Seshanba kuni futzal bo'yicha O'zbekiston XX milliy chempionati oliy ligasida 4-tur uchrashuvlari yakunlandi. Ushbu bosqichning so'nggi kunida mamlakatimizning ikki etakchi klubi o'zaro to'qnash keldi.
«Olmaliq» amaldagi O'zbekiston chempioni bo'lsa, «Ardus» 48 ochko bilan peshqadamlik qilayotgandi. Markaziy uchrashuv biroz kutilmagan natija bilan yakunlandi. Jami 8ta gol urilgan o'yinda «Olmaliq»lik futzalchilar 5:3 hisobida zafar quchishdi. Jamoliddin Sharipov, Javlon Anorov, G'ulom Mamajonov, Andrey Shlyoma, Sunnat Kuralov kiritgan to'plarga poytaxtlik futzalchilardan Dilshod Irsaliev (2ta) va Farhod Abdumavlonov javob berishdi. Bu muhim g'alabadan so'ng Aleksandr Petrov shogirdlari ochkolar hisobi bo'yicha «Ardus»ga tenglashib olishdi. O'zaro o'yinlardagi ikki g'alaba «Olmaliq»ni karvonboshiga aylantirdi. Biz uchrashuvdan so'ng «Olmaliq» bosh murabbiyi Aleksandr Petrovdan intervyu oldik.
- Aleksandr Gennadevich, avvalo, muhim o'yindagi chiroyli g'alaba bilan tabriklayman. Bu bilan chempionat peshqadamiga aylanib oldinglar. G'alaba nimaning evaziga keldi, deb o'ylaysiz?
- Tabrik uchun rahmat. Albatta, bugun juda muhim g'alabani qo'lga kiritdik. Ikkita teng kuchli jamoalar o'rtasidagi o'yinda zafar quchganimizdan xursandman. Har ikki klub tarkibida milliy terma jamoa a'zolari to'p surishadi. Bu o'yinga bo'lgan qiziqishni yanada oshirdi. O'ylaymanki, bahs majmuaga kelgan muxlislarga ham yoqdi. Darvozalarga etarlicha gollar urildi. Umuman olganda, bugungi uchrashuvda hamma narsa bo'ldi - gollar, sariq kartochkalar, chetlatishlar, asabbuzarliklar. Bu markaziy o'yinlarda bo'ladigan holat. Fursatdan foydalanib, muxlislarga va bugungi bahsga alohida ishtiyoq bilan tayyorgarlik ko'rgan futzalchilarimga minnatdorchilik bildiraman. Biz chempionlik unvonimizni himoya qilyapmiz. Guvohi bo'layotganingizdek, bu jarayon oson kechmayapti.
- «Ardus» jamoasining o'yini haqida nima deya olasiz?
- Menimcha, bugun biz «Ardus»ga qaraganda yuzaga keltirilgan vaziyatlardan unumliroq foydalana oldik. G'alabamizning asosiy omili ham shu. Yigitlardagi g'alabaga bo'lgan ishtiyoq bizda kuchlilik qildi. «Ardus» futzalchilari esa qulay vaziyatlardan samarali foydalanishda biroz oqsashdi. Bunday holatlar bo'lib turadi. Bugun «Ardus»da shunday holat kuzatildi, ertaga esa bizda ham bu jarayon qaytarilishi mumkin.
- «Olmaliq»qa bugun omad kulib boqdi, deya olasizmi?
- Bilasizmi, omad shunchaki kelavermaydi. Unga intilish kerak. Bugun yigitlar ko'rsatmalarni to'liq bajarishdi. Shu o'rinda bir narsani aytishim kerak, «Ardus» deyarli teng kuchli ikki tarkibga ega. Ikkinchi to'rtlik ham maydonga tushib, jamoa o'yinini kuchaytira oladi. Bizda esa bunday emas. Bugun ikkinchi bo'limda himoyaviy taktika asosida, biroz ehtiyot bo'lib harakat qildik. Bu esa o'z mevasini berdi.
- Xitoy chempionatida o'ynab qaytgan Shuhrat Tojiboev bilan shartnoma imzoladinglar. Uni qachon maydonda ko'ramiz?
- Shu kunlarda uning sertifikati kelishini intiqlik bilan kutyapmiz. Shundan so'ng Tojiboevni maydonda ko'rasizlar. Shuhratni yaqindan yaxshi bilaman. Juda tajribali futzalchi. Oldin qo'l ostimda o'ynagan. Chempionat va kubok o'yinlariga qo'shimcha ro'yxatdan o'tkazdik. O'ylaymanki, tez kunda bu masala ijobiy hal bo'ladi. Uning klublar o'rtasidagi Osiyo chempionatida jamoamizga foyda keltirishiga umid qilyapman.
- Bu musobaqaga tayyorgarlik qachondan boshlanadi?
- Klublar o'rtasidagi Osiyo chempionati 15 iyul kuni boshlanishi belgilab qo'yilgan. O'sha musobaqa oldidan tarkibimizda sezilarli o'zgarish bo'ladi. «Ardus» tarkibida to'p surayotgan milliy terma jamoaga nomzod o'yinchilarni ham safimizga qo'shib olishni maqsad qilganmiz. Qolaversa, bir-ikki nafar xorijlik legioner futzalchi bilan ham shartnoma imzolash niyatidamiz. Yaqinda Toshkentda bo'lib o'tgan Osiyo chempionatida terma jamoamiz ajoyib o'yin ko'rsatdi. Tarixda ilk bor JCh yo'llanmasini qo'lga kiritdik. Terma jamoalar miqyosidagi ana shunday muvaffaqiyatli ishtirokdan so'ng bizdan barcha ijobiy natija kutishi aniq. Buni juda yaxshi tushunib turibmiz. Shu maqsadda, klublar o'rtasidagi Osiyo chempionatiga kuchaytirilgan tarkibda bormoqchimiz. Nafaqat terma jamoamiz, balki klubimiz ham qit'ada kuchli ekanligini isbotlamoqchimiz.
- To'rtinchi tur uchrashuvlari yakunlandi. Ushbu tur o'yinlaridan umumiy xulosalaringiz qanday bo'ldi?
- Tur o'yinlari boshlanishidan oldin asosiy kurash «Ardus» bilan kechishi aniq edi. So'nggi kungacha biz ham, ular ham barcha raqiblarni mag'lub etdik. O'zaro o'yinimizda esa biz juda muhim g'alabaga erishdik. Lekin hali hammasi oldinda. «Pley-off» bosqichida kutilmagan natijalar bo'lmaydi, deb hech kim ayta olmaydi. Har bir uchrashuvga alohida tayyorgarlik bilan chiqamiz. Bilasizmi, bu tur o'yinlari avvalgilaridan farq qildi. Uchta tur o'yinlarida futzalchilardagi charchoq alomatlari sezilib qoldi. Chunki terma jamoamiz Osiyo chempionatiga tayyorgarlik ko'rayotgan, terma jamoaga nomzod futzalchilar ushbu yig'inlar va uning doirasidagi o'rtoqlik uchrashuvlarida katta kuch yo'qotishgandi. Bu esa chempionat o'yinlarida ko'zga tashlanib qoldi. To'rtinchi turda esa ancha keskin futzalga guvoh bo'ldik. Osiyo chempionatidan so'ng yigitlar etarlicha hordiq chiqarib olishdi.
Davomi InterFUTBOL gazetasi saytida.
— deya xabar beradi uff.uz nashri.