Nima bo'ldi? FIFA ortiq «Oltin to'p» sovrinini topshirmaydi, futbol olamidagi eng mashhur sovrin butunlay France Football nashriga qaytdi. Buning zararli tomoni shundaki, «Oltin to'p» FIFA ajratgan pullar tufayli, huddi kino olamidagi «Oskar»ga qiyoslanar edi. 2009-yilda Yozef Blatter 16 mln evro evaziga mukofotni 6 yilga sotib oldi. Shundan so'ng marosimlar o'zgacha tarzda o'tadigan bo'ldi: Messining noodatiy kostyumlari, Ronalduning «Si so» deya sahnada xayqirishi... France Football nashrining bunday katta hajmdagi tadbirlarni o'tkazishga mablag'i yo'q, shuning uchun «Oltin to'p»ning mavqei pasayishi mumkin. FIFA va France Football yangi to'rt oylik shartnoma borasida muzokora olib borishayotgan edi. Ammo, FIFA yangi prezidenti Janni Infantino «Oltin to'p» uchun ko'p mablag' sarflashni xohlamadi va faqat FIFAga tegishli sovrinni joriy qilishni o'ylardi. Nihoyat yangi sovrin joriy etildi - «Yilning eng yahshi futbolchisi» «Oltin to'p» avvallari qanday topshirilgan? «Oltin to'p» joriy etilganidan so'ng ilk 39 yil (1956 – 1995) faqat evropalik bo'lgan futbolchilarga berilar edi. Bu an'anaga Jorj Vea tufayli nuqta qo'yildi va bitta shart qoldi: futbolchi qaerlik bo'lmasin, muhimi Evropada to'p surishi kerak. Bir necha yil oldin «Oltin to'p» FIFAga emas, balki UEFAning tasarrufiga o'tishi mumkin edi. Mishel Platini sovrin yana faqat evropaliklarga berilishini istardi va buning uchun tashkilot mablag'ini sarflashga tayyor edi. Ammo, uning niyati amalga oshmay qoldi. Endi kimlar ovoz beradi? «Oltin to'p» egasini faqat jurnalistlar tanlaydilar va bu albatta zerikarli tuyuladi. FIFA joriy etgan sovrin esa birmuncha qiziqarliroq, chunki unda deyarli barchaning fikri inobatga olinadi. Ovoz beruvchilar to'rt guruhga bo'lingan: murabbiylar, terma jamoa sardorlari, jurnalistlar va muhlislar. Bu to'rt guruhga ovoz ulushlari teng 25%dan bo'lingan. Ovozlar qanday hisoblanadi? Har bir guruhning ovozlari alohida hisoblanadi, so'ngra foizlarga o'giriladi. Bir futbolchining har bir guruhdagi foizi 4ga bo'linadi (masalan: Ronaldu 70% muhlislar ovozini to'pladi, ammo ja'mi hisobda bu 17,5% bo'ladi). So'ngra turtta guruhdagi ja'mi foizlar qo'shiladi va g'olib aniqlanadi. Men natijaga ta'sir o'tkaza olamanmi? Albatta. FIFA rasmiy saytida ro'yhatdan o'tib, faqat bir martta 4-noyabrdan 22-noyabrgacha ovoz berishingiz mumkin. Ushbu havola orqali sevimli futbolchingizga ovoz berishingiz mumkin: FIFA rasmiy sayti Kim g'olib bo'lishi mumkin? «Oltin to'p»ga davogarlar (30 kishi): Aguero, Obameyang, Beyl, Buffon, Ronaldu, de Bryuyne, Dibala, Godin, Grizmann, Iguain, Ibrahimovich, Inesta, Koke, Kroos, Levandovski, Loris, Mahrez, Messi, Modrich, Myuller, Noyer, Neymar, Payet, Pepe, Pogba, Ruy Patrisiu, Serxio Ramos, Luis Suares, Vardi, Arturo Vidal. FIFA sovriniga davogarlar (23 kishi): Aguero, Beyl, Buffon, Ronaldu, de Bryuyne, Ibrahimovich, Inesta, Grizmann, Payet, Kante, Mahrez, Messi, Kroos, Levandovski, Modrich, Noyer, Neymar, O'zil, Pogba, Serxio Ramos, Luis Suares, Vardi, Aleksis Sanches. «Oltin to'p» ro'yhatiga tushib, ammo FIFA sovriniga kiritilmaganlar: Tomas Myuller, Pepe, Paulo Dibala, Gonsalo Iguain, Diego Godin, Per-Emerik Obameyang, Ugo Loris, Arturo Vidal, Koke, Ruy Patrisiu. FIFA sovriniga nomzod va «Oltin to'p» ro'yhatiga kiritilmaganlar: Aleksis Sanches, Mesut O'zil, Ngolo Kante. Bundan kelib chiqadiki, bir sovrinni Messi, ikkinchisini esa Ronaldu qo'lga kiritishi mumkinmi? Ha, bo'lishi mumkin. Oxirgi martta 2004-yil «Oltin to'p» va FIFA sovrini har xil futbolchilarga topshirilgan. O'shanda «Oltin to'p» Andrey Shevchenkoga berilgan bo'lsa, FIFA sovrini Ronaldinoga nasib etgan. «Oltin to'p»ning yangi zamonida esa (ya'ni 2010-yildan so'ng) faqat Lionel Messi (4 martta) va Krishtiano Ronaldular (2 martta) mukofotni qo'lga kiritgan. G'oliblar qachon e'lon qilinadi? «Oltin to'p» sohibi 13-dekabrda e'lon qilinadi, ammo sovrin topshirish marosimining o'tkazilishi so'roq ostida. FIFA har doimgidek o'z sovrinini hashamatli tadbirda topshiradi. Marosim 9-yanvar kuni Tsyurixda bo'lib o'tadi.
— deya xabar beradi uff.uz nashri.