Saytimiz muxlislari uchun yana bir yangilik. Endi siz har hafta boshida oldingi haftada sodir bo'lgan o'zbek va jahon futbolidagi eng sara yangiliklarni faqat bizda kuzatib borishingiz mumkin.
Bugun esa 2-8 may kunlari o'zbek va jahon futbolida ro'y bergan muhim 5 voqeya borasida so'z yuritamiz. Ushbu loyihamizning birinchi sonida quyidagi mavzular borasida to'xtalib o'tamiz.
1. “Lokomotiv” o'z tarixida birinchi marta OChLning pley-off bosqichiga yo'l oldi.
2. “Sho'rtan” Oliy Liganing 8-turiga kelib bu mavsumdagi birinchi g'alabasini qo'lga kiritgan bahsda Igor Taran faoliyatidagi birinchi xet-trigini nishonladi.
3. “Lester” APL chempionligini qo'lga kiritdi.
4. “Atletiko” Ispaniya chempionligi uchun kurashdan chiqdi.
5. EChL finali yana “Madrid derbisi” bo'ladi.
1. “Lokomotiv” o'z tarixida birinchi marta OChLning pley-off bosqichiga yo'l oldi.
O'tgan hafta seshanba va chorshanba kunlari OChL-2016 guruh bosqichining so'nggi 6-tur o'yinlari o'tkazildi. Unda yurtimiz sharafini himoya qilayotgan 4 klubimizdan 3tasi o'zining oxirgi bahsini o'tkazdi. Faqatgina “Lokomotiv” keyingi bosqichga yo'l olgan O'zbekistonning yagona jamoasi bo'ldi.
Pley-offga yo'l olgan 16 jamoa orasida “Lokomotiv”ning borligi muxlislarni biroz bo'lsada, ovutdi. Lekin qolgan 3 klubimiz guruh bosqichidayoq qolib ketishi dillarni ancha xira qildi.

E'tiborlisi, bu mavsum OChL guruh bosqichida mag'lubiyatga uchramagan 2 jamoaning biri “Lokomotiv”dir. Asosiysi, toshkentliklar o'z tarixlarida birinchi marta guruh bosqichini ijobiy hal qilishdi.
“Lokomotiv” guruhdagi oltita o'yinning ikkitasida zafar quchib, to'rt bor durang qayd etdi. Bundan tashqari, Andrey Miklyaev shogirdlari oxirgi ikki yildan beri davom etib kelayotgan noxush an'anaga barham berishdi. Ular o'z tarixlarida birinchi marta pley-off bosqichiga yo'l olishdi.
Ma'lumot o'rnida, Osiyo chempionlar ligasining guruh bosqichidan oxirgi marta 2013 yil “Bunyodkor” chiqqandi. 2014-2015 yilgi mavsumlarda esa hech qaysi klubimiz bu vazifani uddalay olmadi va mana endi 2016 yilga kelib “Loko” klublar o'rtasidagi Osiyoning eng nufuzli musobaqasida mamlakatimiz sharafini himoya qilishda davom etadigan bo'ldi. Bu O'zbekiston uchun keyingi yil beriladigan o'rinlar koeffitsientiga ta'sir qilishi turgan gap.
Eslatib o'tamiz, OChL-2016 1/16 finalini “Lokomotiv” Saudiya Arabistonining “Al Hilol” klubiga qarshi o'tkazadi.
]2. “Sho'rtan” Oliy Liganing 8-turiga kelib bu mavsumdagi birinchi g'alabasini qo'lga kiritgan bahsda Igor Taran faoliyatidagi birinchi xet-trigini nishonladi.
7 may kuni Oliy Liga 8-turidan o'rin olgan bir qator o'yinlar o'tkazildi. Unda “Sho'rtan” o'z maydonida “So'g'diyona”ni qabul qildi.
Shu paytga qadar g'alaba nima ekanligini bilmay kelayotgan g'uzorliklar so'nggi turda jizzaxliklarni qabul qilib 4:2 hisobidagi g'alabaga erishishdi. Bu o'yindan oldin “So'g'diyona” 8-o'rinda borayotgandi. “Sho'rtan” esa 15-pog'anada. G'alabadan so'ng g'uzorliklar bir pog'ona ko'tarilishgan bo'lsa, Davron Fayziev shogirdlari 10-o'ringa tushib qolishdi.
E'tiborga molik tomoni shundaki, ushbu bellashuvda “Sho'rtan” futbolchisi Igor Taran 3ta gol urishga erishdi. Bu xet-trikk Taranning faoliyatidagi dastlabkisi bo'ldi.
Ma'lumot o'rnida, Taran uchrashuvning 29, 42 va 75-daqiqalarida jizzaxliklar darvozasini ishg'ol qilishga erishdi.
3. “Lester” APL chempionligini qo'lga kiritdi.
O'tgan haftada butun dunyo orziqib kutgan chempionlik rasmiylashtirildi. Angliya chempionatining 36-turida “Lester” “Manchester Yunayted” maydonida durang o'ynagandan so'ng barchaning e'tibori “Chelsi” – “Tottenxem” bahsiga qaratildi. Ushbu bellashuvda esa tomonlar darvozalarni 2 martadan ishg'ol qilishdi. Bu natija “shporlar”ning chempionlikdan umidini batamom uzgan bo'lsa, “Lester”ning orzularini amalga oshirdi. Klaudio Raneri murabbiy sifatida faoliyatida birinchi marta chempionlikni qo'lga kiritdi.
 
Ushbu mutaxassis oldingi ishlagan joylarida doim 2-o'rinni qo'lga kiritgan. “Tulkilar” bilan esa butun dunyoni larzaga solib APL g'olibiga aydandi.
Bundan tashqari Germaniyada “Bavariya”, Shotlandiyada “Seltik” ham mamlakat chempionligini qo'lga kiritdi. Bu voqeliklar borasida ortiqcha to'xtalishning hojati yo'q. Sababi bular ketma-ket mamlakat chempionligiga erishi kelmoqda.
4. “Atletiko” Ispaniya chempionligi uchun kurashdan chiqdi.
Ispaniyaning “Atletiko” klubi mamlakat chempionligi uchun kurashayotgandi. Ammo o'tgan haftada madridliklar La Liga turnir jadvalida 3-o'ringa tushib qolishdi. Diego Simeone jamoasi 8 may kuni “Levante” maydonida 1:0 hisobida oldinda borayotib, yakunda 2:1 hisobida mag'lubiyatga uchradi. Bu natija esa “matraschilar”ni katta ehtimol bilan chempionlik uchun kurashdan chiqardi. Endi Ispaniya chempionligi uchun so'nggi turda “Barselona” va “Real” bahs olib boradi.
Shuni qayd etib o'tish kerakki, 2013-2014 mavsumda “Atletiko” Ispaniya chempionligini qo'lga kiritgandi. Ammo EChLda Madridning yana bir jamoasi “Real”ga imkoniyatni boy bergan. Balki “xindular” ikki “front”da kurash olib borishga imkoniyati etmagani uchun La Liga chempionligini qurbon qilish orqali EChLda g'olib bo'lishni maqsad qilgandir.
Davomi Sports.uz blogida.
— deya xabar beradi uff.uz nashri.