Samarqand viloyati Pastdarg'om tumanida 2014 yili ish boshlagan “Olimp” bolalar yopiq suv havzasining ochilish marosimida ishtirokchilar bu erdagi sharoitga hayratu havas bilan qaragan bo'lsa-da, maskanning qishin-yozin faoliyat ko'rsatishiga ishonqiramaganlar ham bo'lgan edi. Ammo keyinchalik bu shubhaga o'rin qolmadi. Ayni paytda 200 nafar o'g'il-qiz yilning to'rt faslida ham sport saroyiga kelib, suzish bilan shug'ullanmoqda.
Prezidentimiz rahnamoligida yosh avlodning sport bilan shug'ullanishi, jismoniy sog'lom ulg'ayishi uchun barcha sharoit va imkoniyatlar yaratilmoqda. Davlatimiz rahbari tashabbusi bilan 2002 yilda tashkil etilgan O'zbekiston Bolalar sportini rivojlantirish jamg'armasi mablag'lari hisobidan shaharu qishloqlarimizda har yili o'nlab muhtasham sport inshootlari, bolalar musiqa va san'at maktablari bunyod etilmoqda, zamonaviy jihozlanmoqda.
Samarqand viloyatida o'tgan yillarda 300 ga yaqin sport inshooti hamda bolalar musiqa va san'at maktabi qurildi va rekonstruktsiya qilindi. Joriy yilda yana 50 ga yaqin ob'ektda qurilish-ta'mirlash ishlari amalga oshirilmoqda. Bu inshootlarning asosiy qismi qishloq hududlarida bunyod etilmoqda.
– Biz o'qigan yillarda butun tumanimizda atigi ikkita maktabning sport zali bor edi, – deydi Pastdarg'om tumani Po'latchi mahallasida yashovchi mehnat faxriysi Sulton Beknazarov. – Tuman miqyosidagi olimpiada va musobaqalar faqat shu maktablarda o'tkazilardi. Bizning maktabimizda sport mashg'ulotlari sinfda yoki ochiq maydonda o'tkazilgani sababli musobaqalarda ko'ngildagidek qatnasha olmasdik. Suzish havzasi haqida-ku tasavvur ham qila olmasdik. O'zim ham Samarqand shahridagi jismoniy madaniyat bilim yurtiga o'qishga kirganimdan so'ng suzish havzasini ko'rganman. Bugun sport zali bo'lmagan maktab deyarli qolmadi. Qishloqlarimizda zamonaviy sport majmualari bunyod etildi. Tumanimiz markazida bolalar va o'smirlar sport maktabi faoliyat ko'rsatmoqda. O'tgan yili ushbu maktab tarbiyalanuvchilaridan ikki nafari – Diyora Keldiyorova hamda Jahonoy Turkmanova dzyudo va sambo bo'yicha jahon chempioni bo'ldi. 2014 yilda maktab qoshida bolalar yopiq suv havzasi tashkil etildi. Bu erda yuzlab yoshlar qatori nabiram Humoyunbek ham sport bilan shug'ullanyapti. Uni mashg'ulotlarga olib kelib, farzandlarimizning zamonaviy, barcha sharoitlarga ega inshootlarda shug'ullanayotgani, har tomonlama sog'lom bo'lib o'sayotganini ko'rib quvonaman. Bularning barchasi Prezidentimizning yoshlarga bo'lgan katta e'tibori va g'amxo'rligi samarasidir.
– Bugungi kunda 7 yoshdan 16 yoshgacha bo'lgan 200 bola, jumladan, 50 dan ortiq qizlar mashg'ulotlarda muntazam qatnashmoqda, – deydi “Olimp” bolalar suv havzasi direktori Sohib Mamasoliev. – Qo'shimcha guruhlarda 70 nafar yoshlar suv sporti bilan shug'ullanayotir. Suv tarkibi, harorati har kuni laboratoriya tekshiruvidan o'tkaziladi. Belgilangan talablarga javob bersagina mashg'ulot o'tkazishga ruxsat beriladi. Suvga tushishidan oldin har bir bolaning salomatligi, jismoniy va ruhiy holati o'rganiladi. Umuman, suv sporti barcha yosh toifasidagi kishilar salomatligi, jismoniy rivojlanishida muhim ahamiyat kasb etishi tufayli shug'ullanuvchilar safi tobora kengayib bormoqda.
O'zbekiston Xotin-qizlar qo'mitasining ayollar o'rtasida suv sportini ommalashtirishga oid tashabbusiga javoban yaqinda xotin-qizlar uchun alohida guruhlar tashkil etdik. Haftada bir kunni faqat ular uchun ajratib, havzadan foydalanishlari uchun barcha imkoniyatlar yaratildi. Shifokorlarimiz ularga zarur maslahat va tavsiyalar bermoqda.
Faoliyat boshlaganiga hali ko'p vaqt bo'lmagan esa-da maskanda o'nlab iqtidorli yoshlar kashf etilib, viloyat miqyosidagi musobaqalarda yuqori natijalarga erishmoqda. “Umid nihollari” musobaqalarining saralash bosqichida 6 nafar o'g'il-qiz g'olib bo'ldi. Bundan tashqari, markazning o'zida ham tez-tez musobaqalar o'tkazilib, iste'dodli sportchilar rag'batlantirib borilmoqda. Ayni paytda bu erda 1 iyun – Xalqaro bolalarni himoya qilish kuni munosabati bilan tuman birinchiligini o'tkazishga hozirlik ko'rilayotir.
Manba: UzA
— deya xabar beradi uff.uz nashri.