“Nasaf” yoshlari bugun o'z qarorgohlaridagi futbol maydonida yoshlar ligasining navbatdagi 8-tur uchrashuvini Navoiy shahrining “Qizilqum” jamoasi yoshlariga qarshi o'tkazishdi.

Qiziqarli o'tgan uchrashuvda yoshlarimiz ilk daqiqalardan tashabbusni o'z tomoniga og'dirishga harakat qilishdi. Ular ketma-ket raqiblari darvozasi tomon hujumlar uyushtirishdi, gol urishga ham imkonlar bo'ldi. Ammo darvozani ishg'ol qilishda hech qaysi o'yinchida aniqlik etishmadi.

Mehmonlar ham faqat himoyalanmasdan vaziyat taqazo qilganda qarshi hujumlar bilan Muzaffar Sharipov qo'riqlayotgan darvoza oldida xavf tug'dirib turishdi.

Birinchi bo'limda hisob ochilmadi. Jamoalar tanaffusga chiqib ketishdi.

Tanaffusda o'z murabbiylaridan kerakli ko'rsatmalarni olgan futbolchilar, ikkinchi bo'limda maydonning har bir nuqtasida to'p uchun ayovsiz kurash olib borishdi.

Ikkinchi bo'limning 46-daqiqasida mehmonlar o'z jarima maydonlari ichida jamoamiz o'yinchilaridan birini qo'pollik bilan yiqitdi. Hakam futbolchilarimizga 11 metrlik jarima to'pi tepishni ko'rsatdi. Afsuski, Dilshod Xushbakov penaltini noaniq bajardi. Erkin Jabborov to'p yo'nalishini aniq topib, o'z jamoasini muqarrar goldan asrab qoldi.

Uchrashuvdagi hisob bari-bir yoshlarimiz tomonidan ochildi. Maydonning o'ng tomonidan tashkil etilgan hujum, chap qanotga ko'chdi. To'pni egallab olgan Islom Kenjaboev jarima maydonida turgan Alfayzi Ne'matovga oshirib berdi. Bu vaziyatda Alfayzi Ne'matov darvozani aniq nishonga olishda adashmadi-1:0. Alfayzi Ne'matov ikkinchi bo'limda maydonga tushgan edi.

Shundan so'ng, “Qizilqum” yoshlari ham hisobni tenglashtirish uchun bor kuchlari bilan oldinga tashlanishdi. Uchrashuvning 59-daqiqasida ular himoyachilarimizni xato qilishiga erishishdi. Ya'ni, navbatdagi hujumlarning birida o'yinchimiz jarima maydonida to'pni qo'li bilan o'ynadi va uchrashuv hakami endi mehmonlarga 11 metrlik jarima to'pi tepishni ko'rsatdi.

61-daqiqada penaltini Mirjalol Qosimov aniq bajarib, oradagi hisobni tenglashtirdi – 1:1.

O'rinbosarlarimiz uchrashuvni g'alaba bilan yakunlash uchun, o'yin oxirigacha urinishdi. Afsuski, bu ularga nasib qilmadi. Uchrashuv durang natija bilan nihoyasiga etdi.

Yoshlar ligasi, 8-tur
“Nasaf” (Qarshi) – “Qizilqum” (Navoiy) 1:1 (0:0)
Gol: Alfayzi Ne'matv, 53’-1:0 – Mirjalol Qosimov(penaltidan), 61’-1:1
Noaniq penalti: Dilshod Xushbakov 48.
“Nasaf”: 30.Muzaffar Sharipov, 6.Sirojiddin Qo'ziev, 7.Akbar Murodov (33.Botirjon To'raev 81), 14.Dilshod Xushbakov (4.Akmaljon Olimov 68), 19.Navro'z Izatillaev, 22.Islom Kenjaboev, 28.Sardor Sa'dullaev (9.Alfayzi Ne'matov 46), 32.Abdulaziz Nishonboev, 34.Ilhomjon Alijonov, 41.Najmiddin Normurodov, 43.Timur Fayzullaev (38.Jahongir Qurbonboev 46).
“Qizilqum”: 1.Erkin Jabborov (50.Shaxzod Asatov 90), 4.Viktor Grigorev, 6.Mirjalol Qosimov, 13.Bobur Mamerov (34.G'ayrat Davronov 77), 15.Sobir Usmonxo'jaev (61.G'ayrat Jumaev 52), 19.Ruslan Iskandarov, 28.Sardor Jahonov, 29.Saitjon Xayitov, 47.Feruz Norov (3.Orzu Razzoqov 67), 71.Axliddin Fayziev, 88.Nodirxon Kamolov.
Ogohlantirish: Abdulaziz Nishonboev 55, Najmiddin Normurodov 77 - Mirjalol Qosimov 10, Sayitjon Xayitov 85.
Bosh hakam: Shuhrat Rajabov (Buxoro),
Hakamlar: Zufar Eliboev (Qarshi), Janon Xomidov (Qarshi), Firdavs Norsafarov (Qarshi).
Nazoratchi: Igor Nexochin (Namangan).
— deya xabar beradi uff.uz nashri.