Xitoyning Kuinan shahri (Xitoy)da XXXI yozgi Olimpiada o'yinlarining yo'llanmalari uchun o'tkazilayotgan Osiyo va Okeaniya qo'shma litsenzion chempionatida og'ir vazndagi bokschimiz Bahodir Jalolov ham yarim finalda raqibini engib, “Rio-2016” o'yinlariga yo'llanma oldi.
Yarim final jangida eronlik Abdulmajid Sepaxvandiga qarshi bahs yuritgan Bahodir Jalolov raqibiga hech qanday imkoniyat qoldirmadi va katta ustunlik bilan g'alaba qozondi.
Shunday qilib, bugun ringga ko'tarilgan etti nafar bokschimizning barchasi navbatdagi g'alabalarni qo'lga kiritib, O'zbekiston boks maktabi dunyoda etakchilardan biri ekanligini amalda yana bir bora isbotladi.
Eslatib o'tamiz, bugun bo'lib o'tgan yarim final janglarida Yodgoroy Mirzaeva (-51 kg), Hasanboy Do'smatov (-49 kg), Shahobiddin Zoirov (-52 kg), Shaxram Giyasov (-69 kg), Elshod Rasulov (-81 kg), Rustam To'laganov (-91 kg) va Bahodir Jalolov (+91 kg) zafar quchib, Olimpiada o'yinlarining yo'llanmalariga sazovor bo'ldilar.
Shu tariqa, boks bo'yicha O'zbekiston erkaklar terma jamoasi joriy yil Rio-de-Janeyro shahri (Braziliya)da o'tkaziladigan XXXI yozgi Olimpiada o'yinlarida barcha vazn toifasida g'oliblik uchun ringga ko'tariladigan bo'ldilar. 
Xabarning to'liq qismi bilan ushbu havola orqali tanishib olishingiz mumkin.
— deya xabar beradi uff.uz nashri.