Xorvatiyaning Zagreb shahrida UEFA tomonidan maxsus seminar bo'lib o'tdi. Bir hafta mobaynida o'tkazilgan ushbu seminarda OFK delegatsiyasi ham ishtirok etdi. Ikki qit'a futbol tashkilotlari o'rtasidagi hamkorlik doirasida tashkil etilgan anjumanda hamyurtimiz - FIFA instruktori Islom Ahmedov ham qatnashib qaytdi. Biz 14 aprel kuni yakuniga etgan seminar taassurotlari va u erda ko'rilgan asosiy masalalar yuzasidan tajribali mutaxassisdan intervyu oldik.
- Islom aka, suhbatimiz avvalida ushbu seminar haqida ma'lumot bersangiz. Uni o'tkazishdan ko'zlangan asosiy maqsad nima edi?
- OFK va UEFA futbol tashkilotlari o'rtasida o'zaro keng qamrovli hamkorlik yuzasidan shartnoma imzolangan. Ushbu seminar ham ikki tashkilotning hamkorligi doirasida o'tkazildi. OFKning yangi texnik direktori Endi Roksburg ko'p yillar mobaynida UEFA texnik direktori lavozimida ishlagan. Aynan Roksburg Osiyo murabbiylari saviyasini oshirishga, UEFA darajasiga ko'tarish uchun astoydil harakat qilyapti. Buning natijasi o'laroq, murabbiylik tahsili yo'nalishida tub o'zgarishlar bo'lmoqda. Zagreb shahrida tashkil etilgan seminarda bir guruh osiyolik instruktorlar ishtirok etishdi. Seminarga OFK vakillaridan tashqari Armaniston, Polsha va Irlandiyadan ham delegatlar tashrif buyurdilar.
- OFK vakillari uchun UEFA seminari nima berdi?
- Xorvatiya murabbiylarni tayyorlash bo'yicha Evropada o'z o'rniga ega mamlakat hisoblanadi. Bejizga seminar mezboni sifatida Xorvatiyani tanlashmadi. Asosiy maqsad - Osiyo murabbiylarining bugungi darajasi, qaysi yo'nalish bo'yicha ketayotganimiz, murabbiylik ta'limining qanday qurilganligini yaqindan bilib olish edi. Seminar davomida biz savollarimizga javob topdik.
- OFK delegatsiyasida sizdan tashqari yana kimlar bor edi?
- Zagrebga delegatsiyamiz rahbari sifatida OFK Texnik qo'mitasi menejeri Xose Marselino Kaprio bordi. Avstraliya futbol federatsiyasidan Sin Duglas, Yaponiya futbol assotsiatsiyasidan Kazuyori Mochizuki, Koreyadan Kim Nam Puo, Iordaniyadan Ziyod Tavfiq Sulaymon Akubeh, Filippindan Xose Ariston Kaslib, Qatardan Yussuf Ahmad Baker hamda O'zbekiston futbol federatsiyasi nomidan men ishtirok etdim.
- Evropa futbolida qanday o'zgarishlar bo'layotgan ekan?
- Bolalar va o'smirlar bilan ishlayotgan murabbiylarni tayyorlashga katta e'tibor qaratilyapti. Bu yo'nalishdagi talab kundan-kunga ortib bormoqda. Futbol tezlashib ketyapti va buning natijasida, fikrlash uchun kam vaqt qolyapti, o'yin jarayonida maydonda bo'shliqlar deyarli topilmayapti. Xuddi shunday boshog'riq holatlarda murabbiylarning uquvi va topqirligiga muhtojlik seziladi. Murabbiy futbolchilarini qiyin vaziyat va «stress» holatidan olib chiqib ketishi uchun zamonaviy bilimlarni bilishi shart. Hamma narsa o'zgaryapti. Zamon shiddat bilan odimlayapti. Eski uslublar ish bermayapti. Demak, murabbiylar ham endi o'zgarishi kerak.
- Bunday seminarlar mintaqa va mamlakat futboliga nima beradi?
- Afsuski, biz har kuni deyarli bitta muammoga to'qnash kelyapmiz. Hamma o'zgarish kerakligi, yangicha fikrlash lozimligini anglab turibdi. Lekin qanday yo'l bilan o'zgarish kerakligini bilmayapti. Bunga hozir tayyor ham emas. O'zimning misolimda aytishim mumkin, so'nggi ikki yildan beri Osiyo davlatlari, xususan, O'zbekistonda o'tkazib kelinayotgan va men rahbarlik qilgan seminarlarda aynan murabbiylarni tayyorlashning yangi uslubidan foydalanyapman. Yana bir bor afsus deyman, bizning, shuningdek, Markaziy Osiyo davlatlari hakamlari yangi dastur asosida murabbiylik bilimlarini olishyapti-yu, lekin eskicha ishlashda davom etishyapti. Buni qanday tushunish va hazm qilish mumkin? Biz murabbiylardagi qarash va munosabatni o'zgartirmas ekanmiz, hech qachon saviyali futbolchilarni tayyorlashga erisha olmaymiz. Buning natijasida xalqaro arenada raqobatga dosh berish imkonsiz. Yuqori saviyali futbolchilarning etishib chiqmasligi esa terma jamoalarimizga ham salbiy ta'sir o'tkazadi.
- Seminar nima uchun aynan Xorvatiyada o'tkazildi?
- Xorvatiya uchta yosh toifasida jahon chempionatlarida ishtirok etgan Evropaning yagona mamlakati hisoblanadi. Demak, bu davlatda futbolchilarni tayyorlash mexanizmi juda yaxshi ishlayapti. Ishlar to'g'ri yo'lga qo'yilgan. Bunga safarimiz davomida ham amin bo'ldim. Ulardan o'rganadigan jihatlarimiz ko'p ekan. Davomi InterFUTBOL gazetasi blogida.
— deya xabar beradi uff.uz nashri.