Ispaniyaliklarning ko'pchiligi Diego Simeoneni ko'rarga ko'z, otarga o'q topa olishmaydi. U esa hatto pinagini ham buzmagan holda «Atletiko»ni yangi-yangi cho'qqilar sari etaklamoqda.
Chindan ham, argentinalik mutaxassis Madridga kelganidan keyin «matraschilar» La liga grandlariga munosib raqobat ko'rsata oladigan kuchli jamoaga aylandi. Xo'sh, Simeonening boshqa kasbdoshlaridan farqi nimada? Shogirdlari kuchli raqiblarni mahv eta olishlari uchun u qanday «sehr-jodu»dan foydalanadi? Aksariyat mutaxassislar ayniqsa, Luis Enrikedek alamzada raqiblar tinchini o'g'irlagan ana shu savollarning javobi bor-yo'g'i 3ta raqamga joy bo'lgan. Ha, bir qarashda o'ta zerikarli, «quruq» hisob-kitoblarning hayratomuz qudratiga lol qolmaslikning iloji yo'q.
Diego Simeone futbol estetikasini dabdala qilmoqda, degan fikrdagilar qattiq yanglishadilar. Aksincha, futboldagi ayrim nuqsonlarni silliqlashga urinmoqda. To'g'ri, buning uchun anchayin to'pori quroldan foydalanmoqda. Ana shu qurol yordamida 5 aprel oqshomida ChLning tojdori maydonida kichik farq bilan imkoniyatni boy berib, uni musobaqadan chiqarib yuboradigan to'siqqa poydevor qo'ydi. Madriddagi javob uchrashuvida esa «Kamp Nou»da boshlangan ishni nihoyasiga etkazdi. Xullas, «Barsa»-EChL tomoshabinlari safida! O'zini ashaddiy romantik hisoblaydigan kishilar uchun ana shu ta'rifning o'zi etarli. Diego bilan zamonaviy futbol an'analari o'rtasidagi nomutanosiblik shundaki, argentinalik mutaxassisni ko'pchilik o'ta qiziquvchan va ehtirosli shaxs deb biladi. Aslida, Simeone har bir qadamini o'ylab bosadigan, etti o'lchab bir kesuvchi inson. Fikrimizni quyida keltiradigan ayrim raqamlar isbotlaydi.
Chorak finalning dastlabki bahsida «Atletiko» mag'lubiyatni tan oldi. Lekin hatto maydonda ozchilik bo'lib ham Simeone ko'rsatmalariga to'liq rioya qildi. Murabbiyning asosiy maqsadi - «Barsa»ni o'zi yoqtirmaydigan uslubda to'p surishga majbur etish. Keling, bunga amin bo'lish uchun jamoaning kuchli raqiblarga qarshi o'yinlaridagi ayrim ko'rsatkichlarni ko'rib chiqaylik.
23 raqami. Ayting-chi, hozirgi «Barselona»ning asosiy ustunligi nimada? Qisqa uzatmalar orqali himoya markazini yorib o'tish. Bunga yo'l qo'ymaslik uchun nima qilish kerak? Buning uchun yarim himoyachilar uchligining samarali to'p surishiga imkon bermaslik, raqib o'yinchilarini qanotlarda yoyib yuborish va qanot himoyachilari erkinligini cheklash talab etiladi. «Atletiko»ning himoya chizig'i o'ta zich holda, yoyilib ketmagan tarzda o'ynaydi. Xuanfran bilan Felipe Luis qo'shimcha markaziy himoyachilarga aylanishdi. To'g'ri, oqibatda Alba va Alvesh uchun qanotlarda ulkan bo'shliqlar yuzaga keldi. Biroq ana shu erkinlikdan unumli foydalanishlariga Koke va Saul yo'l qo'yishmadi. Hatto, maydonda 10 kishi bo'lib qolganda ham «Atletiko» murabbiyi 4-4-2 sxemasiga ko'ra, vertikal pressing usulidan voz kechmadi. To'p «Barsa»ning qanot himoyachilariga o'tgani zahoti 3 nafar o'yinchi uning markazga uzatilishiga yo'l qo'ymaslikka harakat qilishdi. Oqibatda, «Barsa» to'pni yuqorilatib oshirishdan boshqa yo'l topa olmadi. Yodingizda bo'lsa, La-liga doirasidagi bahsda ham «matraschilar» 9 kishi bo'lib qolishlariga qaramay, shu usulda to'p surishgandi. Qisqasi, Enrike jamoasi 5 aprel kuni 23 marta qanot uzatmalarini amalga oshirdi. Taqqoslash uchun keltiradigan bo'lsak, Ispaniyada ana shu ko'rsatkich o'rtacha 14taga teng. E'tiborlisi, «Arsenal»­ni taslim etgan o'yinda «Barsa» ham ayni natijani qayd etgandi. Shuningdek, «Sevilya»ga qarshi bahsda ham.
Simeonening maqsadini anglash qiyin emas: jarima maydonchasi tomon yuqoridan uzatilayotgan to'plardan «Barsa» unumli foydalana olmaydi, qachonki, himoyalanuvchi  tomon kutilmagan qo'pol xatoga yo'l qo'ymasa. Qo'ying-chi, «Barselona»ning 23ta uzatmasidan atigi 5tasi manzilga aniq etib bordi, xolos. Agar Enrike shogirdlari o'z uslublarida to'p surishganida, «Atletiko» himoyachilariga juda qiyin bo'lishi aniq edi. Simeone strategiyasining yana bir muhim jihati shundaki, qanot orqali yuqoridan uzatilayotgan uzatmalar qanchalik ko'p bo'lsa, «Barsa»ning markaz orqali qisqa uzatmalari shunchalik kamayadi. Odatda, kataloniyaliklar har bir o'yinda o'rtacha 38-40 daqiqa to'pga egalik qilishadi. Lekin «Atletiko»ga qarshi bahsda u ozroq.
Chunki «matraschilar» ham to'pni imkon qadar ko'proq nazorat qilishga harakat qilishadi. Natijada raqib qoidani buzishga majbur bo'ladi, o'yin sur'ati pasayadi. Xullas, taxminan 5-6 daqiqa turli to'xtalishlarga ketadi. Ana shu 35 daqiqaning 1|4 qismi samarasiz qanot uzatmalariga sarflanadi. «Barsa»ning o'rtacha samaradorligi 2,7ta golga teng­ligidan kelib chiqsak, «Atletiko»ga qarshi bahsda bu ko'rsatkich 2,02ga tushib qoldi. Darhaqiqat, «Kamp Nou»da u 2ta gol urishga muvaffaq bo'lgandi.
51 raqami. Diego Simeone «Barsa»ga qarshi bellashuvlarda shogird­larining ko'proq jarima maydonchasi atrofida to'p surishlaridan cho'chimaydigan yagona murabbiy. Bir qarashda madridliklar o'yin tizginini yo'qotib qo'ygandek ko'rinadilar. Biroq bu aldamchi taassurot - «Atletiko» o'z maydonchasi atrofida to'plangan holda raqibning hujumlarini sinchkovlik bilan kuzatadi, hech qaysi o'yinchi uning e'tiboridan chetda qolmaydi. Dunyodagi hech qaysi jamoa ogohlik shipshitishlaridan «Atletiko»chalik unumli foydalana olmaydi. Madridlik o'yinchilar asosiy e'tiborni to'pga emas, raqib o'yinchilarining harakatlariga qaratishadi. O'zlari ta'qib qilayotgan jamoadoshlari kuzatuviga topshiradilar.
Oqibatda, raqib futbolchisining yaqinlashayotganidan hech kim g'aflatda qolmaydi. Xullas, jarima maydonchasiga kirib kelayotgan raqib «Atletiko» uchun muammo emas. Jamoa kataloniyaliklarni «Arsenal» yoki «Sevilya» futbolchilaridan ko'ra ko'proq o'z darvozalariga yaqinlashtiradi. Ya'ni, Messi o'z sheriklari bilan madridliklar darvozasi oldida 51 marta paydo bo'ldi. Bu ko'rsatkich «Arsenal» qarshi bahsda 40, «Sevilya»da 42ga teng bo'lgandi. 90 daqiqa davomidagi ana shu 51ta uzatmadan 27tasi aniq manzilga etib bordi. Bu borada o'sish kuzatilmagan bo'lsada («Arsenal»da 20, «Sevilya» 23), uzatmalarning sifati past­ligi sababli samara bermadi.
Davomi InterFUTBOL gazetasi blogida.
— deya xabar beradi uff.uz nashri.