Xitoyning Kuinan shahri (Xitoy)da boks bo'yicha XXXI yozgi Olimpiada o'yinlarining yo'llanmalari uchun o'tkazilgan Osiyo va Okeaniya qo'shma litsenzion chempionatida muvaffaqiyatli ishtirok etgan O'zbekiston terma jamoasi a'zolari Vatanimizga qaytib keldilar.
Toshkent xalqaro aeroportida mardonavor sportchilarimizni O'zbekiston Milliy olimpiya qo'mitasi, Madaniyat va sport ishlari vazirligi, Respublika boks federatsiyasi rahbariyati, sportchilarning oila a'zolari, jamoadosh do'stlari, OAV xodimlari kutib oldilar.
Ikki qit'aning jami 35 davlati vakillari ishtirokida bo'lib o'tgan mazkur musobaqada O'zbekiston terma jamoasi a'zolari 5 ta oltin va 2 ta kumush medalni qo'lga kiritib, umumjamoa hisobida birinchi o'rinni egallashdi. Uchtadan oltin va kumush hamda 1 ta bronza medaliga sazovor bo'lgan Xitoy termasi ikkinchi, 3 ta oltin, 2 ta kumush, 2 ta bronza medal bilan Qozog'iston termasi uchinchi o'rinni band etdi.
E'tiborlisi, finalga qadar etib kelgan 7 nafar bokschimiz “Rio-2016” o'yinlarining yo'llanmalarini ham qo'lga kiritdilar.
Eslatib o'tamiz, Osiyo va Okeaniya qo'shma litsenzion chempionatida hamyurtlarimizdan Yodgoroy Mirzaeva (-51 kg), Hasanboy Do'smatov (-49 kg), Shahobiddin Zoirov (-52 kg), Shaxram Giyasov (-69 kg), Elshod Rasulov (-81 kg), Rustam To'laganov (-91 kg) va Bahodir Jalolov (+91 kg) XXXI yozgi Olimpiada o'yinlariga yo'llanmalarni qo'lga kiritdilar. Ushbu muvaffaqiyatdan so'ng, boks bo'yicha O'zbekiston erkaklar terma jamoasi “Rio-2016” Olimpiada o'yinlarida barcha vazn toifasida g'oliblik uchun ringga ko'tariladigan bo'ldilar.
Maqolaning to'liq qismi bilan quyidagi havola orqali tanishib olishingiz mumkin...
— deya xabar beradi uff.uz nashri.