Yana to'rtta turdan so'ng, O'zbekiston XXIV milliy chempionati oliy liga jamoalari bahslariga yakun yasaladi. Taqvimga ko'ra, yigirma ettinchi tur o'yinlari 25 oktyabr kuni boshlanadi. Shu kuni muxlislar «Qo'qon-1912» (Qo'qon) – «Metallurg» (Bekobod), «Sho'rtan» (G'uzor) – «Mash'al» (Muborak) jamoalari uchrashuviga guvoh bo'lishadi. Qolgan beshta uchrashuv esa 26 oktyabrda o'tkazilishi belgilangan. Unda «Buxoro» (Buxoro) – «Navbahor» (Namangan), «Olmaliq» (Olmaliq) – «Neftchi» (Farg'ona), «Qizilqum» (Navoiy) – «Lokomotiv» (Toshkent), «Nasaf» (Qarshi) – «Bunyodkor» (Toshkent), «Paxtakor» (Toshkent) – «Dinamo» (Samarqand) juftliklari maydonga tushadi. O'zbekiston Professional futbol ligasi Hakamlar qo'mitasi qaroriga muvofiq, Navoiyda bo'ladigan «Qizilqum» – «Lokomotiv» jamoalari bahsini FIFA referisi, poytaxtlik Baxtiyor Namozov boshqarib boradi. Unga laynsmenlar poytaxtlik Ruslan Serazitdinov hamda Sanjar Shoyusupovlar ko'maklashadi. Yoshlar ligasi doirasidagi uchrashuv bosh hakami va asosiy tarkiblar o'yini zaxira hakami etib, qarshilik Komiljon Rasulov tayinlangan. Uchrashuvlarni Respublika toifasidagi hakam poytaxtlik Arslon Hotamov kuzatib boradi. Eslatib o'tamiz, yoshlar ligasi uchrashuvi Karmana tumanidagi “Qizilqum” PFK qoshidagi BO'FM stadionida bo'lib o'tadi. Uchrashuv 25 oktyabr kuni soat 15.00 da boshlanadi. «Qizilqum» – «Lokomotiv» jamoalari asosiy tarkiblari bahsi esa 26 oktyabr kuni soat 17.00 da start oladi. Bu o'yin Navoiydagi “So'g'diyona” stadionida o'tkaziladi.
— deya xabar beradi uff.uz nashri.