«Nasaf» - O'zbekiston kubogining yangi sohibi! Ochig'i, aksariyat muxlislar shuni istashgandi. Qarang, shu istak tantana qildi. Chunki «ajdarlar»ning hozirgi tarkibi Ro'ziqul Berdiev tomonidan bir necha yil avval shakllantirilgandi. Jamoa Artur Gevorkyanning atrofida jipslashdi. Turkmanis­tonlik legioner o'z navbatida, klub yalovbardoriga aylandi. Eng muhimi, Ro'ziqul Berdiev etakchi tanlashda adashmadi.
«Paxtakor»dan Qarshiga yo'l olgan futbolchi o'tgan vaqt ichida o'zi va jamoasi uchun nelarnidir isbotlashi zarur edi. Zero, u ketgach, «sherlar» 2 bora chempionlik unvonini qo'lga kiritishdi. Qisqasi, Artur Gevorkyandagi holat «Nasaf»ning kubok yo'lidagi kurashida qo'shimcha harakatlantiruvchi omil vazifasini bajardi. Qolaversa, Ro'ziqul Berdiev jamoasi bu yil obi-tobiga keldi, murabbiyning orzu-rejalari futbolchilar tomonidan bir maromda amalga oshirilmoqda.
To'g'ri, bu maromning miqyosi hali chempionlik uchun kurashish darajasiga ko'tarilmaganligi aniq, ammo u kubok sohibi bo'lish uchun o'zida kuch topdi. Ha, hammasi murabbiy tomonidan shu maromni mahkam ushlab turilishi bilan bog'liq. Agar marom buzilsa, hatto eng kuchli jamoalar ham raqobatga bardosh berisholmaydi. Dongdor Gollandiya terma jamoasining Evro-2016 final bosqichida ishtirok etmasligining asosiy sabablaridan biri - shu. Garchi tarkibida premer-liganing yulduzlari jamlanishmagan bo'lsada, Angliya terma jamoasi Evro-2016 saralash bosqichida mutlaq maksimal natija qayd etdi. Chunki Roy Xojson jamoadagi ichki muhitni bir maromda boshqardi, tarkibda keskin o'zgarishlarga qo'l urmadi.
Roy Xojson tanlagan marom Angliya terma jamoasiga Evro-2016 yo'llanmasini qo'lga kiritishda u qadar qiyinchilik tug'dirmadi, biroq uning qudrati Evro-2016da g'olib chiqishga etadimi-yo'q - buni vaqt ko'rsatadi. Har holda, Germaniya, Ispaniya, Italiya kabi kuchli terma jamoalarda avvalgiga nisbatan depsinish ko'zga tashlanmoqdaki, Xojson shogirdlari mazkur vaziyatdan foydalanib qolishlari mumkin.
Ko'rinib turibdiki, «Nasaf» ham, Angliya termasi ham yorqin yulduzlari bilan maqtanolmaydi, biroq har ikkisida murabbiy va etakchining mus­tahkam tandemi mavjud. Biz qayta-qayta tilga olayotgan maromning vujudga kelishida mana shunday mustahkam tandemning o'rni beqiyos. Bugun «Real», «Barselona», «Chelsi», «Liverpul», «Milan», «Inter» kabi mashhur klublar yuksak marom ilinjida izlanishmoqda. Deylik, «Real» mutasaddilari Rafael Benitesning ishidan ham qoniqmay, «Qirollik klubi»ga munosib murabbiy topish va Garet Beylni jamoaga singdirish borasida bosh qotirishmoqda. Holbuki, bu muammolar allaqachon o'z echimini topishi kerak edi. Ronaldu harchand yuksak natijalar sari intilmasin, jamoa ichki muhitida, boshqaruvida marom sezilmasa, undagi nodir iste'dod bor bo'yicha o'zini namoyon etolmaydi. Shuning uchun ham bosh murabbiy tanlash yoki uni almashtirish, transfer siyosatini oqilona olib borish g'oyat muhim ish hisoblanadi.
Salgina xato ham kuchli klublarni inqiroz sari boshlashi hech gap emas. Mana, o'zining ajoyib akademiyasiga tayanib ish tutadigan «Barselona»dek klub ham o'sha zarur maromni saqlashda qiyinchiliklarga duch kelmoqda. Klub mutasaddilari «Inesta yana 2-3 yil bemalol o'z saviyasida to'p suradi, Messi mo''jizasi nojo'ya ta'sirlardan mutlaqo ihotalangan», deb o'ylashdi, chog'i. Aks holda, avval Sesk Fabregas va Aleksis Sanches, keyin Pedro Rodrigesni boshqa jamoalarga qo'yib yuborishmasdi. Mana, Luis Enrike endi Sandro Ramires, Serxio Roberto, Munir kabi futbolchilar xizmatidan foydalanishga majbur. Ular esa maydonda o'zlarini erkin his etisholmayapti. Neymar ham bu muammo oldida qiynalganini nazarda tutsak, ularning bunday to'siqqa uchrashishlari tabiiy hol. Neymar uzoq vaqt Messining ta'sir doirasidan chiqish, uning bosimidan xoli bo'lishga intildi, lekin bu borada rosa ezildi.
Nihoyat, Messi jarohatlandi. Qarangki, Neymar argentinaliksiz to'p surishga ham ruhan tayyor emas ekan. Shu bois, u dast­lab dovdirab qoldi va jamoa etakchiligini qo'lga ola bilmadi. Faqat, «Rayo Valekano» bilan bahsda biroz o'zini erkin va xotirjam sezdi. U haqiqatan ham, yulduz futbolchi va bu yulduz 4ta gol timsolida nihoyat, to'rt tarafga shu'la sochdi. Ammo bu hol «Barselona» o'yin uslubida ko'pchilik kutgan marom paydo bo'lganini anglatmaydi. Marom yo'qmi, demak, «Real» ham, «Barselona» ham kutilmaganda, ochko yo'qotaveradi.
Umuman olganda, barcha grand klublar, an'anaviy kuchli terma jamoalar marom buzilishidan aziyat chekmoqdalar. Argentina va Braziliya terma jamoalarining JCh-2018 yo'lidagi ilk bahslari, «Arsenal»ga 3:0 hisobida yutqazib, xuddi shu hisobda «Everton» ustidan zafar quchgan «MYu»ning o'yinlari fikrimiz dalilidir. Faqat «Bavariya» bundan mustasno, nazarimizda. Gvardiola tarkibda keskin yangiliklar qilsa ham, uning klubi hamon avvalgi o'yin uslubini, barcha ko'nikkan maromni saqlamoqda.
Ana, aslida iste'dodli murabbiy hisoblangan Brendan Rojers «Liverpul»da shu ishni uddalolmadi. «Qizillar» vaqtida 3ta «S» (Suares, Starrij, Sterling) birligi bilan sururlandilar. Afsuski, bu uzoqqa cho'zilmadi. Takror bo'lsa ham aytamizki, Gvardiola buni eplayapti. Agar bugungi «Barselona» Messi va Inestasiz o'zini noqulay sezayotgan bo'lsa, Shvaynshtayger, Robben va Riberisiz qolgan «Bavariya» hamon ravon yo'lida dadil odimlamoqda. Vaholanki, avvalgi «Bavariya»ni bu futbolchilarsiz tasavvur qilish mushkul edi.
Davomi InterFUTBOL gazetasi blogida.
— deya xabar beradi uff.uz nashri.