Bugun Jasur Abdurayimov boshchiligidagi O'zbekiston yoshlar terma jamoasi Bahrayn mamlakati mezbonlik qilayotgan yoshlar o'rtasidagi qit'a birinchiligining chorak finalida Eron termasiga qarshi maydonga tushadi. Mazkur uchrashuvning qiymati juda yuqori. Sababi ushbu o'yindagi g'alaba bir yildan so'ng Janubiy Koreya mamlakati mezbonlik qiluvchi JChga yo'llanmani taqdim etadi. Biz o'z odatimizga ko'ra bo'lajak raqibimiz to'g'risidagi faktlarni e'tiboringizga havola etamiz.
1. Eron yoshlar terma jamoasi mazkur yosh toifasida o'tkazilgan 39 ta OChning 20 tasida ishtirok etgan(bu yilgisi ham inobatga olingan);
2. Qit'a birinchiligida 20 bor ishtirok etgan eronliklar mazkur musobaqada to'rt bor g'olib chiqishgan, bir bor finalda mag'lub bo'lishgan bo'lsa, ikki bora turnirda 3 o'rinni qo'lga kiritishgan. Lekin bu natijalar 70 yillarda qolib ketgan. Faqatgina 2000 yilga kelib Eron yana katta sahnaga chiqadi. Bu safar OChda 4 o'rinni qo'lga kiritgan forslar Argentinada o'tadigan JCh yo'llanmasini qo'lga kiritishadi. Shundan buyon ular hali JChga chiqa olishganicha yo'q;
3. Eron yoshlar terma jamoasi o'z yosh toifasidagi o'tkazilgan 20 ta JChning faqat 2 tasida ishtirok etgan (1977 va 2001 yillar);
4. Eron yoshlar terma jamoasi o'z tarixda 13 bor Osiyo chempionatida chorak finalga etib keldi. Ularning faqatgina 5 tasida forslar mag'lub bo'lib ortga qaytishgan;
5. Eron yoshlar terma jamoasi O'zbekiston bilan o'yinga qadar qit'a birinchiliklarida 86 ta o'yin o'tkazgan va ularning hisobida 52 ta g'alaba, 15 ta durang, shuningdek, 17 ta mag'lubiyat ham mavjud. To'plar nisbati 174-63 ni tashkil etadi;
6. 1997 va 1998 yillarda tavallud topgan futbolchilardan iborat mazkur jamoaga Amir Xusayn Peyrovani murabbiylik qiladi. U 2009-10 yillarda Eron olimpiya terma jamoasida yordamchi murabbiy bo'lib ishlagan;
7. 1997 va 1998 yillarda tavallud topgan futbolchilardan iborat mazkur jamoa o'tgan yili o'z maydonlarida o'tgan saralash o'yinlarida Quvayt, Iordaniya va Nepal termalari bilan kurash olib borgan. Eronlik yoshlar Nepalga 10 ta, Iordaniyaga 3 ta, Quvaytga esa 2 ta javobsiz to'p yo'llagan holda barcha o'yinlarni o'z foydalariga hal qilishgan;
8. Amir Xusayn Peyravani guruh bosqichida qaydnomadagi 23 futbolchining 18 nafarini maydonga tushirgan;
9. Guruh bosqichida forslar Qatar bilan 1-1, Yaponiya bilan 0-0 hisboda durang o'ynashdi. Faqatgina 3 turga kelib Yaman ustidan qozonilgan g'alaba ularni chorak final sari etakladi.
10. Eron termasi guruh bosqichida 2 ta gol urib, 1 ta gol o'tkazib yubordi. 23 raqamda to'p suruvchi Abulfazl Razzoqpur ushbu gollarning barchasiga mualliflik qilgani diqqatga sazovor. Qatarga qarshi o'yinda dastlab o'z darvozasini ishg'ol etib qo'ygan Abulfazl keyinchalik bu aybini “yuvib”, gol kiritadi. Yamanga qarshi o'yindagi yagona golni ham aynan 23 raqam egasi kiritgan.
— deya xabar beradi uff.uz nashri.