To'y qilib chaqirsam ham uncha-munchaga kelavermaydigan sinfdosh do'stlar o'tgan hafta Toshkentga yo'lga chiqadigan bo'lib qolishdi. «Filippin bilan bo'ladigan o'yinga chipta olib qo'y, jo'ra, - dedi qo'ng'iroq qilgan oshnalarimdan biri. - Yomg'ir yog'averib, dalada ish to'xtab qolgan. Shu bahona bir borib o'yin ko'rib kelaylik. Lekin-chi, olganda ham o'rtaroqdan, yaxshi joydan ol chiptani. Yana Jizzaxday joydan yo'l bosib borib, darvozaning orqasida ko'rmaylik o'yinni». Oyda-yilda bir bo'ladigan iltimosga yo'q deb bo'larmidi, men ham va'da berib yubordim. Ammo va'da berishga berdim-u...
Qurg'ur bu chipta degani otliqqa yo'g'u, men qaerdan topaman. Yana markaziy sektordan. Nachora, tavakkal qilib vaziyatni surishtirishga tushdim. Har holda, hali o'yin bo'lishiga to'rt kun bor, topilib qolar. Ammo o'ylaganimdek «Bunyodkor» kassalarida markaziy sektorlarga chipta yo'q ekan. «Faqat yon tomondagi va darvozaning orqasidagi sektorlarga chipta bor. Markaziy sektorlarga sotmayapmiz», degan javobni oldim. Mendan keyin navbatda turgan muxlislardan biri norozi ohangda to'ng'illadi - «Qachon sotgansizlar o'zi...?»
Xullas, o'sha kuni chipta olmaslikka qaror qildim. Bizga tushuntirishlaricha, markaziy sektorlarga chiptalar viloyat federatsiyalari va boshqa rasmiy tashkilotlarga tarqatilgan ekan. Bu esa kassada ham sotilib qolishiga umid uyg'onishiga sabab bo'ldi. Balki o'yinga yaqin qolganda «viloyat federatsiyalari va boshqa rasmiy tashkilotlar»dan ort­gan chiptalar kassaga ham chiqib qolar, degan o'yda ortga qaytdim. O'sha atrofda ishlaydigan tanishlar bilan qo'ng'iroqlashib turadigan bo'ldim, mabodo, chipta bo'lsa, bexabar qolmaylik...
Biroq bexabar qolmadik. Chunki xabarning o'zi bo'lmadi. Nihoyat, o'yinoldi matbuot anjumani o'tkaziladigan kun ham keldi. Ertaga o'yin degan kuni Filippin va O'zbekiston terma jamoalari bosh murabbiylari bilan bo'ladigan tadbirda ishtirok etdik. Yo'l-yo'lakay kassa tomonga mo'ralab ham qo'ydik - ahvol o'sha-o'sha, markaziy sektorlarga chipta yo'q.
Matbuot anjumani o'tgach, «Bunyodkor» stadioni xodimlari bilan olib borilgan «muzokara» ham ish bermadi. Aksincha, ular menga kechikmasdan borib, darhol darvoza ortiga bo'lsa ham chipta sotib olishni maslahat berishdi. «Bir-ikki soatda u ham tugaydi, chiptasiz qolib ketasiz», deyishdi jiddiy qiyofada. Bu safar ularning maslahatiga quloq soldim. Axir Jizzaxday joydan keladigan jo'ralarim shunchaki, park­da sayr qilib keta olmaydi-ku, stadionga kirmasa bo'lmas...
Uch kunlik sarson-sargardonlikka sabab bo'lgan asl voqelikni nihoyat, kassaga yaqinlashgach aniq ko'rdim. Chiptaxona tomon jadal qadamlar bilan ketarkanman, juda ham xushmuomala yigit oldimdan chiqdi: «Aka, chipta kerak emasmi?»  Yo'q, dedim-u, o'tib ketdim. Bunaqalarni ko'p ko'rganman, «olib-sotar», deysizmi, «chiptafurush» yoki «chayqovchi», ixtiyor o'zingizda. Ularda chiptaning har turidan bo'ladi, ammo men ulardan chipta tugul gugurt cho'pi olishni ham istamayman. Chunki muxlislarga zulm qilib, ularning hisobiga pul ishlaydiganlarning tegirmoniga suv qo'yish niyatim yo'q. Hatto, o'z narxidan arzoniga bersa ham olmayman. Chunki unaqalar faqat «moli» o'tmay qolganda ketganiga beradi-yu, keyingi safar anshlag bo'ladigan o'yin­dan chiqarib oladi. Xullas, «pishirib» esin chiptasini...
Kassaga borganimda faqat 8-D sektorida joy qolganini aytishdi. Qolganda ham faqat eng yuqori qatordan. Nachora, sotib oldim. Qiziq tomoni, men chipta olyapman-u, yonimda uch-to'rt nafar olib-sotar, balki markaziy sektorga chipta kerak, deb qolar, degandek mo'ltirab turibdi. Faqat chiptani olib, pulini sanab berib bo'lganimdan ke­yin bechoralarning umidi uzildi. Ma'lumot o'rnida aytib qo'yay, darvoza ortidagi sektorlarga chipta kassada 15 ming so'mdan sotildi. Aytishlaricha, o'rtadagi sektorlarning narxi 20 ming so'm ekan. Ammo bu gapni shaxsan o'zim tasdiqlay olmayman, chunki o'sha chiptalar kassada sotilganini ko'rmadim.
Eng qiziq voqea o'yin kuni sodir bo'ldi. Gapning indallosi shuki, erta tongda do'stlardan qo'ng'iroq bo'ldi - chipta zormandadan yana bitta kerak ekan. Jo'ralardan biri safga qo'shilibdi. «Mayli, darvozaning orqasidan bo'lsa ham. Faqat o'sha sektordan yana bitta chipta top, birga o'tirib ko'raylik o'yinni...» Ammo endi bu iltimosga «ha», deya olmas edim. Chunki kassalarning barchasi o'yindan bir kun oldin yopilib bo'lgan. Eng oxirgilardan bo'lib o'zim chipta olgach, yopilmasinmi? Xullas, ish chala qoldi.
Bu muammoni jo'ralarning o'zlari hal qilishdi. O'sha bitta chipta tezda topila qoldi. O'yin bo'ladigan kuni olib-sotar «shovvozlar» tezda 8-D sektorga joy topib berishdi. Narxi - 25 ming so'm. Ortig'i ko'tarmas emish, o'zlari 20 mingdan olishibdi. Ammo qaerdan, kimdan olishganini aniq aytishmadi, chamamda, «korporativ sir» bo'lsa kerak. Bu hali hech narsa emas, o'sha men kassada ko'rmagan markaziy sektor chiptalari ularning qo'lida dasta-dasta bor edi, faqat narxi - 50 ming so'm.
Davomi InterFUTBOL gazetasi blogida.
— deya xabar beradi uff.uz nashri.