2016 yilning 14 avgust oqshomida millionlab yurtdoshlarimiz, sport ixlosmandlarining qalbi quvonchu shodlikka to'ldi.
Shu kuni Olimpiya o'yinlarining boks bo'yicha vazni 49 kilogrammgacha bo'lgan bokschilar bellashuvida qatnashgan o'zbek o'g'loni Hasanboy Do'stmatov oltin medalga sazovor bo'lib, dunyoda tengsiz ekanini isbotladi.  «Erudit SPORT» nashri “Eksklyuziv intervyu” loyihasining navbatdagi sonida yuqori tezlik va texnika sohibi bilan suhbatlashdi.
– Hasanboy, ma'lumotlarga qaraganda, charm qo'lqop kiyishingizdan avval o'zingizni karate hamda kikboksingda ham sinab ko'rgansiz. Nega aynan boks tanlovida to'xtagansiz?
– Bilasizmi, karate to'garagiga borganimda besh yoshda edim. Keyinroq kikboksing mashg'ulotlariga qatnab yurdim. O'n ikki yoshga kirganimda onam Andijon olimpiya zaxiralari kollejiga olib bordilar. Boshida “vazning kam”, deyishdi. O'shanda hozir ham menga murabbiylik qilayotgan ustozim Ziyodinbek Tuyg'onboev imkoniyat bergan. Sinov jangida ringga chiqqanman. Harakatlarim ma'qul keldi. O'zim ham boksga mehr qo'ydim.
– Suhbat “o'zanini” Olimpiya o'yinlariga burib yuborsak, qarshilik ko'rsatmasangiz kerak?
– Yo'q, albatta.
– Adashmasam, Riodagi ilk raqibingiz Xoselito Velaskesni Butunjahon boks seriyasi tasnifidagi turnirda ham (u “Meksikalik jangchilar” jamoasi a'zosi, muallif) mag'lubiyatga uchratgansiz.  
– Barcha bokschining noqulay raqibi bo'ladi. Men uchun Xoselito raqiblar orasida eng kuchlisi. Shuning uchun unga qarshi jang Butunjahon boks seriyasi turniridagi eng qiyin bahslardan biriga aylangan. Olimpiada qur'asidan keyin ilk jangni meksikalik bokschiga qarshi o'tkazadigan bo'ldim. Biroq menda imkoniyat ko'proqligini ich-ichimdan his qilardim. Yigirma ikki bokschining taxminan o'n etti-o'n sakkiztasi bilan avval ham uchrashganim bois kimning qanday imkoniyatga egaligini yaxshi bilardim. Boshqa tomondan, Butunjahon boks seriyasida dunyoning bir qator kuchli yarim professionallari ishtirok etgani uchun qimmatli tajriba orttirgandim.
– Finaldagi g'alabangizni o'ziga xos tarzda nishonladingiz, ya'ni Messi uslubida…
– Ha, jangdan oldin yaqinlarimga “G'alaba qozongan taqdirimda Messi uslubida nishonlayman”, deb aytgandim (tabassum qiladi).
– Quvonchlisi, Olimpiadaning “Eng tezkor va texnikasi yuqori bokschisi”ga topshiriluvchi “Vel Barker” kubogining sohibiga aylandingiz. Mazkur trofey 1936 yilda tashkil etilgan bo'lib, ilk mukofot egasi 49 kg. vazn toifasidagi bokschi edi. Oradan sakson yil o'tib, bu sovrin Sizga nasib etdi.
– To'g'risini aytaman, umuman kutilmaganda yuz berdi. Syupriz bo'ldi. Janglarni tomosha qilib o'tirganimda chaqirishdi. Borsam, “Shu erda bo'lib tur, kubok topshirishadi”, deyishdi.
– Agar Sizdan revansh olish niyatidagi bokschilar ro'yxati tuzilsa, bir musobaqa tashkil etishga etadi ular. Ayting-chi, Siz qaysi hamkasbingizdan revansh jangida ringga chiqishni xohlardingiz?
– Irlandiyalik bokschi bor (Barns Peddini nazarda tutmoqda, muallif). Olimpiya o'yinlariga litsenziyani qo'lga kiritish uchun ikkimiz ikki guruhda janglarni o'tkazganmiz. Har ikkimiz ham yutganmiz. Reyting balli hisobiga unga Olimpiada yo'llanmasini berib yuborishgan. Shu alam qilgan. Rioda o'sha bokschi bilan ringga ko'tarilsam rozi edim, degandim. Yana rus boksyori Vasiliy Egorov musobaqa oldidan “Do'stmatovni kuchli raqiblar qatoriga kiritmayman”, deb intervyu bergandi. Bu bokschi bilan ham ro'para kelsam, deb o'ylaganman.
– Boksdan tashqari yana nimalarga qiziqasiz?
– Bo'sh vaqt topildi deguncha futbol o'ynayman. Ayniqsa, videoo'yinda. Qolaversa, har kuni bir mahal boks, bir mahal futbol bilan mashg'ul bo'lamiz.
– Sizdan qanday futbolchi chiqardi, nima deb o'ylaysiz?
– Hozirgi vaznim bo'lsa, futbolchi chiqmasligi aniq. Do'stlar davrasida yomon o'ynamayman. Bu do'stlarimning fikri, albatta.
– Mashhur bokschilar haqida filmlar suratga olinadi. Siz haqingizda ham kartina yaratilsa, bosh rolni o'zingiz ijro etarmidingiz?
– Albatta, faqat charm qo'lqopimni “mixga ilganimdan” keyin. Yagona shart shu.
– Chempionligingizdan keyin “Hasanboy professional boksga o'tdi”, degan xabarlar tarqaldi. Aslida bungacha ham shartnomalar taklif etishgan. O'zingiz qachon professional boksda kuchingizni sinab ko'rasiz?
– Shu paytgacha ikki-uch professional shartnomalar bo'lgan. Biroq rad etganman. Maqsadim – Tokio Olimpiadasida ham ishtirok etish.
– Omad yor bo'lsin!
Qisqa savol-javob:
— Eng ko'p ishlatadigan so'zingiz?
— «Xo'p bo'ladi».
— Raqsga tushishni yoqtirasizmi?
— Yo'q. Raqsga tusholmayman. Faqat boksga tushaman (kuladi)
— Ko'proq tinglaysizmi yoki gapirasiz?
— Ko'p gapirsam kerak.
— Tanlovingiz: muhabbat yoki do'stlik?
— Hozir do'stlik, uylangandan keyin muhabbat…
Ulug'bek RAHMONQULOV suhbatlashdi Manba: erudit-sport.uz
— deya xabar beradi uff.uz nashri.