Oliy liganing 4-turida ham bir qator murosasiz bahslar guvohiga aylandik. Ayniqsa, Toshkent va Jizzaxda bo'lib o'tgan o'yinlar so'nggi soniyalargacha muxlislarni hayajonda ushlab turdi. Tabiiyki, mazkur uchrashuvlarda faollik borasida boshqa sheriklaridan ajralib turganlar ham bo'ldi. So'nggi turdan keyin tuzilgan ramziy terma jamoada aynan o'sha futbolchilar nomiga murojaat etdik.
Darvozabon:
Sanjar Quvvatov («Nasaf»). 4-turning markaziy o'yinida «Nasaf» posboni bir nechta vaziyatlarda jamoasi joniga oro kirdi. «Paxtakor»ga qarshi kechgan murosasiz bahsda Sanjar Quvvatov favqulodda holatlarda Eldor Suyunovning o'rnini bemalol egallashi mumkinligini amalda isbotladi.
Himoyachilar:
Jamshid Boltaboev («Paxtakor»). O'smirlar va yoshlar termasidagi o'yinlari orqali tanilgan iqtidorli futbolchi asta-sekin formasini tiklayotgani quvonarli, albatta. «Paxtakor» stadionida bo'lib o'tgan bahsda Boltaboevning faolligi tufayli «Nasaf»ning bir nechta hujumlari to'xtab qoldi. Natijada, Jamshid uchrashuv yakunlangach, mezbonlar safidagi eng yaxshi o'yinchi nomiga loyiq ko'rildi.
Islom To'xtaxo'jaev («Lokomotiv»). Bugungi «Lokomotiv»ni bu futbolchisiz tasavvur qilish qiyin. Har bir vaziyatda tish-tirnog'i bilan kurashadigan himoyachi Jizzaxdagi bahsda haqiqiy etakchilarga xos tarzda harakat qildi. Shu kuni ajoyib o'yin ko'rsatgan «So'g'diyona» futbolchilari g'alabaga erishishlari ham mumkin edi. Ammo To'xtaxo'jaev boshchiligidagi himoya chizig'i vakillari bunga yo'l qo'yishmadi.
Murod Xolmuhammedov («So'g'diyona»). Umuman, «So'g'diyona» va «Lokomotiv» jamoalari o'rtasidagi bahsda aynan mudofaa vakillari nisbatan faolroq ko'rindilar. Ayniqsa, mezbonlar sardori Murod Xolmuhammedov «Loko» hujumchilarining erkin o'ynashlariga to'sqinlik qila oldi. Bundan tashqari, iqtidorli himoyachi jamoasining yagona goli muallifiga aylandi va haqli ravishda uchrashuvning eng yaxshi futbolchilaridan biri sifatida e'tirof etildi.
Yarim himoyachilar:
Ilhom Yunusov («Qizilqum»). Har bir o'yinda jamoasini g'alaba sari ilhomlantira olayotgan Ilhom Yunusov 4-turdan keyin to'purarlar bahsida etakchilik qilmoqda. To'g'ri, u gollarining asosiy qismini penaltidan urmoqda, ammo 11 metrli jarima zarbasini eplab amalga oshirolmayotganlarning tez-tez uchrayotganini inobatga olsak, «Qizilqum» yarim himoyachisi o'z jamoasi manfaati yo'lida nechog'li ulkan ahamiyat kasb etayotgani ayon bo'ladi.
Salamat Qutiboev («Buxoro»). Ko'hna shaharliklar vodiyda qiyin uchrashuv o'tkazishdi. «Qo'qon-1912» o'z uyida istalgan jamoaga «boshog'riq» bo'la olishi ko'pchilikka ma'lum. «Buxoro» bilan o'yinda ham Murod Ismoilov shogirdlari raqiblariga keskin kurash taklif etishdi. Ammo shu kuni omad buxoroliklarga kulib boqdi. Aynan Salamat Qutiboevning goli mehmonlarga g'alaba keltirdi.
Alisher Shog'ulomov («Andijon»). Baxtiyor Ashurmatov shogirdlari «Vodiy derbisi»da dastlab o'z darvozalaridan to'p o'tkazib yuborishgandi. Ammo Alisher Shog'ulomov urgan gol maydon egalaridagi g'alabaga bo'lgan ishonchni orttirib yuborgandek tuyuldi. Qolgan vaziyatlarda omadini raqib darvozasi oldida izlagan «Andijon» yakunda 3 ochkoni qo'lga kiritdi.
Sato Minori («Bunyodkor»). Yaponiyalik yarim himoyachi G'uzorda kechgan bahsda har doimgidek faollik ko'rsatdi. U nafaqat pleymeykerlik, balki to'purarlik salohiyatini ham namoyish eta oldi. Sato Minorining goli yakunda «Bunyodkor»ning «Sho'rtan maydonidan kichik hisobdagi, ammo o'ta muhim g'alaba bilan qaytishini ta'minladi.
Davomi InterFUTBOL gazetasi blogida.
— deya xabar beradi uff.uz nashri.