Almati shahrida taekvondoning WTF yo'nalishi bo'yicha Qozog'iston Ochiq chempionati bahslari boshlandi. Musobaqaning dastlabki kuni bo'lib o'tgan yoshlar va kattalar o'rtasidagi musobaqada hamyurtlarimiz beshta medalga sazovor bo'lishdi.
Jumladan, kattalar o'rtasida vazni -54 kg.gacha bo'lgan sportchilar musobaqasida doyanga chiqqan Bahrom Abdullaev finalga qadar kechgan janglarni mag'lubiyatsiz o'tkazib, kumush medal sohibi bo'lgan bo'lsa, -58 kg. vazn toifasida bahs yuritgan vakilimiz Timurbek O'rolov bronza medalini qo'lga kiritdi.
Yoshlar o'rtasida o'tkazilgan musobaqada Vlada Pan (-59 kg) oltin, Ulug'bek To'xtasinov (-63 kg) kumush, Sardor Toirov (-59 kg) esa bronza medali bilan taqdirlandi.
2016 yilgi Olimpiada o'yinlarining yo'llanmasi uchun kurash olib borayotgan terma jamoamizning ikki etakchisi, jahon chempioni Dmitriy Shokin hamda jahon vitse-chempioni Jasur Boyqo'ziev o'z ishtiroklarini 28 oktyabr kuni boshlashadi. Ushbu turnir g'olibi 10 reyting ochkosiga ega bo'ladi. Shavkat Jalilov
Manzil: O'zbekiston Milliy Olimpiya qo'mitasi matbuot xizmati

— deya xabar beradi uff.uz nashri.