Bugun ko'cha-ko'y, ishxona va boshqa jamoat joylaridagi suhbatlar mavzusi futbol haqida bo'lishi tabiiy. Chunki, bugun Toshkent vaqti bilan soat 16:00da futbol bo'yicha milliy terma jamoamiz Seulda juda muhim o'yin o'tkazadi.
Futbol deya atalmush sport turidan uzoqroq bo'lgan kishilar:  “Ho'sh, ushbu uchrashuv nimasi bilan boshqa o'yinlardan farq qiladi?” degan savolni berishlari mumkin. Gapni cho'zmay, indalloga o'tib qo'yaveraylik: Agar biz guruhdagi ikki asosiy raqib - Eron va Janubiy Koreyadan ochko tortib ololmaydigan bo'lsak mundial yo'lida yana arosatda qolib ketamiz. O'zbekiston termasi ayni payt olti jamoadan iborat guruhda uch yutuq, bir mag'lubiyat va to'qqiz ochko bilan ikkinchi o'rinni egallab turibdi. Koreyslarning ko'rsatkichi esa biznikilardan ko'ra biroz pastroq, ular to'rt o'yindan so'ng etti ochkoga egalar. Demak, aynan mana shu bahsda kim g'olib chiqsa, o'sha jamoa ikkinchi o'ringa mustahkam o'rnashib olish imkoniyatiga ega.     
Tarkibida Evropaning kuchli chempionatlarida to'p suradigan bir qator tajribali futbolchilar joy olgan Janubiy Koreya jamoasi Osiyoda etakchilardan hisoblansada, Uli Shtilike shogirdlari guruhdagi ikki uchrashuvni mazmunsiz o'tkazdi. Ular safardagi juft o'yindan bir ochko yig'a olganlar, xolos(Suriya - Janubiy Koreya 0:0, Eron – Janubiy Koreya 1:0).
O'yin oldidan ijtimoiy tarmoqda o'tkazgan so'rovnomamiz natijasi qo'yidagicha ko'rinish oldi:
1. O'zbekiston MTJ g'alaba qozonadi  42%
2. Mag'lub bo'ladi                              31%   
3. Durang natija qayd etiladi         27%
Ko'rib turganingizdek, ishqibozlarning fikrlari yakdil emas. Termamiz yutug'ini kutayotganlar nisbatan ko'proq bo'lib, bu erda vatanparvarlik tuyg'usi omili ham bor,  mag'lub bo'lishini taxmin qilganlar esa raqiblarimizni kuchli tarkibga ega ekanligidan cho'chiyotganlar va g'alabaga teng - durangga rozi muxlislar esa mundialga chiqishimizga ko'proq ishonayottganlar bo'lsa kerak. Sababi, agar biz koreyslar bilan mehmonda durangni eplay olsak, keyingi yil guruhdagi aynan koreyslarga qarshi so'ngi - o'z maydonimizdagi o'yinda ko'p narsa hal bo'ladi.
Har qanday vaziyatda ham o'zbegim muxlislari bugungi o'yinni faqat g'alaba ilinjida tomosha qiladilar. Chunki, bugun Seulda 11 o'zbek yigiti yurt madhiyasi ostida maydonga tushadi. Balki, koreyslar termasi bizning  jamoadan tarkib borasida biroz kuchliroqdir... Biroq, ishqibozlar futbolni - kutilmagan natijalar va mo'jizakorligi uchun suyishadi. Nasib qilsa, g'alabali onlarni birgalikda nishonlaymiz!      
Keldi mana eng muhim palla,
Boshni baland tutmasak bo'lmas.
Kuch sarflab endi ming karra,
Koreyani yutmasak bo'lmas!
Mardonavor bo'lsin bu o'yin,
Puch yong'oqqa to'lmasin qo'yin.
Babayanga eslatib qo'ying,
Koreyani yutmasak bo'lmas!
Sherdek mag'rur tursin yigitlar,
Cho'chimay to'p sursin yigitlar.
Chiroyli gol ursin yigitlar,
Koreyani yutmasak bo'lmas!
Unutmasdan farzandlik burchin,
Ko'rsataylik hur elning kuchin.
Mundialga yo'l olish uchun,
Koreyani yutmasak bo'lmas!
Elmurod Ermatov, Sherzod Sodiqov, Andijon
— deya xabar beradi uff.uz nashri.