Kirish | A'zo bo'lish

Bugun «Barselona»ning argentinalik hujumchisi Lionel Messi katalon klubi bilan 2018 yilning yozida nihoyasiga yetadigan shartnomasini uzaytirmoqchi yemasligi haqida xabar tarqaldi. «Tribuna.uz» futbolchi faoliyatini davom yettirishi mumkin bo'lgan variantlarni ko'rib chiqadi.

Ispaniyadagi Marca nashri Lionel Messi «Barselona» rahbariyatini shartnomasini uzaytirmasligi haqida ogohlantirganini yozdi. O'z navbatida «Barselona» prezidenti Jozep Bartomeu futbolchiga bu borada shoshilinch qaror chiqarmasdan, yaxshilab o'ylab ko'rishni tavsiya yetgan.

O'z faoliyatini shu jamoaga bag'ishlagan Messining amaldagi shartnomasi muddati 2018 yil yozida tugaydi, ammo nashrlar u shartnoma muddati tugamasdanoq ketishi mumkinligini yozishgan.

Marca Madriddagi nashr hisoblanadi va bu xabar ham tez orada bo'lib o'tadigan Yel-klasiko (4 dekabr - tahr.) oldidan ko'tarilgan shov-shuv bo'lishi ham mumkin. Shu bilan birgalikda ushbu gazeta Ispaniyadagi nufuzli nashrlardan biri hisoblanadi va unda yozilgan ko'p ma'lumotlar assosiz bo'lmaydi.

Shunday yekan, Messi rostdan ham Barselonadan ketsa, qaysi jamoaga borib qo'shilishi yehtimollari mavjudligini ko'rib chiqamiz.

«Pari Sen-Jermen» (Frantsiya)

Eng jozibador variantlardan biri shubhasiz - «Pari Sen-Jermen». Frantsiya poytaxtidagi bu badavlat klub azaldan o'z safida Messi bo'lishini orzu qilib keladi.

«PSJ» ichki chempionatda motivatsiyasiz qolgan, jamoa duch kelgan raqibni yer tishlatmoqda. Shayxlar bu jamoaga Chempionlar ligasida g'alaba qozonish vazifasini qo'ygan. Lekin hali bu jamoa turnirning yarim finaliga qadar ham chiqib bormadi.

Zlatan Ibrahimovich ketganidan keyin frantsuzlar yulduz-frontmendan ayrildi va bu rolga Messidan ko'proq to'g'ri keladigan futbolchi yo'q.

«Barsa» bu futbolchisini qo'yib yuborishga rozi bo'lsa va kattagina pul ishlab olishni istasa, muammo bo'lmaydi. «PSJ»ga bunday transferni amalga oshirishda faqat moliyaviy feyr-pley to'siq bo'lishi mumkin, ammo bu hal qilsa bo'ladigan masala.

Agar Frantsiya grandida Messini qo'lga kiritish imkoniyati paydo bo'lsa, buning uchun ular qancha futbolchining o'rnini bo'shatish kerak bo'lsa, shunchasining o'rnini bo'shatadi.

«Manchester Siti» (Angliya)

Messi uchun jamoa qidirar yekanmiz, «Manchester Siti»ni nazardan chetda qoldirib bo'lmaydi. Ha, bu jamoaning imkoniyatlari ham parijliklarniki kabi ulkan, balki yanada yaxshiroqdir.

Manchesterliklar klubiga shayxlar yegalik qiladi, puldan muammo yo'q, «Man Siti» yeng ommabop liga ishtirokchisi va bu jamoa avvaldan Messini qo'lga kiritishni istab keladi.

Messi uchun ham «Manchester Siti»ga o'tish faoliyatidagi navbatdagi qadamga aylanishi mumkin. Bu jamoa faqat bir maqsadni ko'zlagan — Chempionlar ligasidagi g'alabani. Buning uchun «Manchester Siti»dagi vaziyat «PSJ»dagidan yaxshiroq, chunki APL Liga 1 bilan solishtirganda "og'irroq tosh bosadi".

Shuningdek, bu jamoani Messining sobiq ustozi Xosep Gvardiola boshqarayotganini ye'tiborga olish kerak. Pep «shaharliklar» jamoasi boshqaruvida birinchi mavsumni o'tkazmoqda va jamoasini qurish uchun o'z takliflari bilan chiqishi mumkin.

«Arsenal» (Angliya)

«Arsenal» varianti havodan olingandek ko'rinishi ham mumkin — «kanonirlar» hech qachon Messini sotib olishga qiziqish bildirmagan.

Lekin bu qiziqish umuman yo'qligini anglatmaydi. Shunchaki, «Arsenal» yetarli darajada selektsiya ishlarida ham, axborot masalasida ham o'ta yehtiyotkorlik bilan ish tutadi.

Agar jamoada o'z safiga Messini qo'shib olish varianti paydo bo'lsa, «gunnerlar»da bundan foydalanish uchun moliyaviy tomondan qudrat yetarli. Albatta, bu ro'y bersa «Arsenal» ancha vaqtgacha chiqim qilmasligi ham mumkin.

Lionel Messi «kanonirlar» safida paydo bo'lishi Arsen Vengerning o'yin uslubiga ko'p ham o'zgartirish olib kelmaydi ham. Yehtimol, aynan u jamoaga muxlislarini sovrin bilan xushnud qilishi uchun yetishmayotgandir?

MLS yoki Xitoy

Nazariy jihatdan bu variantlarni ham tashlab o'tib bo'lmaydi. Qolaversa, bugungi kunda ko'plab tajribali futbolchilar AQSh va Xitoyda ham futbol o'ynamoqda.

Arab davlatlari varianti yesa o'rinsiz, chunki, bu Xitoy variantidan ustun yemas. Hozirgi kunda Ochiq osmon ostidagi chempionat o'zida dunyo futboli yulduzlarini to'play boshlagan.

Xitoy futboli katta qadamlar tashlab rivojlanmoqda va bu ligada Lionel uchun jang olib bora oladigan bir qancha jamoalar mavjud. Shu bilan birga argentinalik futbolchini 30-31 yoshida Xitoyga borishga ko'ndirish deyarli ilojsiz ish.

Amerikaning MLS chempionati ham bir variant. Bu yerda ham bir talay yulduzlar to'p surmoqda. Qolaversa, Amerika sehrli diyor sifatida futbolchilarni o'z-o'zidan jalb yetishi mumkin.

Qachondir MLSda Krishtianu Ronaldu ham paydo bo'lishi mumkin. Ammo portugaliyalik futbolchi «Real» bilan shartnomasini 2021 yilgacha uzaytirdi, Messida yesa «Barselona» bilan 1,5 yillik shartnoma qolmoqda. 

Bu yerda «Nyu-York Siti»da Andrea Pirlo va Frenk Lempard, «Los-Anjeles Gelaksi»da Stiven Jerrard, «Nyu-York Red Bullz»da Rayt-Fillips, «Toronto»da Sebastyan Jovinko o'ynamoqda. Qaysidir jamoada yana bir mashhur futbolchi paydo bo'lishi mumkin.

«Nyuellz Old Boyz» (Argentina)

Messi bunga qadar bir necha marta  qachondir Argentinaga qaytishi va o'zining ilk jamoasi bo'lmish «Nyuellz Old Boyz» safida o'ynashini aytib o'tgan. U «Barselona»ga aynan shu jamoa safidan borgandi.

Hozirgi vaqtda bu variant haqida gapirish o'rinsiz, shu bilan birga bu variantni bir chetga surib qo'yib ham bo'lmaydi. Messi pulga muhtoj yemas, uni butun dunyo tan olib bo'lgan, 4 marta «Oltin to'p»ga yega bo'lgan.

Shuni ye'tiborda tutish kerakki, Ispaniya soliq organlari bilan muammolaridan charchagan Messi 2018 yilda chindan ham ketishi mumkin.

— deya xabar beradi Tribuna nashri.

Do`stlarbilan baxam ko`rish: