O'tgan hafta O'zbekiston PFL direktori Farhod Magometov qozog'istonlik hamkasbini qabul qildi. Ya'ni Qozog'iston PFL rahbari Oljas Shakenovich Abraev yurtimizda mehmon bo'lib, Farhod Magometov bilan maxsus uchrashdi. Aslida ancha yosh bu mutaxassis (1984 yilda tug'ilgan) Qozog'iston professional futbol ligasini boshqarish barobarida yana bir necha lavozimlarda faoliyat yuritadi. Xullas, Abraev Qozog'iston futbol federatsiyasi Ijroiy qo'mitasi a'zosi, QFF vitse-prezidenti, UEFA delegati va Marketing qo'mitasi a'zosi, shuningdek, FIFA komissari sanalar ekan. Ha, birdaniga shuncha ish bilan bandligi mehmonning qay darajada jiddiyligidan dalolat beradi...
Ammo shu o'rinda hurmatli mehmonimizga kichik e'tiroz bildirsak, ma'zur tutasiz. Aftidan, Oljas Shakenovich yurtimizga kelishi haqida PFL va uning rahbari Farhod Magometovni oldindan ogohlantirib qo'ymagan ko'rinadi. «Qaerdan bilding?» - deysizmi? Albatta, hammamiz uchun qadrli PFLda nimalar bo'layotganini bilib turish qiyin. Chunki bu tashkilot ishi doim ham vaqtida yoritilmaydi va ko'p narsadan xabar topish - mushkul masala. Biroq o'sha uchrashuvning ba'zi tafsilotlari ma'lum bo'ldiki, shunday xulosaga keldik.
Avvalo, shuni ta'kidlab o'taylik, professional futbol ligasi bu safar ham an'anaga xilof tarzda ish tutgani yo'q. Ya'ni tashkilotning rasmiy saytida Abraev tashrifi haqida hech qanday ma'lumot berilmadi. Xullas, Oljas Shakenovich bilan tashkilotlar doirasida uchrashuv o'tkazilgani xususida internet tarmog'idagi boshqa bir saytdan xabar topdik. Bilganlarimiz esa bizni shunday xulosa chiqarishga majbur qildi - aftidan, Farhod Magometovning bu uchrashuvdan mutlaqo xabari bo'lmagan. Nima uchun deysizmi? Buning bir qator sabablari bor.
Birinchidan, Qozog'iston PFL rahbari Oljas Shakenovich Abraev rasmiy uchrashuvga muvofiq tarzda kiyinib kelgan. Ya'ni mehmonning egnida kostyum-shim bo'lib, galstuk ham uning rangiga mos darajada tanlangan. Shu manzara Abraevning yurtimizga kelish oldidan obdon tayyorlanganiga dalolat. O'zbekiston professional futbol ligasi rahbarichi, u qanday holatda? Xo'sh, bu savolga qanday javob bersak ekan...? Masalan, siz shaxsiy uyingizda qanday ko'rinishda yurasiz? Tabiiyki, o'zingiz uchun qulay tarzda kiyinasiz, to'g'rimi? Engilroq shim, engilroq ko'ylak yoki futbolka, shippak va hattoki, pijamada yurishingiz mumkin. Farhod aka ham PFLni o'z uylaridek biladi, shekilli, qozog'istonlik hamkasbi kelgan vaqt ancha qulayroq libosda ko'rinish bergan. Buni o'sha internet saytida havola qilingan suratlardan bilib oldik. Aftidan, Farhod aka ertalab ishga yo'l olar ekan, Qozog'iston professional futbol ligasi direktorini rasmiy mehmon sifatida qabul qilishini bilmagan. Aks holda, shunga muvofiq kiyinib olgan bo'lardi, shunday emasmi? Axir PFL qimmatbaho restoran emas-ki, u erda har kuni «dress-kod» joriy etilgan va mudom qandaydir uslubda kiyinib kelish shart qilib qo'yilgan bo'lsa... Shunday ekan, tashkilot direktori qulay kiyimda yuradi-da, axir. Qozog'istonlik do'stlarimiz esa bir og'iz ogohlantirib qo'yishmagan - bu ularning ayblari.
Biroq bu hali hammasi emas. Oljas Shakenovich PFLga bildirmay kelar ekan, mezbonlarni ancha xijolatga qo'yishini o'ylamagan, shekilli. Chunki suratlardan yana shuni ko'rsa bo'ladi-ki, qo'noqlarimiz rasmiy uchrashuvga mos tarzda o'ziga xos suvenir olib kelishgan. PFL rahbarining shu sovg'ani qabul qilib olayotgani muhrlangan suratni ham ko'rdik. Ammo shunga mos tarzda Oljas Abraevga biror esdalik berilayotgani  tasvirlangan fotoni hech qaerdan topolmadik. Mayli, bu narsaga indamay ko'z yumib ketamiz, chunki aslida shunday sovg'a berilgan, ammo o'sha lahza fotoapparat e'tiboridan chetda qolgan bo'lishi ham mumkin-ku, to'g'rimi? Shuni nazarda tutib, sovg'a almashish jarayoniga u qadar katta ahamiyat qaratmadik. Ammo boshqa masala yuzasidan optimistik fikr bildirolmaymiz. Bilasizmi, nima uchun?
Gap shundaki, odatda bunday darajadagi uchrashuvlardan so'ng albatta, matbuot uchun qandaydir rasmiy bayonot beriladi. Boisi, ikki tashkilot rahbari uchrashdi. Demakki, ular shaxsiy gap-so'zlar asnosida hangomalashish uchun yig'ilmaganlar. Bunday uchrashuvlarda hamkorlik masalalari ko'rib chiqilishi va yana qandaydir qarorlar qabul qilinishi ehtimoli baland. Odatga ko'ra, bu haqda uchrashuvdan so'ng biror rasmiy bayonot bildirilishi kerak. Axir Qozog'iston PFL direktori va hatto FIFA hamda UEFA darajasida bir talay lavozimlarda faoliyat yuritadigan mutaxassis yurtimizga shunchaki,  Farhod aka bilan gurunglashib ketish uchungina kelmagandir?
Davomi InterFUTBOL gazetasi blogida.
— deya xabar beradi uff.uz nashri.