Derbi haqida

Bu bahs nafaqat turning markaziy o'yinligi bilan ajralib turardi. Balki "Bunyodkor" va "Lokomotiv" o'rtasida bellashuv derbi maqomiga ega edi. O'yinga bo'lgan qiziqish u qadar yuqori bo'lmagani avvalo odamni ranjitdi. Buni stadionga kelgan tomoshabinlar sonidan ham bilib olsa bo'ladi. CHempionat peshqadamlari, mamlakatimizning ikki etakchi jamoalari o'rtasidagi o'yinga atiga 2765 nafar ishqiboz tashrif buyursa g'alatida. Kishini tashvishga solayotgan jihat avvalo muxlislar tashrifi tobora kamayib borayotganligidan. Qolgan o'yinlarda bu kabi ko'rsatkichga o'rganib qolganimizga ancha bo'lgandi. Ammo endi markaziy o'yinlarda ham bu holat odatiy holga aylanayotgani achinarli albatta.

Endi o'yin haqida to'xtalsak. Bu uchrashuvda kimga g'alaba muhimroq edi degan savolga aniq bir javob qaytarish qiyin. Futbolda har bir g'alaba muhim aslida. Ayniqsa etakchilar o'rtasidagi o'yinlardagi g'alaba barcha jamoa uchun qimmatli hisoblanadi. "Lokomotiv" chempionlik poygasida "Paxtakor"ni quvlashda davom etayotgan bo'lsa, "Bunyodkor" kuchli-uchlikka o'rnashib olish uchun "Nasaf"ning ortidan taqib etayotgandi.

O'yinda hech bir jamoa katta ustunlik bilan harakat qilmadi. Nisbatan "Lokomotiv" kuchliroq o'ynadi. Himoyadagi tartibli o'yin, o'rta chiziqdagi ishonchli harakatlar va hujumdagi faollik bo'yicha "temiryo'lchilar" shu kuni "qaldirg'ochlar"dan ko'ra mazmunliroq o'ynashdi. Sanjar SHoahmedov tomonidan kiritilgan tezkor gol "Bunyodkor"ning mag'lubiyatga uchrashiga etarli bo'ldi. Birgina o'sha gol o'yin taqdirini hal etib qo'ydi. "Bunyodkor" jamoasi bunga javoban hech narsa qila olmadi. Aynan Sergey Lushan shogirdlari raqiblariga qarshi hech nima qila olishmagani o'yin jozibasiga ham o'z tasirini o'tkazdi.

Bellashuv shiddatli va yuqori darajada o'tdi deya olmayman. "Lokomotiv" futbolchilarining katta tajribasi evaziga bu o'yinda "Bunyodkor"ni osonlik bilan mag'lubiyatga uchratdi. Golgacha va goldan keyin ham "Bunyodkor" ikkinchi raqamli jamoasi sifatida o'ynayverdi. Qarshi hujum taktikasiga tayanib harakat qilgan Lushan shogirdlari Ignatiy Nesterov darvozasi oldida aytarli golga tortadigan vaziyatlar tashkil qila olishmadi. Akramjon Komilovning birinchi taymda uzoqdan yo'llagan kuchli va noaniq zarbasi, Zuagining jarima zarbasidan tepgan to'pi va Satoning ikkinchi bo'limdagi raqib darvozasi tomon yurishi yakuniga etmay qolganini hisobga olmasa, Nesterov o'yinni xotirjam tomosha qildi.

"Bunyodkor" negadir kechagi bahsda umuman o'ziga o'xshamadi. To'g'ri, so'nggi ikki yilda jamoa etakchilar bilan raqobatlashishga ancha qiynalmoqda. Jamoada avlodlar almashuvi kuzatilmoqda. Lekin hozirda tarkibda o'ynayotgan yoshlar o'tgan yili grandlar bilan bo'lgan bahsda katta shijoat, ishtiyoq evaziga o'sha "Lokomotiv"ni ham mehmonda mag'lubiyatga uchratishni uddasidan chiqishgani esimizda. Tajriba borasida "Bunyodkor" ayni paytda turnir jadvalidagi kuchli-uchlik jamoalaridan ortda qolmoqda. Bu aniq. Lekin "qaldirg'ochlar"ning asosiy kuchi hisoblanadigan katta shijoat va ishtiyoq kechagi o'yinda umuman ko'rinmadi. Aynan shu jihatlar hozirda ularning eng katta yutug'i edi.

Sato Minori hozirgi "Bunyodkor"ning o'yinini belgilab beradi. Aynan shu yapon futbolchisining harakatlariga ko'p narsa bog'liq. "Lokomotiv" bilan bo'lgan bellashuvda Satoni Vadim Abramov jamoasi zararsizlantira oldi. Bu esa "Bunyodkor"ning jozibali hujumlarini tashkil etilishini oldini oldi desak mubolag'a bo'lmaydi. Doston Hamdamov esa kecha ushbu mavsumdagi o'zining eng yomon uchrashuvini o'tkazdi. SHaker Zuagi "Lokomotiv"ga qarshi bahsda nimalar bilan mashg'ul bo'lganini ochig'i uncha tushunmadim. Faqatgina Zuagining tezligi kechagi "Bunyodkor"ning o'yiniga juda mos tushganini alohida aytib o'tish mumkin.

"Loko" kecha o'zining eng yaxshi o'yinini o'tkazdi deya olmayman. To'g'ri, "Bunyodkor" har qanday holatda ham kuchli raqib. Vadim Abramov boshqaruvidagi "Lokomotiv" "Bunyodkor" bilan safardagi bahsni ham o'z odatiga sodiq qolgan holda hujumkor ruhda o'tkazdi. "Lokomotiv" Murod Zuhurov darvozasi oldida raqibiga nisbatan ko'proq xavfli vaziyatlar sodir etdi. "Loko" butun uchrashuv davomida o'yinni nazorat qildi. Abramov jamoasi avvalgidek hujumga ko'r-ko'rona o'tib ketmayotgani ham jamoaning himoya chizig'ida muammolar keltirib chiqarmapti. Nemanya Yanichichning ishonchli o'yinlari evaziga "Loko" qo'rg'oni chempionatda ancha tartibli o'ynamoqda. Kechagi bahsda Yanichich Sato Minori bilan jarima maydonchasidagi bo'lgan to'qnashuvda mukammal o'ynadi va "Loko" darvozasi oldida vujudga kelishi mumkin bo'lgan eng xavfli vaziyatni oldini ola bildi. Aks holda Minori hisobni tenglashtirib, "Lokomotiv"ning g'alabasiga to'sqinliq qilishi mumkin edi.

Tan olish kerak, hozirda "Lokomotiv" jamoasi o'yinni tashkil etish, vaziyatlarni samarali yakunlash borasida chempionatimizdagi eng kuchli jamoa hisoblanadi. Agarda Vadim Abramov jamoasi so'nggi o'yinlardagi kabi himoyada ham shu ro'sinda ishonchli o'ynashda davom etsa, unda bu mavsumda ular nihoyat o'z tarixlarida ilk marotaba mamlakat chempion degan nomga sazovor bo'lishlari mumkin.

Bu yo'lda avvalo "Paxtakor" ularga eng katta raqobatchi sanaladi va ochkolar bo'yicha ham "sherlar" "Lokomotiv"dan uzib ketishgan. Lekin chempionat yakuniga qadar hali vaqt bor va bu jamoalarning o'zaro o'yini ham kutib turibdi. Barcha masala bu jamoalarning o'zaro o'yinida hal etilishi ham mumkin. Buni endi vaqt ko'rsatadi.

"Lokomotiv" hozirgacha "Paxtakor" va "Bunyodkor" bilan ikkitadan o'yin o'tkazdi va har to'rttalasida ham muvaffaqiyat qozondi. Vadim Abramov uchun hozir faqatgina "Nasaf" noqulaylik tug'dira olmoqda.

Endi bir narsaga etibor qaratsak. Kechagi "Lokomotiv"ning "Bunyodkor" darvozasiga kiritgan goli vaziyatida Sanjar SHoahmedovning zarbasidan so'ng "Lokomotiv" futbolchisi Murod Zuhurovga halaqit qilib qolgan va o'yindan tashqari holatda tushib qolgan. Bu vaziyatda laynsmen bayroqchasini ko'tarmagan va gol inobatga olingan. Bu vaziyatda offsayd bormidi? To'g'ri, futbolchi to'pga tegmagan va to'p yo'nalishini o'zgartirmagan. Ammo "Loko" futbolchisi to'pga tegishga harakat qilgan va bu vaziyatda o'yindan tashqari holat qayd etsa ham bo'ladi aslida...

Ushbu vaziyatni o'zingiz ko'ring va baho bering. Video

Uchrashuv nazoratchisi esa hakamlarga qoniqarli baho qo'ygan.

SHahboz Beg'amov