2016 yili Evropa milliy terma jamoalarida o'ynagan 10 nafar eng yosh futbolchi. Xalqaro maydonda o'z mamlakati bosh jamoasi sharafini himoya qilish har bir futbolchi uchun katta sharafdir. Bunday baxt hammaga ham nasib etavermaydi.
Shu ma'noda aytsak, juda yoshligidayoq milliy jamoa libosini kiyishga loyiq topilgan yigitcha o'zini ikki hissa baxtiyor his etishga haqli. Masalaning yana bir tomoni borki, shu sababdan, erta kunda mamlakat sha'ni uchun to'p surish mas'uliyatini o'z zimmasiga olgan futbolchiga vunderkind nisbatini bemalol ishlatish mumkin. Axir stadiondagi minglab va teleekranlar qarshisidagi millionlab muxlislar nigohi ostida to'p surishning o'zi bo'ladimi? Boz ustiga, o'rtada vatan futbolining manfaatlari turganida. Xullas, bu juda og'ir yuk...
Mattias Kyayt
Estoniya
1998 yil 29 iyunda tug'ilgan
Klubi: «Fulxem» U-21
(Angliya)
Ampluasi: yarim himoyachi
Estoniyalik iqtidor egasi 2014 yili «Levadiya» akademiyasini tark etib, «Fulxem» bilan shartnoma tuzdi. Londonda 3 yillik kelishuv asosida o'ynayotgan Mattias har ikki qanotda birdek ishonchli harakatlanmoqda. Deylik, joriy mavsum «Blekbern», «Aston Villa» va «Brayton» yoshlar jamoalari bilan o'yinlarda o'z hisobiga gol yozib qo'ydi. Yanvar oyida esa Estoniya bosh jamoasi tarkibida shvedlarga qarshi o'tkazilgan o'rtoqlik o'yinida butun bir bo'lim to'p surdi.
Vinsent Till
Lyuksemburg
2000 yil 4 fevraldatug'ilgan
Klubi: «Mets» V (Frantsiya)
Ampluasi: yarim himoyachi
Vinsent 12 yoshligidan buyon «Mets» klubi tizimida. O'spirin yigitcha joriy yil fevralda 16 yoshga to'ldi va martga kelib, Lyuksemburg bosh jamoasida debyut qildi (Bosniya termasiga qarshi o'rtoqlik o'yinida). U ayni payt «Mets» yoshlar jamoasida asosiy yulduz sanaladi. Harqalay, klubdagilarning Tilldan umidlari katta va uning kelajakda loaqal «Mets»ning yana bir tarbiyalanuvchisi, Lyuksemburg yoshlar termasi sobiq vakili Miralem Pyanich darajasiga chiqishiga ishonmoqdalar.
Bartosh Kapustka
Polsha
1996 yil 23 dekabrdatug'ilgan
Klubi: «Krakoviya»
Ampluasi: yarim himoyachi
Universal yarim himoyachi. Oxirgi vaqtlarda unga ko'proq chap qanotda ishonch bildirmoqdalar, garchi o'ng taraf va markazda ham birdek harakatlanishga qodir bo'lsada. Zero, Bartosh kattalar futbolidagi debyutini mavsum-2013|2014dayoq nishonlagandi. Yigitcha o'tgan chempionat davomida mahalliy «Krakoviya» klubi safida 20 martadan ko'proq maydonga tushdi va shuning barobarida tajribali jamoadoshlari havasini uyg'otadigan darajada faollik ko'rsatdi. E'tibor qarating, Bartosh liga doirasidagi 24ta o'yinda 4ta gol urish barobarida yana 9tasiga assistentlik qilishni uddaladi. Qolaversa, Polsha milliy jamoasi libosini ilk marta o'tgan yilning kuzida egniga olgan Kapustka Gibraltar va Islandiya termalari darvozasini ishg'ol ham qildi. Transfermarkt.de sayti ayni payt uning transferini 1,5 million evroga baholayapti. Agarda Bartosh Evro-2016 «zayavka»siga kirsa, tabiiyki, uning narxi ancha ko'tariladi.
Breel Embolo
Shveytsariya
1997 yil 14 fevraldatug'ilgan
Klubi: «Bazel»
Ampluasi: hujumchi
Ajdodlari Kamerunga borib taqaladigan baquvvat hujumchi Evropa futbol ommasiga o'tgan mavsum tanilgandi. Chunonchi, u barcha turnirlar hisobidan 17ta gol urdi, xususan, ChL guruh bosqichida  «Ludogorets» darvozabonini ranjitdi. To'g'ri, Embolo endilikda samaradorlikni nisbatan pasaytirdi, ammo hamon «Bazel» asosiy tarkibidan joy olmoqda.  U ayniqsa, raqibdan to'pni tortib olishda yaxshi harakatlanadi va xoh qanotda bo'lsin, xoh o'rtada - barchasida tashabbus ko'rsatish iqtidoriga ega.
Breel Shveytsariyaning kattalar terma jamoasida ham o'z gollari hisobini ochishga ulgurdi - jabrlanuvchi rolida San-marinoliklar. «Inter», «Yuventus» va «Tottenxem» - bular Embola «izi»ga tushgan klublar. Unga hammadan ham «Volfsburg» jiddiy qiziqish bildirgandi, biroq «bo'rilar»ning 27 million evroni o'z ichiga olgan takliflari (yanvar oyida) «Bazel» tomonidan shunchaki, rad qilindi. Binobarin, Breelga da'vogarlar safi «Barselona», «Arsenal» va «MYu» jamoalari hisobiga yanada kengaydi.
Davomi InterFUTBOL gazetasi blogida.
— deya xabar beradi uff.uz nashri.