«Barselona» qarorgohida qurilayotgan yangi mashg'ulotlar stadioni klub afsonasi, sobiq futbolchi va murabbiyi Yohan Kroyf nomini oladi. Bu haqda klub prezidenti Xosep Bartomeu ma'lum qilgan.
«Qurilajak «Siutat Yesportiva» stadioni Kroyf nomi bilan ataladi. Bundan tashqari, yangitdan rekonstruktsiya qilinadigan «Nou Kamp» stadioni yonida uning haykali o'rnatiladi. Biz shuningdek, klub muzeyida uning shaxsiyatini anglatib turuvchi maxsus zal ochilishini ta'minlamoqchimiz», deya Bartomeudan iqtibos keltiradi klub rasmiy tvitteri.
Yohan Kroyf 1973-78 yillarda «Barselona» safida to'p surgan. Bu davrda u Ispaniya chempionati va kubogida g'olib chiqqan. Shuningdek uch marta «Oltin to'p» sohibi bo'lgan. Bosh murabbiy sifatida «Barselona»ni 4 marta Ispaniya chempioni qilgan. Bundan tashqari Ispaniya kubogi, Yevropa chempionlari kubogi, UEFA kubogi va superkubogida g'oliblikni qo'lga kiritgan.
Kroyf bir yil muqaddam, 68 yoshida saraton xastaligi sabab olamdan o'tgandi.