“Atletiko” Madrid futbolchilarining ko'zi bilan qaraymiz bugungi kunga. Demak, bugun taqvimda nima bor? Kim bilan o'yin ekan? O'h, “Betis”! Yomon jamoa emas, ammo engsa bo'ladi. Engib bo'lgach, bir ish bor, muhim ish.
“Las Palmas” ham chiroyli klub bo'lib boryapti, sezyapsizmi? Ularda ham bugun muhim bahs.  O'tgan oyning eng yaxshi murabbiyi boshchiligidagi klub “Valensiya”ni qabul qiladi va bu bellashuv ular uchun og'ir kechishi turgan gap. Biroq, ular ham o'yindan keyin to'planib olishadi. Ish bor.
Xullas, bugun El Klasiko kuni. Ochkolar o'rtasidagi tafovut kattarib ketgan bo'lsa-da, bu boshqa jihatdan o'z muhimligini saqlab qolaveradi. Bugun “Barselona” azaliy raqibi bo'lmish “Real”ni, Messi Ronalduni, Enrike Zidanni va kataloniyaliklar poytaxt ahlini qabul qiladigan
Birinchi davradagi o'yin haddan tashqari katta hisobda yakunlangan. Qirollik klubi chempiondan to'rtta gol qabul qilib olgan, javobiga esa ojiz qolgan edi. Mana shu mantiqdan kelib chiqsak, “Barsa” o'z uyida “Real”ni eb yuborishi kerak. Lekin “Nou Kamp” ahli biladiki, bo'lajak el klasikoni oldingi o'yin bilan o'lchab bo'lmaydi. O'tgan yilgi bahsga qarab mutlaqo xulosa chiqarib bo'lmasligini bu o'yin ishtirokchilari allaqachon bilib bo'lishgan. Biz ham shu fikrdamiz.
Bizning taxminimizga ko'ra, bugungi bahsda ochiq futbol namoyish etiladi. Nega deysizmi? Sababi, “Barselona” va “Real” turnir jadvalida yonma-yon emaslar. Farq kattaligi ham o'yinni asabiylikdan yiroqroq o'tishini ta'minlaydi.
Ikki jamoaning yo'qotadigan narsasi qolmagan. Deyarli. Kataloniyaliklar engilgan taqdirlarida ham, turnir jadvalida peshqadamlar. Ochkolar o'rtasidagi farq baribir salmoqli bo'lib qoladi. “Real” ham engilib qolishdan cho'chimaydi. Birinchidan, o'z uyida 0:4ga engilib bo'lgan. Muxlislari-da bu mag'lubiyatga tayyor turgan bo'lishlari ham mumkin. Ikkinchidan, chempionlik kurashidan umidini uzib bo'lgan “Real”. Faqat muxlislar uchun o'ynaydi. “Barsa”da ham shunaqa vaziyat. Faqat muxlislar uchun!
Kroyfning xotirasi uchun maxsus libosda tusharkan “Barselona”. Bundan ko'zlangan maqsad ham faqat futbol. Muxlislar va obro'.
Oxirgi paytda el klasiko o'yinlari og'ir kechayotgandi. Sababini aytdik. Bu ikki klub turnir jadvalida yonma-yon borishayotgan paytga to'g'ri kelib qolgandi bahslar. Bir-birini quvayotgan klublar o'rtasidagi o'yinlar esa ochiq va samimiy futboldan yiroq o'tadi. Bugungi o'yinni tomosha qilish kerak, azizlar! O'tkazib yubormaslik lozim!
Bunaqasi boshqa takrorlanmasligi mumkin. Bugun birinchi va ikkinchi o'rin o'rtasidagi o'yin emas. O'rtada boshqa klub ham bor. Darvoqe, “Atletiko” futbolchilari o'yindan keyin Madridning qaysi choyxonasida o'tirisharkin-a?!
Xayrulla Hamidov
— deya xabar beradi uff.uz nashri.