O'tgan hafta eng ko'p tilga olingan futbolchi O'zbekiston milliy jamoasi yarim himoyachisi va «Bunyodkor» klubi hujumchisi Eldor Shomurodov bo'ldi. Yo'q, biz adashib ketmadik, Shomurodov darhaqiqat, termada va klubda butkul boshqa vazifani bajaradi. Birida yarim himoya, ikkinchisida esa hujumda to'p suradi. Bu haqda keyinroq yana to'xtalamiz, hozir boshlab qo'ygan mavzumizni davom ettirsak. XORIJDAGI O'TKIR KO'ZLAR Demak, Eldor Shomurodov o'tgan haftaning eng ko'p tilga olingan futbolchilaridan bo'ldi. Bunga sabab uning «Nasaf»ga urgan chiroyli goli emas, yo'q, balki xorij matbuotida paydo bo'lgan maqola. «Interfutbol»ning avvalgi sonida uni o'qigan bo'lsangiz kerak, Rossiyaning Championat.com sayti Shomurodovni obdon maqtagan. Biz futbolchilarimizga yuqori baho berishlarini juda yoqtiramiz. Ayniqsa, u xorij nashri bo'lsa, moydek yoqadi. Odil Ahmedov yoki Vitaliy Denisov haqida qaysidir internet saytida yangilik paydo bo'lib qolsa, darhol tarjima qilamiz. Hatto, Vadim Afonin va Vagiz Galiulin haqidagi xabarlar ham nazardan chetda qolmaydi. Shunday ekan, Eldor Shomurodov haqida bu qadar iliq fikr bildirilsa, nima uchun xursand bo'lmasligimiz kerak? Yuqorida nomlari keltirilgan futbolchilar-ku Rossiya premer-ligasida to'p surishadi va ularga yaxshi tanish. Bu erda esa gap oliy ligadan boshqa joyni ko'rmagan va O'zbekiston terma jamoasiga chaqirila boshlaganiga ham endi bir yil bo'lgan futbolchi haqida ketmoqda. Championat.comning o'tkir nigohi o'zi uchun notanish bo'lgan chempionatdan bu qadar iqtidorni topgan ekan, qanday xursand bo'lmaylik? Tan oling, hali o'zimizda ham Eldor bu qadar maqtalmagan. Shu o'rinda albatta, savol paydo bo'ladi, qanday qilib hatto o'z o'lkasida o'ynaydigan iqtidorlarga ham katta e'tibor qaratmaydigan obro'li sayt Shomurodovning mahoratiga bu qadar oshufta bo'lib qoldi? JAVOB Bu savolga javob topish uchun variantlar etarli. Masalan, Championat.comning biror-bir muxbiri O'zbekiston terma jamoasi o'yinini tomosha qilgan va Eldorning harakati yoqib qolib, keyinchalik uning «Bunyodkor»dagi harakatlarini ham tomosha qilib chiqqan bo'lishi mumkin. Shundaymi? Keyin esa to'lqinlanib ketib, u haqida maqola yozilgan. Yo'qsa, olis o'lkadagi bir jurnalist Eldorning hatto o'zimiz ham ko'p payqamagan iqtidorini qaerdan ko'rsin? Buning uchun O'zbekiston terma jamoasi va «Bunyodkor»ning o'nlab o'yinlarini tomosha qilib chiqish lozim bo'ladi. Agar Championat.com muxbiri qandaydir mo''jiza tufayli «Bunyodkor»ning barcha o'yinlarini topib, haftalar davomida erinmay tomosha qilganiga ishonsangiz, u holda sizni tabriklasak bo'ladi. Chunki bemalol soddalik bo'yicha jahon chempionatida ishtirok etishingiz mumkin ekan. Rossiyadagi eng yirik saytlardan biri Eldor Shomurodovga bu qadar e'tibor qaratib qolishining sababi esa, ishoning, siz o'ylagandek murakkab emas. PROSPORT MANEGEMENT Endi vaziyatga boshqa tomondan yondoshamiz. Shomurodov haqida o'sha maqola bitilib,  o'zimizdagi deyarli barcha internet va bosma nashrlarda tarjima qilinib, chop etilgunga qadar bo'lgan vaqt ichida Rossiyadagi ProSport Manegement agentligi Eldor bilan shartnoma imzolagani haqida xabar paydo bo'lgan edi. Ya'ni, Shomurodovning kelajagi haqida endi mana shu agentlik qayg'uradi. Championat.comdagi maqola ham aynan ularning sa'y-harakatlari bilan chiqqanini bemalol taxmin qilish mumkin. ProSport Manegementning urinishlari bekorga emas, albatta, ularning ham o'z manfaatlari bor. Tekinga mushuk oftobga chiqmaydigan, futbolchi esa to'p tepmaydigan hozirgi zamonda ProSport Manegementning bu qadar tantilik qilishi bejizga emas. Agar Eldor agentlik tomonidan bildirilgan ishonchni oqlab, ular topib beradigan klubda yaxshi o'ynab ketsa, keyinchalik ProSport Manegement  katta moliyaviy daromad olishi turgan gap. Hozir Evropada agentlar qancha pul ishlashayotganini eshitgandirsiz? Eng oxirgi yorqin misol - Pol Pogbaning «MYu»ga o'tishidan uning agenti Mino Rayola 30 million evro daromad qilgani aytildi. Eldor Shomurodov albatta, Pol Pogba emas, ammo Odil Ahmedovning aytishicha, u kelajakda dunyo darajasidagi yulduzga aylanishi mumkin. O'zbekiston terma jamoasi sardori mubolag'a qilmoqdami? Balki. Ammo u ham o'z-o'zidan bunday gaplarni aytmagandir... ZAMONANING TALABI Albatta, biz Odilni haqiqatdan yiroq va balandparvoz gaplari uchun istagancha ayblashimiz mumkin. Ammo zamonaviy futbolda yulduzlik darajasiga chiqish va bor potentsialni ochib berish uchun o'yinchiga faqat iqtidorning o'zi kamlik qilganini ko'p ko'rganmiz. U haqida piar-yurishlar qilinmasa va matbuotda aylantirilmasa, iqtidor ko'p o'tmay so'nib qolishi hech gap emas. Albatta, piar-yurish - bor narsani asliyatdan ko'ra biroz ko'pirtirish ham degani, ammo ishoning, bu kerak. Aks holda, zamonaviy futboldagi ko'p yulduzlar hozirgi darajaga chiqmagan bo'lardilar. Yodingizdami, uch yil muqaddam o'smirlar o'rtasida o'tkazilgan jahon chempionatida O'zbekiston terma jamoasi Xorvatiyani 2:1 hisobida mag'lubiyatga uchratgan edi. O'sha uchrashuvda Jamshid Boltaboev xorvatlarning ko'p maqtalgan futbolchisi Alan Xalilovichdan ikki barobar yaxshiroq o'ynagan. Biroq Xalilovichni oradan hech qancha vaqt o'tmay «Barselona» sotib oldi, Boltaboev esa hamon «Paxtakor»da. Nima uchun? Chunki hali o'sha o'yin o'tmay turib Xalilovich haqida dunyo eshitib bo'lgan edi, butun boshli agentliklar uning piari bilan shug'ullanishardi. Boltaboevning o'yinini esa Angliya yoki Italiyadan kimdir tomosha qilgan va hatto, qoyil qolgan bo'lishi mumkin, ammo o'sha zahoti unutib yuborgani ham aniq. Futbol olami shunaqa beshafqat, unda o'z o'rningga ega bo'lish uchun yolg'iz urinish kamlik qiladi. Millionlar o'yini ham borgan sari shou-biznesga o'xshab ketmoqda. To'g'ri, agar futbolchi bemisl darajada iqtidorli bo'lsa, Markus Reshford singari yo'lini topib ketishi mumkin. Eldorga o'xshaganlar uchun esa butun boshli jamoa ishlashi kerak - imidjmeyker, klipmeyker (eng zo'r o'yinlar jamlanmasini yig'ib chiqish uchun) va yaxshi menejer. Buning uchun esa, ProSport Manegement bilan imzolangan shartnoma bo'lishi shart. O'shanda imkoniyat tug'iladi. Sen futbol o'ynaysan, qolgan ishni esa ular bajarishadi. Aytishadi-ku, «Nimaga bizni maqtashmayapti?» deb. Shunaqa. Futbolda ba'zan maqtov ham kerak. Biroq muhimi shundaki - bu maqtovlarga o'zing ishonib qolmasang bo'lgani. Mana, endi maqolaning asl mohiyatiga etib keldik. Agar Eldor Shomurodovning o'zi ham maqolani o'qiyotgan bo'lsa, bu yog'iga e'tiborliroq bo'lishini so'raymiz... Davomi bor. Maqola davomini iff.uz saytida o'qishingiz mumkin.
— deya xabar beradi uff.uz nashri.