Ha, yaqin-yaqingacha «PSJ» tarixidagi eng yaxshi to'purar sanalgan portugaliyalik sobiq hujumchi shunday fikrda. Shvetsiyalik novcha goleador 4 oktyabr kuni «Marsel» darvozasiga belgilangan 2ta penaltini bexato bajarib, Pedro Pauletaning 109ta goldan iborat rekordini qulatdi. 2:1 hisobida yakunlangan o'yindan so'ng esa, L~Equipe nashri sobiq rekordchiga aylangan portugaliyalik yulduzdan intervyu  olishni paysalga solmadi.
- Mana, rekordingiz yangilandi. Bu siz uchun unchalik yoqimli xabar bo'lmasa kerak.
- Nega, aksincha, juda xursandman. Chunonchi, barcha rekordlarim vaqti kelib, kimdir tomonidan yangilanishini tushunardim. Qarang, buyuk futbolchi, buyuk hujumchi Ibragimovich buning uddasidan chiqdi. Umuman, aynan uning yangi cho'qqi hosil qilganidan xursandman. Axir Ibra jahondagi eng buyuk 3 yoki 4 nafar futbolchidan biridir.
- Qiziq, agar Ibra «PSJ» bu qadar kuchli bo'lmagan o'sha sizning davringizda o'ynaganida, nechta gol ura olardi?
- Albatta, yuqori saviyali futbolchilar bilan kuchli klubda to'p sursang, ko'proq gol urish imkoniyatiga ega bo'lasan. Lekin shubha yo'q, Zlatanning o'zi alohida o'rin tutadi - u ulkan iqtidor sohibi. Mubolag'a emas, «PSJ» aynan uning gollari tufayli Evropaning etakchi klublari qatoriga qo'shildi. Xullas, Parij jamoasining yuksalishida uning xizmatlari beqiyos. To'g'ri, shuning barobarida tan olaman, vaqt masalasida omad menga nisbatan Zlatanga ko'proq kulib boqdi...
- Ibragimovich «PSJ» bilan shartnoma tuzgach, ehtimol, «U mening rekordimni yangilaydi» qabilida o'ylagandirsiz...
- Bunday hissiyot menga begona emas. Ya'ni Ronaldudan shunday natija kutgandim va adashmadim («Real» etakchisi 2 yilcha oldin Pedro Pauletaning Portugaliya terma jamoasida gol urish bo'yicha o'rnatgan rekordini yangiladi - 47ta). Xullas, bunday miqyosdagi futbolchi chiqishi bilan endi hech narsa senga bog'liq emasligini darhol tushunasan.
- Agar imkon bo'lganida, Ibragimovich bilan bitta jamoada o'ynay olarmidingiz?
- Nega endi o'ynolmas ekanman? Ehtimol, g'oyat effektli tandem hosil qilarmidik... Axir biz turli uslublarda to'p suradigan hujumchilarmiz-ku.
- Ibraning ustunlik jihati nima?
- U jismonan juda baquvvat. Yana texnikasi mukammal. Bunday bo'y va vazni og'ir futbolchining texnikasi ham zo'r bo'lishi kam uchraydigan holat. Deylik, men sof hujumchi rolini bajarardim va faqat oxirgi zarbani kutardim. Xullas, vazifam gol urishdan iborat edi, xolos. Ibra esa, zarur bo'lsa, orqaga qaytadi, kombinatsiyalarda faolroq ishtirok etadi. Bu masalada bizni o'zaro taqqoslash shunchaki, ilojsiz.
Davomi InterFUTBOL gazetasi blogida.
— deya xabar beradi uff.uz nashri.