Xorij chempionatlarida to'p surayotgan bir qator o'zbekistonlik futbolchilar o'z jamoalari safida navbatdagi tur uchrashuvlarida maydonga tushishdi. ROSSIYa Moskvaning "Lokomotiv" klubi himoyachisi Vitaliy Denisov Rossiya Premer-Ligasi 28-turi doirasida "Kuban"ga qarshi uchrashuvda maydonga tushdi. "Lokomotiv" maydonida bo'lib o'tgan uchrashuvda "Kuban" 1:0 hisobida g'alaba qozondi. O'zbekiston milliy terma jamoasi himoyachisi mazkur uchrashuvda asosiy tarkibda maydonga tushdi hamda 90 daqiqa harakat qildi. "Krasnodar" klubi safida to'p surayotgan O'zbekiston milliy terma jamoasi sardori Odil Ahmedov mazkur turda o'z maydonida "Kriilya Sovetov" klubiga qarshi uchrashuvda asosiy tarkibda maydonga tushdi, ammo jarohat olgani bois 15-daqiqada almashtirildi. Ayni damda, o'zbekistonlik futbolchi tibbiy ko'rikdan o'tmoqda. BAA O'zbekiston milliy terma jamoasi yarim himoyachisi Aziz Haydarov BAA Pro-Ligasi 26-turi doirasida "Ash Shabob" tarkibida maydonga tushdi. O'z maydonida "Al Vasl"ni qabul qilgan "Ash Shabob" uchrashuvda 1:0 hisobida g'alaba qozondi. O'zbekiston milliy terma jamoasi yarim himoyachisi mazkur uchrashuvda asosiy tarkibda maydonga tushdi hamda to'liq 90 daqiqa o'ynadi. QOZOG'ISTON Qozog'istonning "Ordabasi" klubida to'p surayotgan O'zbekiston milliy terma jamoasi hujumchisi Aleksandr Geynrix Qozog'iston Premer-Ligasi 10-turi doirasida Karagandaning "Shaxter" klubiga qarshi maydonga tushdi. Ushbu uchrashuvda "Ordabasi" 2:0 hisobida g'alaba qozondi. O'zbekiston milliy terma jamoasi hujumchisi Aleksandr Geynrix uchrashuvning 72-daqiqasida zaxiradan maydonga tushgan.
— deya xabar beradi uff.uz nashri.