Oliy liga doirasidagi 4-turdan o'rin olgan «Dinamo» - «Navbahor» uchrashuvidan keyin (0:1) mezbonlar bosh murabbiyi Oleg Tyulkin o'z fikrlarini bildirib o'tdi.
«Shiddatli va kurashlarga boy bo'lgan o'yinda ishtirok etib, afsuski mag'lubiyatga uchradik. Shunga qaramay, o'yin yomon taassurot qoldirmadi, yigitlar maydonda bor kuchlari bilan to'p surishdi. Bugun yagona xatomiz o'yin taqdirini hal etdi. Yigitlarga hech qanday e'tirozim yo'q, ular borlarini berishdi. Ikkinchi bo'limda o'yin tizginini qo'limizga olib, hujumkor to'p surishga intildik, ammo raqib himoyada bexato o'ynadi. Xatolar ustida ishlashda davom etamiz. Bu futbol, bugun omad «Navbahor» tomonda edi.
Jamoamizning ayni damdagi o'rtacha yoshi 22 yoshni tashkil qiladi. Bunday davrda yigitlarda har qanday holat kuzatilishi mumkin. Barqarorlik doim ham bir xil bo'lmaydi. Ayniqsa, ruhiy jihatdan tayyorlash muhim. Qolaversa, raqiblar ham ancha tajribali edi, ular ham bizni juda yaxshi o'rganishgan. Eng asosiysi, yosh tarkibimiz hech kimdan qo'rqmay, raqibga qarshi munosib to'p surmoqda. Albatta, qaerdadir xatolarga yo'l qo'ygandirmiz, buni tahlil qilib, o'rganamiz. Har bir o'yin yigitlar uchun tajriba. Mag'lubiyat ham jamoani yanada jipslashishiga sabab bo'ladi.
Maydonda hamma barobar, kim ruhiy va jismonan yaxshiroq tayyor bo'lsa o'sha g'alabaga erishadi. Omad ham muhim bunda. Albatta, bunday paytda mag'lubiyat yoshlarga ko'proq ta'sir qilishi mumkin, ammo bu borada biz keyingi o'yingacha ish olib boramiz. Ayniqsa, bunaqangi qo'llab-quvvatlash bilan yigitlar o'zlarini tezda tiklab olishadi.
Mag'lubiyatdan keyin ham viloyat va shahar rahbariyati ham jamoamizni qo'llab-quvvatladi. Muxlislarni aytmaysizmi? E'tibor bering, yana qaerda Samarqanddagidek bir soat oldin o'yingoh muxlislar bilan to'lib-toshib, minglab odamlar tashqarida qolib ketishmoqda? Bunday futbol atmosferani faqat Samarqandda ko'rish mumkin. Demak ular bizga ishonishmoqda, bu futbolchilarga yanada shijoat bag'ishlaydi.
Biz ochkolar uchun emas, avvalo Samarqand ahli uchun o'ynaymiz. Muxlislarimizni xursand qila olsak, bu katta baxt. Bugun minglab muxlislarimizdan uzr so'raymiz, ularni xursand qila olmadik. Shunga qaramay, butun o'yingohning «Dinamo»ga «Molodtsii» deya hayqirgani jamoa uchun katta sharaf. Bizga ishonayotgan ekanlar, keyingi o'yinlarda g'alaba bilan ularga minnatdorchilik bildirishimiz shart», deya Tyulkinning so'zlarini keltiradi «Dinamo» rasmiy sayti.