt kerak bo'ladi?
- Endi futbolchilarning jismoniy holatini tiklab olishlari uchun kamida yigirma kuncha vaqt zarur. CHunki oradagi to'xtalish davri juda uzoq cho'zildi. Hatto mavsumlar oralig'ida ham biz bu qadar uzoq dam olmasdik. Yigirma-o'ttiz kundan keyin mashg'ulotlarni boshlab yuborardik. Koronavirus pandemiyasi sabab 64 kun uyda o'tirdik. To'g'ri, imkon darajasida jismoniy mashqlar bajarib turdik. Biroq bu baribir maydonda yugurish, to'p bilan ishlash o'rnini bosa olmaydi. Futbolchilarda jarohatlar kamroq bo'lishi uchun ham uch hafta mashg'ulotlarga ajratilganida yaxshi bo'lardi. Biroq vaqt tanqisligi sabab PFL ikki haftadan keyin Superliga restartini rejalashtiribdi, o'shangacha o'zimizga kelib olishga harakat qilamiz. Boshqa yo'l yo'q.
- O'yin vaqtida 3 emas 5 nafar futbolchi almashtirishga ruxsat beriladi. Bu futbolchilar uchun qanchalik qulay?
- Aynan shu holatda jamoalarga beshta o'yinchini amalga oshirish imkoniyati berilgani qo'l keladi deb o'ylayman. To'g'risini aytganda hech bir futbolchi shuncha tanaffusdan keyin to'liq 90 daqiqa o'ynab berolmasa kerak. Beshta o'yinchi almashtirilishiga ijobiy qarayman.
- Navbatdagi uchrashuv “Lokomotiv”ga qarshi bo'ladi. Uchrashuvga tayyorgarlik boshlandimi?
- Mashg'ulotlarni davom ettirishga ruxsat berilganidan so'ng "Lokomotiv" bilan o'yinga tayyorgarlikni boshlab yubordik. O'ylaymanki uchrashuv kunigacha asta-sekin formaga kirib olamiz. Raqibimiz juda kuchli va nomdor jamoa. Biroq biz muxlislarimiz uchun ijobiy natija qayd etishga bor kuch va imkoniyatlarimizni safarbar etamiz.
Furqat Po'latov suhbatlashdi.
Bosh sahifaga
295