"Bunyodkor" klubi O'zbekiston Kubogi finalida 1:2 hisobida "Nasaf"ga mag'lub bo'ldi. Shu tariqa klubning omadsiz seriyasi davom etmoqda.
"Bunyodkor"ning sobiq bosh murabbiyi Sergey Lushchan iste'foga chiqarilib, jamoa ustozligi aslida bosh direktor lavozimida faoliyat yuritib kelgan Baxtiyor Boboev qo'l ostiga o'tgach, klub to'rt marta maydonga tushishga ulgurdi. Ushbu o'yinlardan faqat bittasida "qaldirg'ochlar" muvaffaqiyatga erishgan. Boboev boshqaruvidagi ilk uchrashuv Jizzaxning "So'g'diyona" klubiga qarshi o'tkazilgan va unda "Bunyodkor" o'z maydonida g'olib chiqqan edi (2:0). Biroq ushbu g'alaba hozircha klub uchun so'nggisi bo'lib turibdi.
Shundan buyon "Bunyodkor" Oliy liga doirasida "Mash'al"dan 2:3 hisobida mag'lubiyatga uchragan bo'lsa, "Dinamo" bilan durang o'ynagan (1:1).
Shuningdek O'zbekiston Kubogi finalida "Nasaf"ga qarshi kechgan uchrashuv ham 1:2 hisobida boy berildi. Shu tariqa klub Baxtiyor Boboev boshqaruvi ostida 4 ta o'yinda maydonga tushgan bo'lsa, bir g'alaba, bir durang va ikki mag'lubiyat qayd etgan.
— deya xabar beradi uff.uz nashri.