Sir emaski, faoliyatini yakunlagan futbolchilarning keyingi hayoti har doim ham silliq kechavermaydi. Rasmiy ma'lumotlarga ko'ra, professional sportchilarning 50 foizidan ko'prog'i 2-3 yil ichida bor-yo'g'idan ayrilib, bankrotga aylanishar ekan. Masalan, Mayk Tayson ana shu qisqa davr ichida 300 mln.dan ko'proq mablag'idan ayrildi, MXL yulduzi Jek Jonson hech vaqosiz qoldi. Angliya terma jamoasining sobiq posboni Devid Jeyms esa biznesdagi qarzlaridan forig' bo'lish uchun bisotidagi 150dan ortiq futbolkalar va noyob sovrinlarini auktsionga qo'ydi.
Ko'pincha sportchilar ustamon firibgarlarning qurboniga aylanishadi. O'tgan yili «Vulverxempton» va «Koventri» jamoalarining sobiq yarim himoyachisi Maykl Makindo tomonidan asos solingan moliyaviy piramida 300ga yaqin mijozlarni naqd 30 mln. funtga «o'qladi». Jabrlanganlar orasida Jimmi Bullard va Roy Kin kabi sobiq futbolchilar bor. Faoliyati davomida 500 martadan ko'proq maydonga tushgan, jumladan, «MYu»da muvaffaqiyatli to'p surgan taniqli hujumchi Lui Saaning biznes olamiga kirib kelishiga ham tovlamachi olg'irlar turtki bo'lishdi: «2013 yili futbol bilan xayrlashgach, ma'lum loyihaga sarmoya kiritib, chuv tushdim. Xayriyatki, bosh­qa loyihalardagi ishtirokim muvaffaqiyatli chiqib, qashshoqlikdan saqlab qoldi.
Lekin aynan o'sha noxush voqea­dan keyin o'zimga o'xshagan sportchilarning qalloblar «to'­r»­i­ga tushib qolmasliklari uchun ularga ko'makdosh bo'lishga ahd qildim». 2014 yili Lui Saa yaqin do'sti Patris Anrera bilan hamkorlikda Axis Stars korxonasiga asos soldi. Kompaniyaning asosiy maqsadi -  faoliyatini davom ettirayotgan professional sportchilarga o'z mablag'larini firibgar-tovlamachilardan himoya qilish. «Yosh sportchi durustgina maosh ola boshlaganida doimo shunday daromad olaman, deb o'ylaydi. Bundan tashqari, 20-25 yoshli sportchida hayotiy tajriba etarli bo'lmaydi. Shu sababli tez-tez xatolarga yo'l qo'yishi mumkin. Bunday vaziyatda u o'zi to'la tushunib etmagan loyihalarga sarmoya kiritib, chuv tushib qolishi hech gap emas. Bizning asosiy vazifamiz - turli kelishuvlarni amalga oshirmoqchi bo'lganlarga to'g'ri maslahat berib, ularni qalloblar tuzog'iga tushib qolishdan asrash», - deydi Saa.
Hozirda 200ga yaqin malakali mutaxassislar Axis Stars bilan hamkorlik qilishmoqda. Ular har qanday masalalarda - yangi shartnomani tuzish, sug'urta xizmatlaridan foydalanish, homiylar bilan aloqa qilishdan tortib turli yo'nalishlarda o'z mijozlariga maslahat berishadi. Vaholanki, shu turdagi bosh muassasalar o'z mijozlaridan kamida 250 evro miqdorida a'zolik badali olishadi.  Yirikroq kompaniyalarda bu summa yanada ko'proq. Axis Starsga murojaat esa bepul. Har qaysi sportchidan kelishuvga erishgan taqdirdagina 1,5 foiz xizmat haqi oladi, xolos. «Korxonamiz tobora rivojlanib bormoqda. Mijozlar bizdan har qanday masalada maslahat olishlari mumkin.
Hatto, qaysi mehmonxonada to'xtash, qaysi shifokordan muolaja olish yoki qaerdan xarid qilish manfaatliroq bo'lishi xususida ham ko'rsatmalar beramiz. Maqsadimiz - barcha hayotiy masalalarda to'g'ri yo'l ko'rsata oladigan gipermarket darajasiga ko'tarilish», - deydi sobiq hujumchi. Axis Stars xizmatidan foydalanayotganlarning soni tobora ko'payib bormoqda. Ular orasida futbolchi Dide Drogba, MBA basketbolchisi  Boris Diao, Olimpiada chempioni, engil atletikachi Muhammad Fara, tennischi Gael Manfis kabi taniqli sportchilar bor.
Yaqinda muassasa xizmat doirasini yanada kengaytirdi, endilikda uning xizmatidan shou-biznes vakillari ham foydalanishlari mumkin. «Kompaniyamizning bosh maqsadi - xavfsizlikni ta'minlash. Biz endi o'z faoliyatimizni boshlagan payt xavfsizlik tizimi Lionel Messi nomi ostida qaydnomadan o'tishga bo'lgan 500dan ortiq urinishlarni aniqlab, ularni bartaraf etdi. Shaxsni aniqlash ko'p vaqtni talab etsada, bu borada hushyorlikni yo'qotmaslik talab etiladi. Kompaniyaning mijozlari o'rtasidagi nufuzi katta ahamiyatga ega», - dedi Lui.
Davomi InterFUTBOL gazetasi blogida.
— deya xabar beradi uff.uz nashri.