Qozog'istonda engil ateltika bo'yicha o'tkazilgan mamlakat ochiq kubogida terma jamoamiz a'zosi Nigina Sharipova XXXI yozgi Olimpiada o'yinlarining yo'llanmasi uchun belgilangan me'yorni bajardi.
100 metr masofaga yugurish sektorida Vatanimiz sharafini himoya qilgan Nigina Sharipova saralash bosqichida 11.35 soniya natija qayd etib, hal qiluvchi final bosqichiga chiqdi. Hal qiluvchi bosqichda o'z natijasini yanada yaxshilashga muvaffaq bo'lgan Nigina belgilangan masofani 11,31 soniyada bosib o'tdi va Olimpiada o'yinlarining yo'llanmasi uchun belgilangan me'yorni (11,32 soniya) bajardi.
Buxoro engil atletika maktabi tarbiyalanuvchisi Nigina Sharipovaning yo'llanmasi mamlakatimiz engil atletikachilari tomonidan "Rio-2016" Olimpiada o'yinlariga qo'lga kiritilgan o'ninchi yo'llanma hisoblanadi.
Eslatib o'tamiz, bunga qadar engil atletikachilarimizdan Sitora Hamidova (marafon, ikkita yo'llanma),Svetlana Radzivil (balandlikka sakrash), Suxrob Xo'jaev (bosqon uloqtirish), Marina Xmelevskaya (marafon), Bobur Shokirjonov (nayza uloqtirish), Ekaterina Voronina (ettikurash), Andrey Petrov (marafon) va Nadiya Dusanova (balandlikka sakrash) Olimpiada o'yinlarining yo'llanmalari uchun belgilangan me'yorni bajarishgan.
Shavkat Jalilov
O'zbekiston Milliy Olimpiya qo'mitasi
matbuot xizmati

— deya xabar beradi uff.uz nashri.