“Nasaf“ yoshlari 27-tur doirasidagi uchrashuvda “Lokomotiv” yoshlari bilan bahs olib borishdi.

Uchrashuv yoshlarimiz uchun omadsiz boshlandi. 9-daqiqada maydon egalari jarima maydonimiz yaqinida jarima to'pi tepish huquqini qo'lga kiritishdi. Ushbu jarima to'pini maydon tashqarisiga chiqarib yuborish uchun, to'pga sakragan Sirojiddin Qo'ziev darvozamizni ishg'ol qilib qo'ydi – 1:0. Ordan ko'p vaqt o'tmasdan himoyachilarimiz xatoga yo'l qo'yishdi, ular Sergey Proxorovni darvozamizga zarba berishga imkon berishdi. Natijada yoshlarimiz o'z darvozasidan ikkinchi to'pni olib chiqishga majbur bo'lishdi – 2:0.

Ammo yoshlarimiz ushbu gollardan keyin o'zlarini yo'qotib qo'yishmadi. Aksincha, o'yin tizginini o'z qo'llariga olishdi. To'pga nazorat qilish ham yoshlarimiz tomonida bo'ldi. Ular ketma-ket “Lokomotiv” yoshlari darvozasiga hujumlar uyushtirishdi va 19-daqiqa kelib hisobni qisqartirishga erishdilar, uchrashuvdagi jamoamizning birinchi goliga Islom Kenjaboev mualliflik qildi – 2:1. 23-daqiqa kelib esa, tezkor hujumchimiz Dilshod Xushbakov o'z hisobiga gol yozdirtirib qo'ydi. U maydonning o'ng qanotidan jarima maydoniga o'zi kirib bordi va himoyachilarning qarshiligini engib, o'tkir burchakdan darvozaga zarba yo'lladi, to'p darvoza to'ridan joy egalladi – 2:2.

Jamoalar ushbu hisob bilan tanaffusga chiqib ketishdi.

Ikkinchi bo'lim ham yoshlarimizning tashabbusi bilan boshlandi. Avval maydon egalarini himoyalanishga majbur etgan jamoamiz, ozroq vaqt o'tgach “Lokomotiv” yoshlariga hujum qilishga imkon berishdi. Hisobda oldinga o'tishni maqsad qilgan raqib jamoa futbolchilari hujumlarga berilib ketishdi. Natijada tezkor harakat qiluvchi Dilshod Xushbakovni o'yinchilarimiz 56-daqiqada juda qo'lay vaziyatda to'p bilan ta'minlashdi. Dilshod nafaqat himoyachilarni tezlikda ortda qoldirib ketdi, balki darvozabonni ham aldab o'tib, o'zining uchrashuvdagi ikkinchi golini kiritdi – 2:3. U bu uchrashuvda yana bir dublini qayd etdi. O'yin shu tempda davom etdi. Maydon egalari hujumlar uyushtirib, hisobni tenglashtirish payida bo'lishdi. Futbolchilarimiz esa, yaxshi himoyalanib, qarshi hujumda raqibni jazolashga harakat qildilar.

Jamoamizning uchrashuvdagi to'rtinchi goli 85-daqiqada Islom Rashidxonov tomonidan kiritildi – 2:4. Ushbu gol ham uchinchi gol kabi ko'rinishda bo'ldi, Islom darvozabonni ham ortda qoldirib, to'pni darvoza to'riga joylab qo'ydi.

Ushbu goldan keyin o'yin tizgini butunlay jamoamiz tomonida bo'ldi. Maydon egalarining uyushtirgan hujumlari esa, himoyachilarimiz tomonidan katta qarshilikka uchrab tugallanmasdan qolaverdi.

O'yinda dastlab o'z darvozasidan ikkita gol o'tkazib yuborib, keyin nafaqat hisobni tenglashtirib, balki hisobda oldinda borayotgan yoshlarimiz, qolgan daqiqalarni ham ajoyib tarzda o'tkazishdi. Natijada uchrashuvning 88-daqiqasida Islom Kenjaboev yana bir marta gol urib, u ham o'z hisobiga uchrashuvdagi dublni qayd ettirib qo'ydi – 2:5.

Uchrashuv ana shu hisobda yakunlandi. Bu g'alaba yoshlarimizning katta irodasi va hamjihatligi evaziga qo'lga kiritildi.

Endi jamoaamiz yoshlari navbatdagi tur uchrashuvini 3 noyabr kuni o'z maydonlarida “Neftchi” yoshlariga qarshi o'tkazishadi. Ularga qolgan o'yinlarda ham omad tilab qolamiz.

Yoshlar ligasi, 27-tur. 28.10.2016
“Lokomotiv” (Toshkent) – “Nasaf” (Qarshi) 2:5 (2:2)
TTYMI stadioni, Soat 14:00da
Hakamlar: A.Najafaliev, Ziyovuddin Erkinov, Avazbek Abdullaev, Dmitriy Klepikov (barchasi Toshkentdan)
Nazoratchi: A. V. Popov (Toshkent)
Gollar: Sirojiddin Qo'ziev (avtogol), 9’-1:0, Sergey Proxorov, 13’-2:0 – Islom Kenjaboev, 19’-2:1, 88’-2:5, Dilshod Xushbakov, 23’-2:2, 56’-2:3, Islom Rashidxonov, 85’-2:4.
“Lokomotiv”: 96.Rustam Nortojiev, 4.Farruhjon Ibrohimov (s), 9.Dilshobek Ergashev, 21.Alisher Sheraliev (28.Hayotbek Rahimjonov 65), 22.Ulug'bek Abdullaev, 24.Azizbek Omonov, 27.Bobirbek Tillaboev (13.Jahongir Safarov 60), 41.Sergey Proxorov, 77.Quvondiq Ro'ziev (10.Bek Abdullaev 40), 97.Boburbek Ergashev, 99.Xumoyun Agzamov.
Zaxira: 25.Sarvar Kerimov, 17.Vohidjon Yunusov, 18.Rustam Hamroev, 36.Otabek Muhammedov.
“Nasaf”: 35.Sanjar Quvvatov, 4.Akmaljon Olimov, 5.Rahimbek Javliev, 6.Sirojiddin Qo'ziev, 7.Akbar Murodov, 10.Islom Rashidxonov, 16.Dilshod Xushbakov (38.Jahongir Qurbonboev 61), 22.Islom Kenajaboev, 28.Sardor Sa'dullaev, 36.Akmal Mozgovoy (34.Samandar Shukrullaev 90), 41.Najmiddin Normurodov (s).
Zaxira: 30.Umidjon Ergashev, 14.Dostonbek Berdiqulov, 18.Sherzod Nasrullaev, 33.Navro'zjon Izatillaev, 43.Alfayzi Ne'matov.
Ogohlantirish: Bek Abdullaev 57, Farruhjon Ibrohimov 66, Ulug'bek Abdullaev 83 - Dilshod Xushbakov 49, Akbar Murodov 52.
— deya xabar beradi uff.uz nashri.