Osiyo chempionlar ligasining 3-turi doirasida bo'lib o'tadigan «Istiqlol» (Tehron) - «Lokomotiv» o'yini oldidan toshkentliklar bosh murabbiyi Andrey Miklyaev o'z fikrlari bilan o'rtoqlashdi.
«Ertaga har ikkala jamoani qiziq o'yin kutib turibdi deb o'ylayman. Hozir barcha to'rttala jamoada ham uch ochkodan bor, bu esa kurashni yanada qizdiradi. Guruhdan chiqish uchun nafaqat uyda, balki safarda ham ochko olish kerak bo'ladi. Shu bois bo'lajak o'yindan ochko bilan qaytishga harakat qilamiz.
Eronda birinchi marta o'ynayotganimiz yo'q. O'tgan yil bu erda «Sepohon», undan oldin esa «Fulad»ga qarshi bahs olib borganmiz. Eronliklar futbolni juda yaxshi ko'rishadi, ularda kuchli futbolchilar ko'p. O'z navbatida biz ham ulardan qolishmaymiz va buni ertaga isbotlashga harakat qilamiz.
«Istiqlol»ning OChLdagi o'yinlarini ko'rdik, raqib haqida yaxshi tasavvurga egamiz. Futbolchilari jismoniy jihatdan baquvvat va taktik tomonlama ham yaxshi shakllangan», deya Miklyaevning so'zlarini keltiradi «Lokomotiv» rasmiy sayti.
Eslatib o'tamiz, «Istiqlol» (Tehron) - «Lokomotiv» uchrashuvi 13 mart kuni, Toshkent vaqti bilan 20:30da boshlanadi.
Bosh sahifaga
222