Xabaringiz bor, ayni paytda “Lokomotiv” futbol klubining ikki nafar tarbiyalanuvchisi Angliya birinchi divizioni vakili “Flitvud Taun” safida o'z mahoratlarini oshirmoqda. Bular – darvozabon Rustam Nartajiev va himoyachi Sergey Proxorov. Har ikkala klubning o'zaro hamkorligiga ko'ra, futbolchilarimiz u erda uch oy malaka oshirishadi.
O'zbekistonlik futbolchilar “Flitvud Taun”da Berri Nikolson qo'l ostida mashg'ulotlarda ishtirok etishyapti. Yaqinda yosh darvozabonimiz Rustam Nartajiev “Flitvud Taun” klubi rasmiy saytiga intervyu berib, Angliyadagi hayoti haqida gapirib berdi.
“Menga bu erdagi hayot yoqyapti. Mashg'ulotlarda astoydil ishlayapmiz. Qolaversa, ba'zi paytlarda yosh bolakaylarni shug'ullantiryapman. Avvallari bolalar bilan birga ishlamagandim va bu ish menga yoqib qoldi. Ehtimol, shu narsa sabab bo'lib faoliyatimni yakunlaganimdan so'ng darvozabonlar murabbiyi bo'lib ishlasam ajab emas”.
“Proxorov ikkalamiz bu erga 18 sentyabr kuni kelgandik. Shundan beri oradan bir oy vaqt o'tdi va hozircha aslo zerikkanimiz yo'q. Menga Angliyaning ob-havosi ham ma'qul keldi. Bu erda havo bizga nisbatan ancha iliq ekan. Jamoadoshlarim Seryoga ikkalamizga ko'p narsa o'rgatishyapti: mahalliy urf-odatlar, ingliz tilida gapirish. Hozir inglizchani ancha yaxshi o'rganib oldim”.
“Bu erdagi mashg'ulotlar juda og'ir ekan. O'zbekistonda har kunlik mashg'ulot deyarli bir xil davom etadi. Angliyada esa har kuni har xil mashqlarni bajaramiz va bu menga yoqyapti”.
“Bizda kuniga bir mahal mashg'ulot bo'lardi, bu erda esa ba'zan bir kunda uch marta shug'ullanamiz. Men har kuni o'zimda o'zgarishlarni va o'sishni his qilyapman. Bu erda o'rganayotganlarim keyinchalik juda asqotadi deb o'ylayman”.
— deya xabar beradi uff.uz nashri.