RPLda «Spartak» «nokaut»ga uchradi, Agueroning «xet-trig»i «shaharliklar»ga navbatdagi g'alabani tuhfa etdi. Messining qayg'uli yubileyi, Benzema va Ibragimovichning rekordlari... O'tgan dam olish kunlari ko'hna qit'ada ro'y bergan e'tiborga molik voqealar sharhi diqqatingiz markazida.
Bir kishi hamma uchun...
Angliya premer-ligasining 34-tur markaziy bahsida «Chelsi» va «Manchester Siti» qarama-qarshiligi kuzatildi. «Shaharliklar» hujumchisi Serxio Aguero mazkur uchrashuvning haqiqiy qahramoniga aylandi. Argentinalik forvard «xet-trik» qayd etib, Manuel Pellegrinining Gus Xiddink ustidan g'alaba qozonishini ta'minladi. Agueroning dastlabki ikkita goli tezkor qarshi hujumlardan so'ng urilgan bo'lsa, yakuniy nuqta penaltidan so'ng qo'yildi.
Keskinlik ta'minlandi
«Lester» va «Vest Xem» mazkur turda muxlislarga ajoyib futbol hadya etishdi. Jeymi Vardi simulyatsiya ishlatganlikda ayblanib, maydondan chetlatilgach, mezbonlar maydonda o'n kishi bo'lib qolishdi. «Tulkilar» 84-daqiqagacha 1:0 hisobida oldinda borishayotgandi, ammo mehmonlar 3 daqiqa mobaynida ikkita gol urishdi. Go'yoki, Slaven Bilich jamoasi «Lester»ni taslim etadigandek ko'ringandi, biroq Leonardo Ulloa hakam tomonidan qo'shib berilgan daqiqalarda penaltidan to'p kiritib, jamoasini mag'lubiyatdan qutqarib qoldi. Aytish joizki, Jonatan Moss boshchiligidagi hakamlar brigadasining g'alati qarorlari o'yinning asabiy ruhda kechishiga zamin yaratdi.
Birmingem elita bilan xayrlashdi
Mavsumni o'ta omadsiz o'tkazayotgan «Aston Villa» chempionat finishiga to'rtta tur qolganida premer-liga bilan xayrlashadigan dastlabki jamoaga aylandi. «Old Trafford»da «MYu»ga 0:1 hisobida imkoniyatni boy bergan birmingemliklarning elitani tark etishlari oydinlashib qoldi. Bu tamomila parokandalikka yuz tutgan «Aston Villa»ning qatorasiga 9-mag'lubiyati. Mezbonlarning yagona goli Markus Rashford hisobiga yozildi. Antonio Valensiyaning qanotdan uzatib bergan to'pini raqib darvozasiga joylagan iqtidorli futbolchi shu tariqa o'zining APLdagi 4-to'pini kiritdi.
Davomi InterFUTBOL gazetasi blogida.
— deya xabar beradi uff.uz nashri.