Bugun, 8 oktyabr kuni “Olmaliq”qa qarshi nazorat bahsida maydonga tushgan “Lokomotiv” 2:1 hisobida g'alaba qozondi. Bu haqda klub matbuot xizmati xabar berdi.
TTYMI stadionida o'tkazilgan o'yinning birinchi taymida hisob ochilmadi. Tanaffusdan so'ng darvozalarga uchta to'p kiritildi. Avvaliga “Olmaliq” futbolchisi Mo'ydin Mamazulunov gol urdi.
Keyinchalik esa “Loko” futbolchilari ikki bor to'p kiritishning uddasidan chiqishdi. 82-daqiqada Ikrom Aliboev hisobni tenglashtirgan bo'lsa, 89-daqiqada Ivan Nagaev hisobni 2:1ga etkazdi.
O'yin oxirida esa “Loko” darvozasi tomon penalti belgilandi. Lekin ijara asosida “Olmaliq”da to'p tepayotgan Xurshid Muxtorov penaltidan unumli foydalana olmadi. Aniqrog'i, uning zarbasini Savar Karimov qaytarishga muvaffaq bo'ldi. Shunday qilib mazkur o'rtoqlik uchrashuvida “temiryo'lchilar” g'alaba qozonishdi.