2 oy muddatga safdan chiqqan Jerom Boateng maydonga qaytish onlarini sabrsizlik bilan kutyapti. U hattoki, salomatligini xavf ostida qoldirib, tavakkal qilishga ham tayyor. «Bavariya» futbolchisi yaqinda bundesliga.com portaliga intervyu berib, shu haqda so'zladi. Shuningdek, klubining mavsum finishiga doir maqsadlari, AQSh bo'ylab chiqiladigan yozgi turne va jarohatlangan futbolchilar vaqtni qanday o'tkazishlari xususida ham to'xtaldi.
- Mana, yana mashg'ulotlarga kirishdingiz - bu yaxshilik alomati. Hozirda o'zingizni qanday his qilyapsiz?
- Nolishga asos yo'q, hammasi yaxshi. Tiklanish jarayoni reja bo'yicha davom etyapti va ijobiy o'zgarishlar bor. Deylik, ayni payt kuniga ikki mahal mashg'ulot o'tashga chidayapman. Albatta, shoshilish yaramaydi, ya'ni barchasini asta-sekin amalga oshirib borish maqsadga muvofiq. Asosiysi, umumiy holatim kun sayin yaxshilanyapti.
- Xo'sh, qaytish onlarini sabr bilan kutyapsizmi yoki o'zingizni qo'lga olishingiz qiyin kechyapti?
- Ikkinchi variant to'g'riroq - sabrim chidamayapti. Eh, kutish buncha og'ir-a?! O'zimga qolsa, hoziroq maydonga tushishni istayman.
- Demak, televizor orqali futbol tomosha qilishga xushingiz yo'q, shundaymi?
- Qo'ying, buni so'ramang. Televizorda futbol ko'rishga asabim dosh bermaydi. Bunday vaqtda men bilan birga o'tirgan hamrohimdan katta jasorat talab etiladi. Xullas, o'zim ishtirok etmaydigan o'yinlarni tomosha qilish men uchun azobning o'zginasi. Hattoki, maydonda ham televizor qarshisi yoki tribunadagidek siqilib-kuyunmayman. Bu borada o'zgarmasam bo'lmaydi, lekin hozircha qo'limdan hech narsa kelmayapti.
- Bu gaplaringiz deylik, terma jamoaning o'rtoqlik o'yinlariga ham tegishlimi?
- Albatta, biroq rasmiy o'yinlar bosimi baribir, ancha baland. Aslida terma jamoamiz uchrashuvlarini ham televizorda ko'rishni yoqtirmayman, ammo yigitlarimiz uchun doimo musht tugib o'tiraman.
- To'laqonli mashg'ulotlar va maydonga qaytishingiz masalasida aniq bir reja, ya'ni muddat bormi?
- Tiklanish jarayonida o'ta ehtiyotkor bo'lish lozim, lekin umid qilamanki, 3-4 hafta ichida to'liq tuzalaman.
- Agar shunday bo'lsa, Germaniya kubogi va Chempionlar Ligasida o'ynashingiz, qolaversa, «Bavariya»ga ketma-ket 4-marta bundesliga g'olibligini qo'lga kiritishida yordam berishingiz mumkin.
- Bundesligada yana 1-o'rinni olish imkoniyatimiz ancha baland. Asosiy maqsadimiz shu. Tabiiyki, ChLda ham imkon qadar uzoqroqqa borishni xohlaymiz, loaqal yarim finalga chiqishimiz shart. Asosiy o'yinlar vaqtigacha safga qaytishdan umidvorman. Fakt shuki, ChL - «Bavariya» uchun juda muhim turnir. Doimgidek, albatta.
- Sizni nafaqat «Bavariya» klubi, balki Germaniya termasining ham almashtirilmas futbolchisi sifatida ta'riflashadi. Xullas, jahon saviyasidagi o'yinchiga aylandingiz...
- Bu borada bahslashmayman, e'tirof menga ma'qul.
- Bunday muvaffaqiyatlarga qanday erishdingiz?
- Shunchaki, maydonda xotirjamlikni saqlab qolishga urinaman va bu vaziyatlarda to'g'ri yo'l tanlashimga imkon beradi. Shuningdek, mudom o'z o'yinimni tahlil etib, xatolarim ustida ishlashni kanda qilmayman. Bilasiz, zamonaviy futbolda himoyachi faqat orqada o'ynash bilan cheklanmasligi kerak, garchi bu hamon uning asosiy vazifasi sanalsada. Endilikda himoyachilardan jamoa hujumida ham faol ishtirok etish talab qilinmoqdaki, har kim bunga o'zini muvofiqlashtirib borishi zarur.
Davomi InterFUTBOL gazetasi blogida.
— deya xabar beradi uff.uz nashri.