Ancha vaqtdan beri ko'p sonli ishqibozlarimiz talabiga binoan Rossiya premer ligasi “Krasnodar” klubida to'p surayotgan Nikolay Markov bilan suhbat qurishni maqsad qilib yurgan edim.
Klub matbuot xizmati xodimi Denis Danilchenkoga ushbu masalada murojaat qilganimda, hamkasbimiz  asli o'zbekistonlik bo'lgan o'yinchidan mo'jaz intervyu olish imkoniyatini yaratib berdi. Bir paytlar Toshkentning “Traktor” jamoasi sharafini himoya qilgan Nikolay Markov o'n ikki yildan buyon Rus diyorida faoliyat yuritayotgan bo'lishiga qaramay,  suhbat davomida o'zbek tilida - “rahmat”, “arzimaydi”, “xudo hohlasa” kabi so'zlarni ishlatgani esa tahsinga loyiq.
- Nikolay, bolalik chog'lar, futboldagi ilk qadamlarni eslab turasizmi?
- Tug'ilib o'sgan zaminni qo'msamay bo'ladimi? Xabaringiz bor, Odil Ahmedov bilan bir klubda faoliyat yuritamiz. O'zbekistonda bo'layotgan ijobiy o'zgarishlar to'g'risida do'stimdan juda ko'p ma'lumotlar olishga intilaman. Toshkentdagi turli mevalar bilan to'la bozorlar, qadrdon insonlarni unutishni iloji yo'q. Bilasiz, futbolchida vaqt degani juda noyob bo'ladi. O'zbekistonga safar qilish uchun imkon topishga harakat qilyapman, nasib qilsa niyatlarim amalga oshib qolar... Birinchi murabbiyim Abdurashid aka Nuraliev va boshqa ustozlarim ko'z oldimda. Ulardan juda-juda minnatdorman. Men futbolchi sifatida o'sha erda shakllanganman.
- Ko'p yillardan beri Rossiya premer ligasida to'p suryapsiz. Sizni hech O'zbekiston termasiga taklif qilishganmi?
- Termaga Vadim Abramov bosh murabbiy bo'lgan paytlarda men bilan aloqaga chiqqan edi. Lekin, taklif u darajada jiddiy bo'lmagan. O'sha paytlarda “Krasnodar” safida tarkibga muqim o'rnashish harakatida edim. Bilsangiz, Rossiya klublarida legionerlar bilan bog'liq alohida limit va cheklovlar mavjud. “Krasnodar” o'rtamiyona jamoa emas va klubda  yuqori saviyadagi ko'plab futbolchilar borligi sabab raqobat juda kuchli. Asosiy tarkibdan joy olish uchun kuchli kurash ketadi. Shuning uchun men jiddiy bo'lmagan taklifga katta e'tibor bermaganman. Bundan tashqari, Abramov bilan Toshkentning “Traktor” klubida o'ynagan vaqtimdan aloqalarimiz yaxshi emasdi. Hozir ham mabodo, O'zbekiston termasidan taklif tushadigan bo'lsa yana  yuqoridagi jihatga e'tibor qaratishga to'g'ri keladi.
O'zbekiston termasining ayni paytdagi holati haqida yaxshi tushunchaga egaman. Jamoa tarkibida bir qator yuqori saviyadagi futbolchilar to'p surishyapti. Ularning o'yinlarini doim kuzatib boryapman. Chaqiruv masalasiga to'htaladigan bo'lsam, jahon chempionatida maydonga chiqish har bir futbolchi uchun orzu, xususan menga ham...
- Mirjalol Qosimov intervyulardan birida: “Markov termamiz o'yinini kuchaytirishi mumkin” degan edi
- Balki, shunday degandir. Eshitmagan ekanman.
- Kamolot yoshidasiz,  premer ligada barqaror o'yin ko'rsatyapsiz. O'zbekiston termasi tarkibida maydonga tushib tursangiz, Osiyo klublaridan manfaatli shartnoma imzolash imkoniyati tug'ilishi ham mumkin...
Men  uchun pul muhim omil emas. Asosiysi, futbol o'ynash.    
- Ishqibozlar: “Nikolay Markovni termaga chaqirishsa bo'lmaydimi?” degan savolni ko'p berishadi. Ayni paytdagi terma jamoamiz mutasaddilari tomonidan rasmiy taklif bo'ldimi?..
- O'ZBEKISTON - VATANIM. UMUMAN OLGANDA, MILLIY TERMA JAMOADA O'YNASh - HAR BIR FUTBOLChINING BURChI DEB HISOBLAYMAN. Agar murabbiylar shtabidagi rasmiy shaxslar men bilan jiddiy tarzda qiziqadigan bo'lsa, bu masalada suhbatlashishga tayyorman.
- Yurtimizda  “Krasnodar” safidagi har bir o'yiningizni kuzatib, sizga omad tilaydigan muxlislar bor...
- Bu men uchun juda yoqimli holat.  Barcha o'zbekistonlik futbol ishqibozlariga qaynoq salomimni etkazing. Yuqorida aytganimdek, terma jamoa sardori Odil Ahmedov bilan ko'p suhbatlashamiz. Hozirda O'zbekiston termasida juda yaxshi futbolchilar yig'ilgan. Men terma jamoani jahon chempionatiga chiqishini juda hohlayman. Nasib qilsa, saralangan jamoa mundial yo'llanmasini albatta qo'lga kiritadi.
 
Sizni terma jamoamizga chaqirilishingizni maqsad qilib, yaxshi niyat bilan  “Ko'rishguncha” deb hayrlashaman. Samimiy suhbat uchun tashakkur. Elmurod ERMATOV suhbatlashdi Muallifdan: Mundial darvozasi sari so'ngi dovonda har bir saviyali o'yinchining roli termamiz  muvaffaqiyati uchun muhim bo'lishi mumkin. Jahonning bir qator terma jamoalarida umuman boshqa mamlakat sportchilarini mahalliylashtirib tarkibga qo'shib olish hollari uchraydi.    Bir vaqtlar termamizni murabbiy V. Salkov boshqarganida  - O.Pashinin, V. Maminov, A. Polyakov. R. Agalarov, G. Georgiev va O. Dionisiev kabi futbolchilar chaqirilgandi.  Bu urinish katta samara bermagan bo'lsada ro'yhatdagi dastlabki uchlik o'yinlari hali ham yodimizda. O'zbek maktabi tarbiyalanuvchisi bo'lgan futbolchining saralangan jamoa safida o'ynash yoki o'ynamasligini esa vaqt hukmiga havola etamiz...
Bugungi suhbatdan maqsad murabbiylar shtabiga “mana bu o'yinchini termaga olish kerak!” qabilidagi bosim o'tkazish emas.  Boring-ki, muxlis va jurnalistlar fikri bilan qaysidir futbolchi termaga chaqirilishi mumkin. Lekin,  ana shu o'yinchini o'z tarkibi safida ko'rishni istamagan murabbiy uni zahiradan tushirmay, taqdirini ayanchli holga ham keltirib qo'yishi ehtimoli ham bor.
O'zbek futboli hech ham iqtidorlardan tanqislik sezmagan. Demak, terma jamoalar markazi izlanishda davom etib, navbatdagi bosqichda yordami tegishi mumkin bo'lgan nomzodlarni har tomonlama o'rganib chiqishi lozim. Qisqa qilib aytganda, hohish va ma'suliyat zarur.      
Qorako'z ishqibozlar esa terma jamoamizni saralash bosqichidan qoqilmay o'tib ketishidan umidvorlar.
— deya xabar beradi uff.uz nashri.