Yaqindagina Angliya futbolida anchayin xunuk bir manzara kuzatildi. «Arsenal» muxlislari «Norvich»ga qarshi kechgan uchrashuvda Arsen Vengerga atalgan salbiy ma'noli so'zlar bitilgan bannerni ko'tardilar: «Vengerning 12 yili - bahonalar. Ranerining 9 oyi esa - chempionlik!»
Muxlislar bu bilan nimaga sha'ma qilishganini tushundingiz, albatta. Mana, 12 yildirki, Arsen Venger «Arsenal» bilan premer-ligada g'olib chiqish vazifasini bajarolmayapti. Bir vaqtlar g'oyat kuchli sanalgan va «Manchester Yunayted»ni «Old Trafford»da ham yirik hisobda «er tishlatgan» jamoadan hozir soya qolgan, xolos, de-yish noo'rinu, ammo «kanonirlar»ning o'sha vajohati qaergadir yo'qolganini inkor etish qiyin. Albatta, pasayishning sabablari ko'p. Aytaylik, jamoa 5-6 yil muqaddam moliyaviy inqiroz yoqasida edi va etakchi futbolchilarini sotishdan o'zga chora topolmagandi. Shundan buyon ko'p suvlar oqib o'tdi, xususan, «Arsenal»ning yangi stadioni daromad keltira boshladi, kuchli futbolchilar xarid qilindi... Ammo «to'pchilar» hamon oltin medalsiz qolib ketmoqdalar, baribir.
Hozir biz «Arsenal»ning inqirozi xususida gapirmoqchi emasmiz. Umuman, bunga hojat ham yo'q. Zero, Arsen Vengerning qachon muxlislar nazaridan qola boshlaganini hamma yaxshi biladi. Murabbiyning «Arsenal»dagi nufuziga putur etgani aniq. Yomon tomoni, shu obro' endi avvalgi holidek qayta tiklanmasa kerak. Qachon shunday bo'ldi, nimaga shunday bo'ldi - bunisi endi o'ninchi darajali masala. Bilganimiz shuki, Venger o'z vaqtida ketishni bilmadi. Agar u loaqal 2 yilcha oldin ketganida ham, «Arsenal» fanatlari uchun ideal murabbiyligicha qolardi, balki. To'g'ri, har qanday holatda ham, Arsen Venger «Arsenal» uchun afsonaviy murabbiy sifatida qolaveradi.
Ammo endi u haqda yoziladigan maqolalar xotimasida premer-ligadagi muvaffaqiyatsiz urinishlari eslanishi turgan gap. Balki «Arsenal»ning ashaddiy muxlisi bu fikrimizga qarshi chiqishi va Venger kelasi yil chempionlikni ta'minlab, barcha tanqidchilar og'zini yumib qo'yishini aytar. Biz aslo e'tiroz bildirmoqchi emasmiz. Ammo bitta savol bor - «Arsenal» asosiy nahanglar - «Manchester Siti», «Manchester Yunayted» va «Chelsi» yoppasiga qoqilgan mavsum chempion bo'lolmadimi, yana qachon buni uddalashi mumkin?
Mayli, bunday gaplarni to'xtataylik. Aslida maqola orqali premer-ligada ro'y bergan holatdan kelib chiqib, o'zbek futboli, aniqrog'i, etakchi o'yinchilarimizdan biri haqida mulohaza bildirmoqchi edik. Hozir O'zbekiston milliy jamoasida yangilanish davri ketmoqda. Mana, bir qator etakchilar asosiy tarkibdan ketishdi yoki zaxira o'rindig'idan muqim joy olishdi - Temur Kapadze, Ulug'bek Baqoev, Ignatiy Nesterov... Ularning o'rni yoshlar hisobiga to'ldirilmoqda. Muhimi, yangilanish jarayoni muvaffaqiyatli amalga oshirilmoqda. Har holda, terma jamoamiz qatorasiga 8ta o'yinda g'alaba qozondi va o'ziga xos rekord qayd etdi. Ayni payt jamoamizda eng yoshi katta futbolchi - bu Server Jeparov.
Bizning nigohimiz aynan unga qaratiladi. Serverning futboldagi eng yaxshi davri ortda qolgani hech kimga sir emas. Buni hattoki, terma jamoa bosh murabbiyi Samvel Babayan ham his qilib turibdi. Axir u bejiz Serverdan sardorlik bog'ichini olib, Odil Ahmedovga topshirmadi. Jeparov bir vaqtlar butun Osiyoning eng yaxshi futbolchilaridan edi, to'p unga tushgani hamono qandaydir o'zgarish, keskinlik kutardik. Uning  o'sha mahorati hozir ham bor. Har holda, asosiy tarkibda maydonga tushib turibdi. To'liq 90 daqiqa o'ynamayotgani va mudom zaxiraga olinayotgani esa, boshqa masala. Babayan uni maydonga tushiryaptimi, demak, jamoaga foyda keltirishiga ishonadi. Ishongani uchun ham chaqirmoqda.
Ammo hamma gap shundaki, xoh murabbiy bo'lsin, xoh futbolchi - imkoniyati qay darajadaligini boshqalardan ko'ra, o'zi yaxshiroq biladi. Masalan, «Arsenal» rahbariyati Arsen Vengerga har doim ishonch bildirgan. Hozir ham shunday. Ammo bu holat murabbiyning jamoa boshqaruvida yana necha yildir qolishi uchun asos bo'lib xizmat qilmasligi kerak. Shunday yondashuv ikki tomonga ham zarar keltirishi turgan gap.
Shu o'rinda yana bir taqqos - 2006 yili «Real» rahbariyati Zayniddin Zidanga ishonishini bildirgan va uni faoliyatini tugatmaslikka ko'ndirishga urinib ko'rgandi. Ammo frantsiyalik dahoning qarori qat'iy bo'ldi va JCh-2006dan so'ng butsalarini mixga ildi. Muxlislar esa hozirga qadar Zidanning o'yinini sog'inch bilan tilga oladilar va eski lavhalarni entikib-entikib tomosha qiladilar. Zidan «Real» boshqaruvini qo'lga olgan kezda hattoki, «Barselona» muxlislari ham  unga hurmat bilan qaraganlari ayni haqiqat.
Aynan shunday fikrlarni «MYu» bosh murabbiyi Aleks Fergyusonga nisbatan ham aytish mumkin. Shotlandiyalik murabbiy faoliyatini o'z vaqtida yakunladi va hozirda uning nomini faqat va faqat hurmat bilan tilga oladilar. Afsuski, Arsen Venger bilan xuddi shunday bo'lishiga ishonish ancha qiyin. Endi qiyin.
Davomi Akmal Eshonxonov blogida.
— deya xabar beradi uff.uz nashri.