Taqdir sinovlari beshafqat, hech kim qaerda va qaysi oilada tug'ilishi, qanday sharoitda ulg'ayishini oldindan bilmaydi. Qaerdadir tavallud topdingmi, demak o'sha maskanning muhitiga moslashishga majbursan. Kimdir qumloqlarda yalangoyoq kezadi, boshqalar esa konserva idishlar jarangini rohatlanib tinglashadi, yana ayrimlar to'qchilikda kun kechiradilar... Bugungi qahramonimiz Fabris Muambaning hayoti ham o'ziga xos tarzda kechganiga shubha yo'q.
ANGLIYaGA KO'ChIB O'TISh
Vaqt va joylashuv nuqtai nazaridan olib qaralganda, Fabris Muambani omadlilar qatoriga kiritsak bo'laveradi. 90-yillar, fuqarolik urushi, Kinshas shahri (hozirgi Kongo Demokratik Respublikasi poytaxti). Notinchlik avj olishidan avval Muambalar oilasi yaxshi sharoitda yashar, oilaboshi Klod hukumat vakillaridan biri sanalgani tufayli yosh Fabris muhtojlik ko'rmay o'sdi.
O'sha - hozirga qadar insoniyat tarixida eng ko'p qon to'kilgan, deya tilga olinadigan fuqarolik urushi deyarli besh yarim mingga yaqin insonning yostig'ini quritgan. Notinchlik tufayli Klod Muamba mamlakatdan qochishga majbur bo'lgan, Fabris esa onasi va uch nafar ukasi bilan qurolli to'qnashuvlar markazida qolib ketgan. Qahramonimiz o'sha yillarni eslarkan, chuqur xo'rsinadi:
- Yodimda, xotirjam futbol o'ynay olmasdik, daydi o'q kelib tegishidan hayiqardik. Bolalikdagi ayrim tengdoshlarimning jarohatlanishganiga guvoh bo'lganman.
Fabris otasi bilan yana bir bor uchrashguniga qadar oradan besh yil o'tdi. Klod Angliyadan qo'nim topib, keyinchalik turmush o'rtog'i va farzandlarini ham tumanli o'lkaga ko'chirib keldi. Muambalar oilasi Londondagi «Xitrou» aeroportiga qo'nishlari hamono qadrdon o'lkalardan noxush xabar keldi: Fabrisning Kinshasda qolgan tog'asi halok bo'lgandi. 11 yoshli bolakay o'sha payt­da vaziyatni idrok etish, keyinchalik qanday kun kechirishlarini taxmin qilishga ojiz edi. U inglizchasiga atigi bir-ikkita so'zni o'zlashtirgan, qarindoshlari bir necha ming kilometr yiroqda hayot uchun kurashishayotgan, atrofidagilar esa mutlaqo begonalardan iborat...
FAOLIYaTNING BOShLANIShI
Fabris ta'lim olishni boshlagan maktab «Uayt Xart Leyn» stadionining yonida joylashgani sababmi, bolakay futbolga mehr qo'ydi. 14 yoshida uni «Arsenal» jamoasiga qabul qilishdi, shunga qaramay, yosh sportchi o'qishni tashlamadi: Muamba sinfida hammadan yaxshi o'qirdi, vaqt o'tgani sari inglizchada erkin so'zlasha boshladi. Yosh «to'pchilar» safida o'tgan uch yildan so'ng Fabris to'laqonli shartnomaga ega bo'lib, katta futbol ta'mini totdi.
Yarim himoya markazida to'p surgani holda, Angliyaning barcha yoshdagi termalari tarkibiga qabul qilindi. Hattoki, 21 yoshlilar jamoasiga sardorlik ham qilgan. Patrik Vieyra iqtidorli Muambaning kumiri edi, shu bois, «Arsenal» libosini kiyish Fabris uchun ko'p narsani ang­latardi. Yosh futbolchi intervyularining birida u qadar mahoratli emasligi, shunchaki, futbol o'ynash imkoniyati tug'ilganidan xursand ekanini ta'kidlagandi. Keyinchalik zaxira o'rindig'ida qolib ketmaslik uchun Muamba dastlab «Birmingem» safiga qo'shildi va shu tariqa, o'yin amaliyotiga ega bo'ldi. So'ngra 5 million funt evaziga «Bolton»ga o'tib, ushbu klubning asosiy futbolchilaridan biriga aylandi.
Davomi InterFUTBOL gazetasi blogida.
— deya xabar beradi uff.uz nashri.