Yaqindagina Malayziyaning Penang shahrida og'ir atletika bo'yicha yoshlar o'rtasidagi jahon chempionati bo'lib o'tganligi va unda O'zbekiston terma jamoasi a'zosi Adhamjon Ergashev barcha raqiblarini ortda qoldirib jahon chempioni unvoniga sazovor bo'lganligi xaqida aytib o'tgandik. O'tgan haftada Yaponiya poytaxti Tokio shahrida sportning ushbu turi bo'yicha yoshlar va o'smirlar o'rtasida qit'a chempionati start oldi.
Musobaqaning dastlabki kunidayoq terma jamoamiz a'zosi Adhamjon Ergashev 62 kilogramm vazn toifasida dast ko'tarishda 121 kg, siltab ko'tarishda 151 kg, umumiy 272 kg natija bilan oltin medalga sazovor bo'ldi va Osiyo chempionligini tantana qildi. E'tiborlisi, Adhamjon Ergashev 2014 yil Xitoyning Nankin shahrida bo'lib o'tgan o'smirlar Olimpiadasida bronza medaliga sazovor bo'lgan. Oradan bir yil o'tib, 2015 yil Polshaning Vrotslav shahrida tashkil etilgan yoshlar o'rtasidagi jahon chempionatida (16 yoshida 20 yoshli sportchilar o'rtasida) 3 ta kumush medalini qo'lga kiritgan. Malayziyadagi jahon chempionatida esa 2 ta oltin, 1 ta kumush va jahon chempioni degan sharafli nomga sazovor bo'ldi. Mana endi Adhamjon o'z shaxsiy kollektsiyasiga Osiyo chempionatining oltin medalini ham qo'shib qo'ydi.
Mutaxassislarning taxminiga ko'ra Adhamjon Ergashev xali o'z potentsialini to'la namoyish eta olganicha yo'q, boisi uning imkoniyatlari xali to'liq ochib berilmaganligi, u aslida bundanda yuksak natijalarga qodir ekanligi bashorat qilinmoqda va o'z navbatida unga Ruslan Nuriddinovning munosib davomchisi sifatida baho berilmoqda. Musobaqalarning ikkinchi kuni terma jamoamizning yana bir a'zosi Muattar Nabieva 58 kilogramm vazn toifasida bronza medaliga sazovor bo'ldi. Ushbu vazn toifasida oltin medal tailandlik sportchiga nasib etgan bulsa, Vetnam terma jamoasi a'zosi kumush medali bilan taqdirlandi.
Yaponiyadagi Osiyo chempionatida yurtimiz sha'nini himoya qilishi lozim bo'lgan tarkib odatdagidek, O'zbekiston og'ir atletika federatsiyasining Chirchiq shahridagi doimiy bazasida emas, balki Rossiyada saralandi. Aniqrog'i, Tatariston poytaxti Qozon shahrida tashkil etilgan navbatdagi o'quv-mashg'ulot yig'ini chog'ida yoshlar va o'smirlar terma jamoamiz katta murabbiyi, O'zbekistonda xizmat ko'rsatgan murabbiy Boris Semyonovich Savchenko va uning yordamchilari Jo'rabek Zoirov va Mahmud Tog'aevlar hammasi bo'lib 17 nafar yosh atletni ko'rikdan o'tkazishdi. Yig'inning so'nggi kunida yakuniy tarkib e'lon qilindi va 17 sportchidan 10 nafari Tokioga yo'l olishi ma'lum bo'ldi. Kunchiqar yurtdagi kit'a chempionatida yurtimiz sharafini quyidagi sportchilarimiz himoya qilishmoqda:  
O'smirlar jamoasi (17 yoshgacha): Aleksandr Li va Sarvar Toshtemirov (ikkalasi ham Toshkent viloyatidan), Jasur Abduhalimov (Navoiy), Adhamjon Ergashev (Namangan).
Yoshlar jamoasi (20 yoshgacha): Shahzod Xudoyberganov va Farxodbek Sobirov (ikkalasi ham Xorazm viloyatidan), Azamat Sharipov (Buxoro), Muhammadali Qahramonov (Toshkent viloyati), Muattar Nabieva va Omadoy Otaqo'zieva (ikkalasi Andijon viloyatidan).
Osiyo chempionati dasturiga odatga ko'ra, qit'a federatsiyasi rasmiy tadbirlari ham kiritilgan. Taqvim rejaga asosan, musobaqa kunlari rasman 8-16 noyabr qilib belgilangan. Ana shu kunlar orasida Osiyo OAF qoshida faoliyat ko'rsatadigan turli qo'mitalar yig'ilishlari o'tkaziladi. Ushbu yig'ilishlar delegatsiyamiz a'zolari uchun bevosita ahamiyatlidir. Masalan, chempionat hakamlari ro'yxatiga kiritilgan mamlakat federatsiyasi Sport direktori Zuhra Abdullaeva tibbiy va ayollar qo'mitasida ish olib boradi. O'zbekiston Milliy Olimpiya qo'mitasi Olimpiya harakatini rivojlantirish boshqarmasi boshlig'i Rashid Matkarimov esa murabbiylar va ilmiy tadqiqotlar qo'mitasi a'zosi hisoblanadi.
Mazkur qo'mitaga O'zbekiston va Osiyo og'ir atletika federatsiyalari vitse-prezidenti Shahrillo Mahmudov boshchilik qilib kelayotganligini ham, eslatib o'tish joiz. O'zbekistonda xizmat ko'rsatgan murabbiy Daniil Fyodorovich Kim ham hakam sifatida atletlar ishtirokini boshqarib boradigan mutaxassis sifatida Yaponiyaga taklif etilgan. Shuningdek, 10 noyabr kuni Osiyo OAF yillik Kongressida qit'a og'ir atletikasini yanada rivojlantirishga qaratilgan bir qator masalalar ko'rib chiqildi.
O'zbekiston Milliy olimpiya qo'mitasi
matbuot xizmati
— deya xabar beradi uff.uz nashri.