O'zbekiston terma jamoasi Kolumbiyada bo'lib o'tadigan Jahon chempionatiga tayyorgarlikning dastlabki bosqichini davom ettirmoqda. Xose Mariya Mendez shogirdlari xalqaro o'rtoqlik turnirida ishtirok etish uchun Yaponiyaga uchib ketish oldidan bugun so'nggi mashg'ulotni o'tkazdi. "Bunyodkor" jamoasi sport zalida o'tkazilgan mashg'ulotda barcha futzalchilar ishtirok etdi. Yaponiyaga esa yig'inga chaqirilgan 20 nafar futzalchidan 14 nafari yo'l oladi. Terma jamoa delegatsiyasi 20 aprel kuni 10:00 da Toshkent - Bangkok - Nagoya yo'nalishida "Kunchiqar yurt"ga uchib ketadi. Eslatib o'tamiz, Yaponiyadagi turnir 22-24 aprel kunlari bo'lib o'tadi. Unda mezbonlardan tashqari, O'zbekiston hamda Vetnam milliy terma jamoalari ham ishtirok etishadi.
— deya xabar beradi uff.uz nashri.