Yaqinda «Manchester Siti» bosh murabbiyi Manuel Pellegrini Ispaniyaning Marca nash­riga intervyu berdi. Suhbat chog'ida u «Real»dagi davrlarini eslab o'tdi.
Chililik mutaxassis «shaharliklar»ni uch yildan buyon boshqarib keladi. Uning qo'l ostida jamoa Angliya chempionatida g'olib chiqdi va ikki bor Angliya Liga kubogini qo'lga kiritdi. Shuningdek, «Siti» aynan Pellegrini boshchiligida Evropa maydonlaridagi eng katta yutug'i - EChLning yarim finaliga yo'l oldi. E'tiborli tomoni, bu bosqichda manchesterliklar chililik mutaxassisning sobiq jamoasi - «Real»ga to'qnash kelishdi. Seshanba kuni jamoa­lar yarim finalning dastlabki uchrashuvini o'tkazishdi. Aynan shu o'yin oldidan ispaniyalik jurnalistlar «shaharliklar» ustozi bilan suhbat qurdilar.
- «Manchester Siti»ni uch yildan buyon boshqarasiz. Oldinda jamoani «Real»ga qarshi tarixiy o'yin kutib turibdi.
- Bu g'ayrioddiy klub safidagi ajoyib uch yil bo'ldi. Biz ko'p narsaga erishdik. «Man.Siti» premer-ligada g'olib bo'ldi. Endi Chempionlar Ligasining yarim finaliga chiqdik. Mening boshqaruvimdagi dastlabki ikki mavsumda EChLning 1|8 finalida «Barselona»ga mag'lub bo'lganmiz.
- «Real»ni boshqarganingizda, jamoaga yuqori saviyadagi ijrochi etishmayotgandek tuyulardi. Haqiqatan ham shunday bo'lganmi?
- O'shanda «Real»ning o'tish davri edi. Shu bois ham bir-ikkita kamchiliklar yaqqol ko'zga tashlangan. Shuningdek, sotib yuborilgan muhim o'yinchilarimiz etishmagan. Ulardan biri - Aren Robben. Yakunda «Bavariya» bilan EChLda g'olib chiqdi. Ke­yingisi - Uesli Sneyder. U ham Milanning «Inter»ida ushbu musobaqada zafar quchgan. Bundan tashqari, ular boshqa jamoalarga sotilganlaridan so'ng «Santyago Bernabeu»da bo'lib o'tgan EChL finalida o'zaro to'qnash kelishdi.
Bu rosa jahlimni chiqargan. Mavsum boshlanmasidanoq iste'fo haqida o'ylaganman. Lekin Xorxe Valdano qolishga ko'ndirgan. O'shanda hujumchilarimiz ko'p bo'lgan. Biroq kreativ yarim himoyachilar etishmasdi.
O'sha yillari Madridda Evropaning eng nufuzli turnirida g'olib chiqishga qodir jamoa yo'q edi. Lekin biz guruh bosqchidan qiyinchiliksiz chiqib, men kutgandan ko'ra saviyaliroq o'yin namoyish qilganmiz.
Meni hozirgacha bir narsa ajablantiraveradi. Ya'ni, o'zim boshqargan «Malaga» EChLning «pley-off»ida Dortmundning «Borussiya»siga mag'lub bo'lib, musobaqadan chiqib ketgandi. Agar hakam xato qilmaganida... O'shanda «Borussiya»ning etti nafar futbolchisi «ofsayd»da bo'lgan. Gol ham o'yindan tashqari holatda urilgan. Lekin referi uni hisobga olgan. Eng achinarlisi, ushbu hakam keyinchalik ham Chempionlar Ligasi o'yinlarini boshqardi.
- «Malaga»da baxtli edingizmi?
- Juda baxtli edim. O'sha mavsum jamoa Chempionlar Ligasidan ham mahrum bo'lishi ehtimoli yo'q emasdi. Ammo biz chorak finalgacha etib borganmiz. O'shanda jamoa har qanday raqibni mag'lub etishga qodir edi.
Umuman olganda, chaqiruvlarni yaxshi ko'raman. «Real» menga qiziqarli variant taklif qildi. Hamisha katta yutuqlarga erishsa bo'ladigan jamoani boshqarishni istaganman. To'g'ri, biz sovrinlarni qo'lga kiritmaganmiz. Ammo «Real» bunga qadar primeroda 96 ochko jamg'armagandi.
- O'shanda Xosep Gvardiola boshqargan «Barselona»dagi muhit siz boshqargan «Real»dagi muhitdan yaxshiroq tuyulgandi.
- Aynan shunday. Men futbolchilar bilan yaxshi munosabatda bo'lishga harakat qilganman. «Real»ning ham jamoaviy natijalari yomon emasdi. Bilsangiz, avgust oyidayoq mavsum yakunlanganidan so'ng meni bo'shatishlarini his qilganman. Lekin kubok bahslarida «Alkorkon»ga mag'lub bo'lishimiz, EChLdan chiqib ketishimiz bunga ta'sir o'tkazmagan.
Davomi InterFUTBOL gazetasi blogida.
— deya xabar beradi uff.uz nashri.