Frantsiya mamlakatida o'tadigan futbol bo'yicha Evropa Chempionatining boshlanishiga ham oz vaqt qoldi. Shubhasiz, o'zbekistonlik ishqibozlar mazkur musobaqani katta qiziqish bilan kuzatib borishadi. 24ta terma jamoa bosh sovrin uchun kurashga kirishadi.
Hatto, ko'pchilik Evro-2016ni kichik Jahon chempionatiga qiyoslamoqda. Mavqei, auditoriyasi va ko'rimliligi bilan JChlardan qolishmasligi ta'kidlanmoqda.
Tabiiyki, bunaqa paytda har qanday futbol muxlisida jarayonni kuzatib borish, kerak bo'lsa uzluksiz ravishda voqelik bilan oshno bo'lshi istagi paydo bo'ladi. Buni haqiqiy futbol shinavandasi juda yaxshi biladi.
UFF.uz sayti shu paytgacha katta-katta futbol musobaqalarini joyning o'zidan turib yoritib kelgan. An'ana bu safar ham o'zgarmay qoldi. Nasib qilsa, boshlanajak chempionat saytimiz vakillari tomonidan imkon qadar yoritib boriladi.
Shu o'rinda Evro-2016 atrofidagi tashkiliy masalalar va jurnalistlarga beriladigan kvotalar haqida ikki og'iz so'z aytib ketsak. Chunki, buni muxlislar bilishi shartdir.
Demak, Evro-2016 o'yinlari Evropa qit'asida o'tmoqda. Uni 4.000 dan ziyod jurnalistlar yoritib boradi. Butun dunyo jurnalistlaridan 50.000 dan ortiq ariza kelib tushgan. Lekin ularning deyarli 90% dan ortig'iga rad javobi berilgan. Nega?
Musobaqada ishlaydigan jurnalistlarga uchun kvotalar taqsimoti quyidagicha belgilangan:
1. Birinchi bo'lib, Evro-2016da ishtirok etayotgan terma jamoalarning mamlakatlaridan kelgan jurnalistlarga akkreditatsiya beriladi
2. Ikkinchi bo'lib, Evro-2016 translyatsiya huquqini sotib olgan mediakorxonalarning jurnalistlariga akkreditatsiya beriladi
3. Uchinchi bo'lib, Evropaning boshqa davlatlaridan (Evrodan termasi qatnashmaydigan) kelgan jurnalistlarga akkreditatsiya beriladi.
4. To'rtinchi bo'lib, dunyo miqyosidagi gigant media-korxonalarining (ESPN, New York Times, Al JAseera, Asahi, Sky Sports va hokazo) jurnalistlariga akkreditatsiya beriladi
va ana shundan keyin kvotalar ortib qolsagina boshqalarga akkreditatsiya beriladi. Kvotalar esa, bulardan ortmaydi.
Tabiiyki, O'zbekistonning bironta jurnalistiga ham akkreditatsiya berilmadi. Hatto, Qozog'iston va Ozarbayjonning ko'zga ko'ringan nashrlari ham akkreditatsiya ololmagan.
UFF.uz sayti ham ushbu musobaqani yoritish istagida akkreditatsiya olish uchun ariza topshirgandi va bunga rad javobini oldi. UEFA mutasaddilari kvotalarning o'zbekistonlik jurnalistlargacha etib kelmaganini asos qilib ko'rsatishdi.
Shu yilning yanvar oyi oxirlarida akkreditsiya berilmaganligi borasida UEFAdan rasmiy xat oldik.
Nima qilish kerak?
Nahotki, o'zbekistonlik ishqibozlar joyning o'zidan turib etkazilayotgan xabarlardan bebahra qolsa, degan savollar bizni tinch qo'ymasdi. Men San'at bilan maslahatlashib, keyingi strategiyani belgilash borasida rejalarni tuza boshladik. Bu orada San'at Shveytsariyadagi FIFAga qarashli "Xalqaro futbol kurslari"da tahsil olayotgandi.
Vaziyatni chuqur o'rganib chiqib, nima qilib bo'lsa ham Evroga borish uchun echib topishga harakat qildik. Nihoyat, San'at Sharipovning say'-harakati va uning FIFAdagi tanishlari orqali UFF.uz sayti uchun bitta akkreditatsiya olishga muvaffaq bo'ldik.
Ha, UEFA mutasaddilari UFF.uz saytini qaytadan maxsus o'rganib chiqib, O'rta Osiyo davlatlari orasida yagona bo'lgan huquqni saytimizga taqdim etdi. Izlagan imkon topadi, deganlari haq bo'lib chiqdi. To'g'ri, O'zbekistondan transltsiya huquqini sotib olgan "UzreportTV" vakillari ham ishtirok etishadi. Ular TV maqomida faoliyat yuritishadi. Biz esa, Internet nashr sifatida faoliyat olib boramiz.
Evroo'yinlar o'tadigan stadion atroflari, muxlislar uchun ajratilgan "fan-fest"lar, media-markazdagi bo'layotgan vaoqelar va bevosida stadion ichidagi muhit ishqibozlarimizga imkon qadar etkaziladi. Ular ham voqelikni joyning o'zidan his qilib borishadi. Nasib qilsa, kelasi hafta men va San'at ikkimiz Frantsiya qaydasan deb, yo'lga chiqamiz. U erda topganimizni siz bilan birga baham ko'ramiz.
Saytdan yiroqlashmay turing, katta futbol bayrami boshlanmoqda. A.Akbarov
— deya xabar beradi uff.uz nashri.