O'zbekiston termasi uchun hal qiluvchi damlar boshlanmoqda. Shu vaqtga qadar bosh jamoamiz biror marta JCh saralashining uchinchi bosqichida qolib ketmagan edi. Har doim so'nggi soniyalarga qadar mundial uchun kurashda ishtirok etganmiz.
Bu safargi saralashdan umidimiz katta, nihoyat, uzoq kutilgan jahon chempionati havosidan nafas olishga chog'lanmoqdamiz. Bu umidlar qay darajada davomiy bo'lishini esa hafta oxirida bilib olamiz. Samvel Babayan shogirdlari JCh saralashi doirasida Filippin va Bahraynga qarshi maydonga tushadilar va yaqin ikki yil uchun o'zbek futboli holatini belgilab berishlari lozim.
RAQIBLAR
Filippin va Bahrayn - bir qarashda u qadar jiddiy raqiblar emas. Har holda, Yaponiya va Avstraliyadan keskin farq qiladi. Boz ustiga, birinchi davrada ikkisini ham o'z maydonida yirik hisobda mag'lubiyatga uchratganmiz. Shunday ekan, Toshkentda kechadigan o'yinlarda xavotirga tushish ortiqchadek tuyulishi mumkin. Ammo vaziyat haqiqatan ham biz o'ylaganchalik osonmi?
Agar hozir raqiblarning jiddiyligi haqida so'z ochsak va bu bilan sizga yoqmasak, ma'zur tutasiz. Bu gaplarni podadan oldin chang chiqarish yoki vahima ko'tarish uchun emas, shunchaki, kelgusi o'yinlarga jiddiy qarash maqsadida aytmoqdamiz. Zero, «do'sting qancha ko'p bo'lsa ham kam, dushman qancha kam bo'lsa ham ko'p», degan naqlni ko'p eshitganmiz. Raqibni mensimaslik qanday og'ir oqibatlarga olib kelishini esa ko'p ko'rganmiz. Ishoning, Filippin va Bahrayn mensilmaydigan raqiblar sirasiga kirishmaydi va hozir buni imkon qadar asoslasak.
FILIPPIN
Filippinga qarshi safarda kechgan bahsda O'zbekiston milliy terma jamoasi yirik hisob(5:1)da g'alabaga erishgan. O'yinni ko'rmagan va bor ma'lumotni shunchaki, uchrashuv qaydnomasidan olgan inson uchun bu g'alaba oson qo'lga kiritilgandek tuyulishi mumkin. Ammo o'sha uchrashuvni yodga olsak, xulosa qanday bo'ladi?
Aslida, Maniladagi o'yinda O'zbekiston terma jamoasining yirik hisobdagi g'alabasida omadning ham katta hissasi bo'lgan edi. Yodingizdami, uchrashuv kuchli yomg'ir va noqulay ob-havo ostida kechgandi. OChL doirasidagi «Sepaxon» va «Lokomotiv» o'rtasidagi bahsni ko'rgan muxlislar bo'lsa, omad haqidagi gapni tasdiqlashlari mumkin. «Temiryo'lchilar» kuchli yomg'ir ostida o'tgan o'yinda hisobni ochishga muvaffaq bo'ldilar va «Sepaxon»ning vaziyatni o'nglash maqsadidagi urinishlari hech narsa keltirmadi. Sababi, bunday holatda hujum qilayotgan jamoa ancha noqulayliklarga duch keladi va ko'p kuch yo'qotadi. To'p maysa ustida dumalamay, ko'lmaklarda to'xtab qolavergach, yana qanday hujum haqida gap bo'lishi mumkin?
Filippinga qarshi kechgan bahsda ham deyarli shunga o'xshash holat ro'y bergan edi. Boz ustiga, ilk daqiqadayoq Odil Ahmedovning uzoqdan yo'llagan zarbasi golga aylangach, filippinliklar ancha gangib qoldilar va vaziyatni o'nglash uchun oldinga o'tganlari sari noqulay ob-havo ta'siri ostida yanada ko'proq qiyinchiliklarga duch keldilar. Oqibatda, raqib himoyasida uzilishlar paydo bo'ldi va biznikilar bu bo'shliqlardan ustalik bilan foydalandilar.
O'sha o'yin haqida Vitaliy Denisov shunday degan edi: «Men hali faoliyatim davomida bunday o'yin ko'rmaganman. Maydon ho'l bo'lgani etmagandek, tepilayotgan to'pning qaerga borib tushishini ham hech kim bilmas edi. Bu esa bizga qo'l keldi va raqib darvozaboni ikki marta uzoqdan berilgan zarbalarni qaytara olmadi...»
Xo'sh, Filippin darhaqiqat shunchalik oson raqibmi? Ochig'ini aytsak, biz bu fikrga qo'shilmagan bo'lar edik. Jamoa tarkibiga e'tibor qaratsangiz, Evropada to'p suradigan legionerlar borligini ko'rasiz. Mayli-da, quyi ligalarda bo'lsa ham, baribir, o'sha klublar saviyasi oliy ligamizdagi jamoalarnikidan kam emasdir. Bu esa javob o'yinida O'zbekiston terma jamoasi ancha hushyor turishi lozimligini bildiradi. Istardikki, futbolchilarimiz vaziyatga to'g'ri baho beradilar va ishonchli g'alaba bilan muxlislarni xursand qiladilar.
Davomi InterFUTBOL gazetasi blogida.
— deya xabar beradi uff.uz nashri.