Futbol – unga oshiq bo'lgan insonlar uchun, hayot mazmunidek, go'yo! U bilan yurishadi, u bilan nafas olishadi. Lek aslo usiz yashashga rozi bo'lishmaydi. Hech sinab ko'rganmisiz, futbol ko'rishni to'xtatishga? Sabringiz necha kunga etgan ? Ha to'g'ri, futbol olamini shunchaki tark eta olmaymiz. Hozir men yozmoqchi bo'lgan mavzuim esa, sizni futbolga bog'lab turgan jozibani yaratuvchilar haqida. Shunday futbolchilar borki, ularning maydondagi harakatlarini ko'rib mahliyo bo'lib qolasan kishi. Lek afsuski, vaqt o'z so'zini aytmasdan qo'ymaydi. Yaqin yillar ichida faoliyatini yakunlaydigan futbolchilar ham bor, lekin ular haligacha futbol olamida o'z o'rnini yo'qotmagan. O'zining sport formasini yuqori ko'rsatkichlarda ushlab turibdi. Biz ularni o'yinini sevamiz! Biz ularning harakatlaridan zavq olamiz! Andres In'esta. Jozibakor o'yinni tomosha qilmoqchimisiz ? Andresni harakatlarini ko'rishni tavsiya etaman. To'pni o'zida olib qolishi, ajoyib driblinglari, mo''jizakor to'p etkazishlari odamni hayratga soladi. Afsuski, In'esta ham yana 3-4 yilda faoliyatini yakunlashiga to'g'ri keladi. Undan ham ko'proq o'ynaydi deysizmi ? Bo'lsa bordir, lekin “Barselona” shunday klubki, unda raqobatda yutib chiqishing uchun sen umuman formangni yo'qotmasliging, doimo mashg'ulotlarda tinmasliging kerak. In'estaga esa vaqt to'sqinlik qiladi. Yodingizdami, Gollandiyaga qarshi finalda urilgan gol ?! Yodingizdami, Klassikoda urgan goli uchun “Santiago Bernabeu”dagi olqishlar?! 2012-yilda Evropa chempionatida ham terma jamoasi uchun asosiy figura bo'ldi. O'shanda yil yakuni bo'yicha futbolchilar uchun juda yuqori ahamiyatga ega bo'lgan sovrin “Oltin to'p”ni aynan Andres olishini kutgandim. Afsus, nom, brend, reklama yana o'z so'zini aytgandi. Andresning o'zi ham “Oltin to'p” borasidagi savollar joniga tekkach, “Oltin to'p” ? Kechirasiz, men unaqa sovrinni bilmayman, degandi. Nahot 3-4 yildan keyin shunday vaziyatlarni qayta ko'rmaymiz ? Nahot In'estaning ham maydondagi harakatlarini bir necha yillardan keyin sog'ina boshlaymiz ? Andres faoliyatini yakunlagach, futbol olami juda katta yo'qotishga uchraydi. Buni o'sha paytda tushunib etadi hamma. Hali vaqt bor… Hali Iniesta maydonda… Shunday ekan uning o'yinidan zavq olaylik! Janluidji Buffon. “Yuventus”ning chin ma'noda tirik afsonasi. Jijji garchi darvozabon bo'lsa ham, garchi maydonni bir chetida tursa ham, u qahramonga aylana oldi ! Ko'pincha, hujumchilarning shedevr gollari-yu, yarim himoyachilarning jozibador passlari oldida, darvozabonlarning xatti-harakatlari unchalik ko'zga tashlanmaydi. Lekin shunda ham “porlab” turish, endi bu mahorat! Jijji siymosida sodiqlikni ham ko'ramiz. Jamoasi quyi divizionga tushib ketsa ham, uni boshqa klub libosiga almashtirmadi. Jamoaga sodiq qoldi. Bu hozirgi yulduzlik pillapoyalaridan chiqayotgan futbolchilar uchun mahorat maktabi bo'lsa, ajabmas. Buffonning faoliyatidagi eng yuqori nuqta, shubhasiz, 2006-yilga borib taqaladi. Davomi>> 
— deya xabar beradi uff.uz nashri.